રીપોર્ટ આસીફ લુણાવાડા
કોઠંબા તાલુકાના મહેસૂલી તલાટીઓ માટે હાજરીનું નવું સમયપત્રક જાહેર
વહીવટી પ્રક્રિયાને વેગ આપવા કોઠંબા મામલતદારે મહેસૂલી સેજા અને કામગીરીના દિવસો નક્કી કર્યા
મંગળવાર અને બુધવારે તલાટીઓ સેજાના મુખ્ય મથકે હાજર રહેશે, સોમવાર-ગુરુવારે મામલતદાર કચેરીએ હાજરી આપવી પડશે
મહીસાગર જિલ્લાના કોઠંબા તાલુકામાં હીવટી કાર્યક્ષમતા વધારવા અને નાગરિકોને મહેસૂલી સેવાઓ વધુ સુગમતાથી મળી રહે તે હેતુથી મામલતદાર અને એક્ઝિક્યુટિવ મેજિસ્ટ્રેટ દ્વારા મહેસૂલી તલાટીઓની કાર્યવહેંચણી અંગેનો મહત્વનો આદેશ જારી કરવામાં આવ્યો છે. સરકારના મહેસૂલ વિભાગના વિવિધ ઠરાવો અને કલેક્ટર કચેરીના માર્ગદર્શન હેઠળ લેવાયેલા આ નિર્ણય મુજબ, તાલુકાના તમામ ૧૫ મહેસૂલી તલાટીઓને ચોક્કસ સેજા (મહેસૂલી વર્તુળ) ફાળવી દેવામાં આવ્યા છે. આ નવી વ્યવસ્થાથી ગ્રામ્ય સ્તરે મહેસૂલી કામગીરીમાં પારદર્શિતા આવશે અને અરજદારોને પોતાના કામ માટે તલાટીઓની ઉપલબ્ધતા અંગે સ્પષ્ટ જાણકારી મળી રહેશે.
નવા જાહેર કરાયેલા કાર્યક્રમ અનુસાર, મહેસૂલી તલાટીઓએ અઠવાડિયાના નિર્ધારિત દિવસોમાં જ નિશ્ચિત સ્થળોએ હાજર રહેવાનું રહેશે. આદેશ મુજબ, દરેક મહેસૂલી તલાટીએ દર મંગળવાર અને બુધવારે ફરજિયાતપણે પોતાના ફાળવવામાં આવેલા સેજાના મુખ્ય મથક ખાતે હાજર રહી ગ્રામજનોના મહેસૂલી પ્રશ્નોનું નિરાકરણ કરવાનું રહેશે. અઠવાડિયાના અંતિમ દિવસો એટલે કે શુક્રવાર અને શનિવારને ક્ષેત્રીય કામગીરી માટે અનામત રાખવામાં આવ્યા છે, જે દરમિયાન તલાટીઓએ ગામના સીમાડાની તપાસ, પંચનામા અને અન્ય ફિલ્ડ વર્કની કામગીરી કરવાની રહેશે. આ ઉપરાંત, વહીવટી સંકલન અને કચેરીના કામકાજ માટે દરેક સોમવાર અને ગુરુવારે તમામ મહેસૂલી તલાટીઓએ કોઠંબા મામલતદાર કચેરી ખાતે પોતાની હાજરી નોંધાવવાની રહેશે.
તાલુકાના વિવિધ વિસ્તારો જેવા કે લાડવેલ, કોચીયા, કોઠંબા પાલ્લા, થાણાસાવલી, કંતાર, હાથીવન, ધામણીયા, રાબડીયા, નવી શિંગલી, માબલીયા અને જેથરીબોર સહિતના સેજાઓમાં મહેસૂલી તલાટીઓની નિમણૂક કરવામાં આવી છે. આ વ્યવસ્થામાં કેટલાક તલાટીઓને વધારાના હવાલા પણ સોંપવામાં આવ્યા છે જેથી કોઈ પણ વિસ્તારમાં વહીવટી કામગીરી અટકે નહીં. મામલતદાર કચેરી દ્વારા સ્પષ્ટ કરવામાં આવ્યું છે કે આ આદેશનો તાત્કાલિક અસરથી અમલ કરવાનો રહેશે અને સંબંધિત કર્મચારીઓએ પોતાની ફરજના સ્થળે નિયત સમયપત્રક મુજબ હાજર રહી નાગરિકોની સેવા કરવાની રહેશે.
વહીવટી તંત્ર દ્વારા આ નવી વ્યવસ્થાના અમલીકરણ માટે તાલુકા વિકાસ અધિકારીને પણ જાણ કરવામાં આવી છે. જે મુજબ, દરેક ગ્રામ પંચાયત કક્ષાએ મહેસૂલી તલાટીઓ માટે યોગ્ય બેઠક વ્યવસ્થા ઉપલબ્ધ કરાવવા સૂચના આપવામાં આવી છે જેથી નિર્ધારિત દિવસોમાં તલાટીઓ ગ્રામ્ય સ્તરે સુચારુ રૂપે કામગીરી કરી શકે. સરકારની આ જોગવાઈનો મુખ્ય ઉદ્દેશ્ય સામાન્ય જનતાને મહેસૂલી કામો માટે તાલુકા મથકે ધક્કા ખાવા ન પડે અને સ્થાનિક સ્તરે જ તેમના પ્રશ્નો ઉકેલાય તે સુનિશ્ચિત કરવાનો છે.
