નર્મદા : રાજ્યસભા સાંસદ મુકેશભાઈ રાઠવાએ રાજપીપળા બિરસા મુંડા યુનિવર્સિટીની મુલાકાત લીધી
રાજપીપળા : જુનેદ ખત્રી
રાજ્યસભાના સાંસદ મુકેશભાઈ રાઠવા દ્વારા રાજપીપળા સ્થિત બિરસા મુંડા યુનિવર્સિટીની મુલાકાત લેવામાં આવી હતી. આ મુલાકાત દરમિયાન તેમણે યુનિવર્સિટી કેમ્પસમાં ઉપલબ્ધ વિવિધ શૈક્ષણિક વિભાગો, આધુનિક માળખાકીય સુવિધાઓ તથા વિદ્યાર્થીઓ માટે ઊભી કરવામાં આવેલી વિવિધ વ્યવસ્થાઓની મુલાકાત લઈ સમગ્ર શૈક્ષણિક પ્રવૃત્તિઓ અંગે માહિતી મેળવી હતી.
સાંસદ મુકેશભાઈ રાઠવાએ યુનિવર્સિટીના વાઇસ ચાન્સેલર, રજિસ્ટ્રાર, પ્રોફેસરો તથા સ્ટાફ સાથે ચર્ચા કરી હતી. તેમણે યુનિવર્સિટીમાં વિદ્યાર્થીઓને આપવામાં આવતા શિક્ષણ, અભ્યાસક્રમો, આધુનિક શિક્ષણ પદ્ધતિઓ, વિદ્યાર્થીઓ માટેની સુવિધાઓ તેમજ ભવિષ્યમાં યુનિવર્સિટીના વિકાસ માટે હાથ ધરવામાં આવી રહેલી કામગીરી અંગે વિગતવાર જાણકારી મેળવી હતી.
*જનજાતિ વિદ્યાર્થીઓ માટે શિક્ષણનું મહત્વપૂર્ણ ધામ*
બિરસા મુંડા યુનિવર્સિટી આજે મધ્ય ગુજરાત અને દક્ષિણ ગુજરાતના વિદ્યાર્થીઓ માટે ઉચ્ચ શિક્ષણનું વિશેષ કેન્દ્ર બની રહી છે. ખાસ કરીને જનજાતિ વિસ્તારના વિદ્યાર્થીઓને તેમના ઘરઆંગણે ઉચ્ચ ગુણવત્તાનું શિક્ષણ મળી રહે તે દિશામાં યુનિવર્સિટી મહત્વપૂર્ણ ભૂમિકા ભજવી રહી છે.
ભગવાન બિરસા મુંડાજીએ અંગ્રેજ શાસન સામે જળ, જંગલ અને જમીનના અધિકારો માટે ઐતિહાસિક સંઘર્ષ કર્યો હતો. તેમના નામ પરથી સ્થાપિત આ યુનિવર્સિટી જનજાતિ સમાજના યુવાનોને શિક્ષણના ક્ષેત્રે આગળ વધારી તેમના ઉજ્જવળ ભવિષ્યનો માર્ગ મોકળો કરી રહી છે. શિક્ષણ દ્વારા યુવાનોને સશક્ત બનાવવાનો આ પ્રયાસ બિરસા મુંડાના વિચારોને સાચા અર્થમાં આગળ ધપાવતો પ્રયાસ છે.
49 એકરમાં વિકસિત આધુનિક કેમ્પસ
લગભગ 49 એકર જેટલા વિશાળ વિસ્તારમાં કરોડોના ખર્ચે વિકસાવવામાં આવેલી બિરસા મુંડા યુનિવર્સિટી અદ્યતન ટેકનોલોજી આધારિત શિક્ષણનું કેન્દ્ર બની રહી છે. યુનિવર્સિટી કેમ્પસમાં વિદ્યાર્થીઓને અભ્યાસની સાથે સર્વાંગી વિકાસ માટે જરૂરી અનેક આધુનિક સુવિધાઓ ઉપલબ્ધ કરાવવામાં આવી છે.
યુનિવર્સિટીમાં સ્માર્ટ ક્લાસરૂમ, આધુનિક શૈક્ષણિક માળખું, રમતગમતના મેદાનો, આધુનિક ઓડિટોરિયમ, વિદ્યાર્થીઓ માટે રહેઠાણની સુવિધા સહિતની વિવિધ સુવિધાઓ ઊભી કરવામાં આવી છે. ટેકનોલોજીના યુગમાં વિદ્યાર્થીઓને આધુનિક અને ગુણવત્તાસભર શિક્ષણ મળી રહે તે માટે શિક્ષણ વ્યવસ્થામાં નવીન પદ્ધતિઓનો ઉપયોગ કરવામાં આવી રહ્યો છે. બિરસા મુંડા યુનિવર્સિટીની સૌથી મહત્વપૂર્ણ વિશેષતાઓમાંની એક એ છે કે અહીં વિદ્યાર્થીઓને વિના મૂલ્યે શિક્ષણ મેળવવાની તક મળી રહી છે. આ વ્યવસ્થા ખાસ કરીને આર્થિક રીતે નબળા અને જનજાતિ વિસ્તારના વિદ્યાર્થીઓ માટે ઉચ્ચ શિક્ષણ મેળવવામાં મહત્વપૂર્ણ સાબિત થઈ રહી છે. આ પ્રકારની શિક્ષણ વ્યવસ્થા દ્વારા વિદ્યાર્થીઓ પર આર્થિક ભાર ઓછો થાય છે અને તેઓ પોતાના અભ્યાસ, કૌશલ્ય વિકાસ તથા કારકિર્દી ઘડતર પર વધુ ધ્યાન કેન્દ્રિત કરી શકે છે. ઉચ્ચ શિક્ષણને વધુ સુલભ અને સર્વસમાવેશક બનાવવાની દિશામાં યુનિવર્સિટીની આ કામગીરી નોંધપાત્ર છે.
મુલાકાતના અંતે રાજ્યસભાના સાંસદ મુકેશભાઈ રાઠવાએ યુનિવર્સિટીના વાઇસ ચાન્સેલર, રજિસ્ટ્રાર, પ્રોફેસરો અને સમગ્ર સ્ટાફને યુનિવર્સિટીના વિકાસ તથા શૈક્ષણિક કામગીરી બદલ શુભેચ્છાઓ પાઠવી હતી. તેમણે વિદ્યાર્થીઓ સાથે પણ સંવાદ કરી તેમને પોતાના સપનાઓને સાકાર કરવા માટે સતત મહેનત, શિસ્ત અને આત્મવિશ્વાસ સાથે આગળ વધવા પ્રેરણા આપી હતી. વિદ્યાર્થીઓને ઉચ્ચ શિક્ષણ મેળવી પોતાની કારકિર્દી ઘડવાની સાથે સમાજ અને દેશના વિકાસમાં પણ યોગદાન આપવા માટે તેમણે શુભકામનાઓ પાઠવી હતી.
