1 નવેમ્બર જીતેશ જોષી પાલનપુર બનાસકાંઠા
વિદ્યાર્થીના શિક્ષણને પ્રોત્સાહન આપવા જનપથ સેવા સંસ્થા દ્વારા પિયુષને સાયકલ અર્પણ કરાઈ
શ્રી મોરડુંગરા પ્રાથમિક શાળા ખાતે જનપથ સેવા સંસ્થાના સહયોગથી શિક્ષક વિદાય સમારોહ, દાન-ભેટ અને તિથિભોજન કાર્યક્રમનું ભાવસભર વાતાવરણમાં આયોજન કરવામાં આવ્યું હતું. આ પ્રસંગે શિક્ષક પ્રત્યેનું સન્માન, વિદ્યાર્થીઓ પ્રત્યેની સંવેદના અને સમાજસેવાની ઉમદા ભાવનાનો સુંદર સમન્વય જોવા મળ્યો હતો.શાળાના શિક્ષક શ્રી વિષ્ણુભાઈ આર. પ્રજાપતિની વિદાય નિમિત્તે તેમના શૈક્ષણિક, સામાજિક અને સેવાકીય યોગદાનને યાદ કરી શાળા પરિવાર દ્વારા સન્માનપૂર્વક વિદાય આપવામાં આવી હતી. શાળાના શિક્ષકમિત્રોએ તેમને સ્મૃતિભેટ અર્પણ કરી વર્ષો સુધી આપેલી સેવાઓ બદલ આભાર અને સ્નેહ વ્યક્ત કર્યો હતો. ઉપસ્થિત સૌએ તેમના ભાવિ જીવન માટે સુખ, શાંતિ અને સારા સ્વાસ્થ્યની શુભકામનાઓ પાઠવી હતી.કાર્યક્રમ દરમિયાન જનપથ સેવા સંસ્થાના સહયોગથી કનુભાઈ પટેલ (યુએસએ), જીગ્નેશભાઈ અને શૈલેષભાઈ પટેલ (યુએસએ) દ્વારા શાળાના વિદ્યાર્થી પિયુષને અભ્યાસમાં ઉપયોગી બને તે હેતુથી સાયકલ અર્પણ કરવામાં આવી હતી. આ પહેલથી વિદ્યાર્થીને શિક્ષણની સફરમાં પ્રોત્સાહન મળ્યું હતું. જરૂરિયાતમંદ વિદ્યાર્થીઓને સહાયરૂપ બનવાની દાતાઓની આ સેવાભાવી ભાવનાને ઉપસ્થિત સૌએ બિરદાવી હતી.
આ પ્રસંગે દાન-ભેટની પ્રવૃત્તિ સાથે તિથિભોજનનું પણ આયોજન કરવામાં આવ્યું હતું, જેમાં શાળા પરિવાર, ગ્રામજનો અને ઉપસ્થિત મહાનુભાવોએ ઉત્સાહભેર ભાગ લીધો હતો.સમગ્ર કાર્યક્રમના અંતે શાળાના આચાર્યશ્રીએ જનપથ સેવા સંસ્થા, દાતાશ્રીઓ, મહાનુભાવો, ગ્રામજનો, વાલીઓ અને શાળા પરિવારનો આભાર વ્યક્ત કર્યો હતો.આમ, મોરડુંગરા પ્રાથમિક શાળામાં યોજાયેલો આ કાર્યક્રમ શિક્ષકના યોગદાનને સન્માનવાની સાથે શિક્ષણક્ષેત્રે દાન, સહકાર અને સામાજિક જવાબદારીનું પ્રેરણાદાયી ઉદાહરણ બની રહ્યો હતો. તસવીર -અહેવાલ મહેન્દ્ર અગ્રવાલ 
