સચિન-તાલંગપુર: મેહતાનગર સોસાયટીમાં રહેણાંક પ્લોટ પર બહુમાળી બાંધકામને લઈને સવાલો; મંજૂર નકશો, પરમિશન અને સ્થળ પરના બાંધકામની તટસ્થ તપાસની માંગ
સુરત શહેરના સચિન-તાલંગપુર વિસ્તારમાં આવેલા મેહતાનગર સોસાયટીમાં રહેણાંક પ્લોટ પર ચાલી રહેલા બહુમાળી બાંધકામને લઈને હવે અનેક પ્રશ્નો ઉભા થઈ રહ્યા છે. સ્થળ પરથી પ્રાપ્ત થયેલા ફોટોગ્રાફ્સમાં ગ્રાઉન્ડ ફ્લોર સહિત ઉપરના અનેક માળનું બાંધકામ ઊભું થયેલું જોવા મળે છે. ત્યારે સૌથી મોટો સવાલ એ છે કે આ બાંધકામ માટે સંબંધિત સત્તાધિકારીની મંજૂરી કેટલા માળ માટે આપવામાં આવી છે અને સ્થળ પર વાસ્તવમાં કેટલા માળનું બાંધકામ કરવામાં આવી રહ્યું છે?
મળતી વિગતો મુજબ આ સ્થળ સર્વે નં. ૨૦૪/૧, ૨૦૪/૨, ૨૦૫/૨, ૨૦૫/૩, બ્લોક નં. ૩૮૧, ટી.પી.-૩૩, ઓરિજિનલ પ્લોટ નં. ૨૬૦, ફાઇનલ પ્લોટ નં. ૨૫૩-એ અને ૨૫૩-બી, પ્લોટ નં. ૧૪, ૧૫ તથા ૨૭, ૨૮, મેહતાનગર સોસાયટી, તાલંગપુર, સચિન, સુરત ખાતે આવેલું હોવાનું જણાવવામાં આવે છે.
બાંધકામ નજરે પડે છે, તો ઝોન અધિકારીની નજર કેમ નથી પડતી?
શહેરમાં સામાન્ય નાગરિક દ્વારા નિયમથી થોડું પણ વિપરીત બાંધકામ કરવામાં આવે ત્યારે સંબંધિત વિભાગ દ્વારા નોટિસ સહિતની કાર્યવાહી કરવામાં આવતી હોવાના કિસ્સાઓ જોવા મળે છે. ત્યારે અહીં રહેણાંક વિસ્તારમાં એક સાથે અનેક માળનું બાંધકામ આગળ વધી રહ્યું હોવાના દૃશ્યો સામે આવ્યા બાદ સંબંધિત ઝોન અધિકારી તથા બાંધકામ વિભાગની કામગીરી સામે સવાલો ઊભા થવા સ્વાભાવિક છે.
જો બાંધકામ સંપૂર્ણપણે નિયમસર અને મંજૂર નકશા મુજબ થઈ રહ્યું હોય તો સંબંધિત પરમિશન અને મંજૂર પ્લાન અંગે સ્પષ્ટતા કરવામાં આવે તો સમગ્ર શંકાનું નિરાકરણ થઈ શકે છે. પરંતુ જો સ્થળ પરનું બાંધકામ મંજૂર નકશા કરતાં અલગ હોય તો તેની સામે નિયમ મુજબ કાર્યવાહી કરવામાં આવશે કે નહીં તે હવે જોવાનું રહ્યું.
મંજૂર પ્લાન સામે સ્થળ પરનું બાંધકામ કેટલું?
આ મામલામાં માત્ર બાંધકામની ઊંચાઈ જ નહીં પરંતુ મંજૂર FSI, સેટબેક, પાર્કિંગ, બાંધકામની મંજૂર સંખ્યા, ફાયર સેફ્ટી તથા લાગુ પડતા બિલ્ડિંગ નિયમોનું પાલન થયું છે કે નહીં તેની પણ ચકાસણી જરૂરી છે.
સવાલ એ પણ છે કે બાંધકામ શરૂ થતી વખતે સંબંધિત વિભાગ દ્વારા સ્થળ તપાસ કરવામાં આવી હતી કે નહીં? જો તપાસ કરવામાં આવી હોય તો અધિકારીઓને સ્થળ પર શું જોવા મળ્યું હતું? અને જો તપાસ કરવામાં આવી ન હોય તો આટલું મોટું બાંધકામ પૂર્ણતાની દિશામાં આગળ વધતું હોવા છતાં વિભાગની નજર કેમ નથી પડી?
અધિકારી અને બિલ્ડરની મિલીભગતના આક્ષેપો, તટસ્થ તપાસ જરૂરી
સ્થાનિક સ્તરે અધિકારી અને બાંધકામકર્તા વચ્ચે મિલીભગત હોવાના આક્ષેપો તથા શંકાઓ પણ વ્યક્ત થઈ રહી છે. જોકે આક્ષેપોની સત્યતા અંગે કોઈ નિષ્કર્ષ પર પહોંચતા પહેલાં સત્તાવાર દસ્તાવેજો, મંજૂર નકશો તથા સ્થળ તપાસ જરૂરી છે. જો તમામ પ્રક્રિયા નિયમસર થઈ હોય તો સત્તાવાર રેકોર્ડ દ્વારા હકીકત સ્પષ્ટ થઈ શકે છે.
બીજી તરફ જો મંજૂરી કરતાં વધુ અથવા નિયમવિરુદ્ધ બાંધકામ સામે આવે તો જવાબદાર વ્યક્તિ કે સંસ્થા સામે કાયદેસરની કાર્યવાહી થવી જોઈએ.
તંત્ર સ્થળ તપાસ કરશે કે બાંધકામ પૂર્ણ થયા બાદ જાગશે?
હાલ સૌથી મહત્વની માંગ એ છે કે સંબંધિત ઝોન અધિકારી દ્વારા તાત્કાલિક સ્થળ તપાસ અને માપણી કરવામાં આવે અને સ્થળ પરના બાંધકામની સરખામણી મંજૂર નકશા સાથે કરવામાં આવે. સાથે જ આ મિલકતને આપવામાં આવેલી બિલ્ડિંગ પરમિશન, મંજૂર પ્લાન અને અન્ય જરૂરી મંજૂરીઓની ચકાસણી કરવામાં આવે.
જો બાંધકામ નિયમસર હોવાનું બહાર આવે તો તંત્ર દ્વારા તેની સ્પષ્ટતા કરવામાં આવે અને જો નિયમવિરુદ્ધ બાંધકામ હોવાનું જણાય તો નિયમ મુજબ કાર્યવાહી કરવામાં આવે.
હવે જોવાનું એ રહ્યું કે પાંચ માળનું બાંધકામ નજરે દેખાયા બાદ પણ સંબંધિત ઝોન અધિકારીની નજર આ બાંધકામ પર પડે છે કે નહીં? કે પછી બાંધકામ પૂર્ણ થયા બાદ જ તંત્ર જાગશે?
રિપોર્ટર કલ્પેશ ધામેલીયા કામરેજ સુરત
