રિપોર્ટર
હિતેન્દ્ર ગોસાઈ
અમદાવાદ
સેવા સંકલ્પ અભિયાન અંતર્ગત દિવ્યાંગજનોનું સન્માન અને નશામુક્તિના સામૂહિક શપથ લેવાયા
ઓઢવ ભિક્ષુક ગૃહ ખાતે વિવિધ સરકારી સહાય અને જરૂરી સાધનોનું વિતરણ
અમદાવાદ: ‘સેવા સંકલ્પ અભિયાન’ અંતર્ગત રાજ્યભરમાં ચાલી રહેલી જનસેવા અને સમુદાય આધારિત સેવાકીય પ્રવૃત્તિઓના ભાગરૂપે અમદાવાદના સમાજ સુરક્ષા વિભાગ દ્વારા ઓઢવ સ્થિત ભિક્ષુક ગૃહ ખાતે દિવ્યાંગજનોના કલ્યાણ અને સશક્તિકરણ માટે વિશેષ સહાય વિતરણ કાર્યક્રમ યોજાયો હતો.
મહાત્મા ગાંધીજીની જન્મજયંતી નિમિત્તે યોજાયેલા આ કાર્યક્રમમાં દિવ્યાંગ લાભાર્થીઓ સહિત અધિકારીઓ, કર્મચારીઓ અને વિવિધ આગેવાનો ઉપસ્થિત રહ્યા હતા. કાર્યક્રમ દરમિયાન ‘નશામુક્ત ભારત અભિયાન’ અંતર્ગત ઉપસ્થિત સૌએ વ્યસનમુક્તિ માટે સામૂહિક શપથ પણ ગ્રહણ કર્યા હતા.
255 દિવ્યાંગ લાભાર્થીઓને યોજનાકીય સહાય
કાર્યક્રમ દરમિયાન વિવિધ સરકારી યોજનાઓ હેઠળ કુલ 255 જેટલા દિવ્યાંગ લાભાર્થીઓને સહાયના મંજૂરી હુકમો એનાયત કરવામાં આવ્યા હતા. તેમાં દિવ્યાંગ બસપાસ, દિવ્યાંગ લગ્ન સહાય યોજના, સંત સુરદાસ યોજના, બૌદ્ધિક અસમર્થતા ધરાવતી વ્યક્તિઓ માટેની આર્થિક સહાય યોજના તેમજ અસ્થિવિષયક દિવ્યાંગોને ટુ-વ્હીલર ખરીદવા માટેની સહાય યોજનાના મંજૂરી પત્રોનો સમાવેશ થાય છે.
આ યોજનાકીય સહાયથી લાભાર્થીઓને સરકારની વિવિધ કલ્યાણકારી યોજનાઓનો સીધો લાભ મળી રહે અને તેઓ વધુ આત્મનિર્ભર બની શકે તે દિશામાં કામગીરી કરવામાં આવી રહી છે.
911 સાધન-સહાય કિટ્સનું વિતરણ
દિવ્યાંગજનોને રોજિંદા જીવનમાં સરળતા રહે અને તેમની જરૂરિયાત મુજબની સહાય ઉપલબ્ધ બને તે હેતુથી કુલ 911 જેટલી સાધન-સહાય કિટ્સનું પણ વિતરણ કરવામાં આવ્યું હતું.
આ કિટ્સમાં ટ્રાઇસિકલ, વ્હીલચેર, હિયરિંગ એઇડ્સ, રોલેટર, ક્રચ એલ્બો, ટી.એલ.એમ. કિટ, સ્માર્ટ કેન સહિતના વિવિધ ઉપયોગી સાધનોનો સમાવેશ થાય છે. જરૂરી સાધનોના વિતરણથી લાભાર્થીઓને દૈનિક જીવનમાં વધુ સુગમતા મળી રહે તેવો હેતુ રાખવામાં આવ્યો હતો.
નશામુક્તિનો સામૂહિક સંકલ્પ
મહાત્મા ગાંધીજીની જન્મજયંતીના અવસરે યોજાયેલા આ કાર્યક્રમમાં ‘નશામુક્ત ભારત અભિયાન’ને પણ જોડવામાં આવ્યું હતું. ઉપસ્થિત મહાનુભાવો, અધિકારીઓ, કર્મચારીઓ અને લાભાર્થીઓએ વ્યસનથી દૂર રહેવા તથા સમાજમાં નશામુક્તિ અંગે જાગૃતિ ફેલાવવાનો સામૂહિક સંકલ્પ લીધો હતો.
‘સેવા સંકલ્પ અભિયાન’ અંતર્ગત દિવ્યાંગજનોના સન્માન સાથે તેમને મળવાપાત્ર સરકારી યોજનાઓ અને સાધન-સહાય તેમના સુધી પહોંચાડવા માટે આ કાર્યક્રમ મહત્વપૂર્ણ બન્યો હતો.
અધિકારીઓ અને અગ્રણીઓની ઉપસ્થિતિ
કાર્યક્રમમાં હોસ્પિટલ કમિટીના ડેપ્યુટી ચેરમેન, કાઉન્સિલરો, ઓઢવ વોર્ડના પ્રમુખ અને મહામંત્રી, અમદાવાદ જિલ્લા વહીવટી તંત્રની સમાજ સુરક્ષા કચેરીના નાયબ નિયામક એસ.વી. રાઠોડ, સિટી મામલતદાર રણજીતસિંહ બી. મોરી, જિલ્લા સમાજ સુરક્ષા અધિકારી વી.એમ. કિશ્વિયન તેમજ સમાજ સુરક્ષા કચેરીનો સ્ટાફ ઉપસ્થિત રહ્યો હતો.
કાર્યક્રમના અંતે ઉપસ્થિત અગ્રણીઓએ દિવ્યાંગ લાભાર્થીઓને શુભેચ્છાઓ પાઠવી હતી અને સરકાર દ્વારા અમલમાં મૂકવામાં આવતી વિવિધ કલ્યાણકારી યોજનાઓનો મહત્તમ લાભ લેવા અનુરોધ કર્યો હતો. સાથે જ જરૂરિયાતમંદ લાભાર્થીઓ સુધી સરકારી સહાય પહોંચાડવાની પ્રક્રિયાને વધુ અસરકારક બનાવવા પર ભાર મૂકાયો હતો.
