રિપોર્ટર
હિતેન્દ્ર ગોસાઈ
અમદાવાદ
અમદાવાદ, ઓક્ટોબર 2026
અમદાવાદના પાલડી સ્થિત રિવરફ્રન્ટ સ્પોર્ટ્સ પાર્ક ખાતે યોજાયેલી એસીજી જુનિયર એનબીએ 3વી3 ટૂર્નામેન્ટના અમદાવાદ લેગમાં અંડર-16 બોયઝ કેટેગરીમાં આનંદ નિકેતન ઇન્ટરનેશનલ સ્કૂલ, અમદાવાદની ટીમ એ અને અંડર-16 ગર્લ્સ કેટેગરીમાં સેન્ટ મેરીસ કોન્વેન્ટ સિનિયર સેકન્ડરી સ્કૂલ, ઉદયપુરની ટીમ એ વિજેતા બની છે. ટૂર્નામેન્ટમાં અમદાવાદ સહિત આસપાસના વિસ્તારોની શાળાઓની ટીમોએ ઉત્સાહપૂર્વક ભાગ લીધો હતો.
એસીજી જુનિયર એનબીએ 3વી3 નેશનલ ટૂર્નામેન્ટ 16 વર્ષથી ઓછી વયના છોકરાઓ અને છોકરીઓ માટે યોજાતી દેશવ્યાપી શાળા-આધારિત બાસ્કેટબોલ સ્પર્ધા છે. અમદાવાદ લેગમાં વિવિધ શાળાઓની ટીમોએ શાનદાર રમતનું પ્રદર્શન કરી પોતાની પ્રતિભા અને ટીમવર્કનું પ્રદર્શન કર્યું હતું.
અમદાવાદ લેગમાંથી અંડર-16 બોયઝ અને ગર્લ્સ કેટેગરીની ટોચની બે ટીમો તેમજ બંને કેટેગરીમાંથી પસંદ કરાયેલી ઓલ-સ્ટાર ટીમ ડિસેમ્બર 2026માં યોજાનારી એસીજી જુનિયર એનબીએ 3વી3 નેશનલ ફાઇનલ્સ ટૂર્નામેન્ટમાં ભાગ લેશે.
અંડર-16 છોકરાઓની કેટેગરીમાં આનંદ નિકેતન ઇન્ટરનેશનલ સ્કૂલ, અમદાવાદની ટીમ એમાં અક્ષત સુરાણા, આરવ ઠક્કર, ક્રિશિવ પટેલ અને કિયાન ગાંધી વિજેતા રહ્યા હતા. દિલ્હી પબ્લિક સ્કૂલ, બોપલ અમદાવાદની ટીમ એમાં સચિત ગોયલ, વિહાન રાજપુરોહિત, અયાંશ દાસ અને નીર ચૌહાણ પ્રથમ રનર-અપ રહ્યા હતા. ગુજરાત પબ્લિક સ્કૂલ, અમદાવાદની ટીમ એમાં શિવેન તિલોકાની, ઉજ્જવલ સિંહ, માન તિલોકાની અને દિવ્યા પટેલે દ્વિતીય રનર-અપનું સ્થાન મેળવ્યું હતું.
અંડર-16 છોકરીઓની કેટેગરીમાં સેન્ટ મેરીસ કોન્વેન્ટ સિનિયર સેકન્ડરી સ્કૂલ, ઉદયપુરની ટીમ એએ પ્રથમ સ્થાન મેળવ્યું હતું. ટીમમાં ધ્રુવેકા દામાણી, હિયાંશી ડુંગરપુરિયા, ક્રિષ્ના ચૌધરી અને દિશિતા ભણસાલીનો સમાવેશ થાય છે. આ જ શાળાની ટીમ બીએ હિયાશા ડુંગરપુરિયા, વિની જૈન, અહાના માહેશ્વરી અને ક્રાંતિ પાલીવાલ સાથે પ્રથમ રનર-અપનું સ્થાન મેળવ્યું હતું. સેન્ટ ઝેવિયર્સ હાઇ સ્કૂલ લોયોલા હોલ, અમદાવાદની ટીમ એમાં આરના ચૌધરી, કર્ણિકા સારડા, નિકિતા સાજુ અને કાંશા સારડાએ દ્વિતીય રનર-અપનું સ્થાન મેળવ્યું હતું.
ટૂર્નામેન્ટ દરમિયાન શ્રેષ્ઠ વ્યક્તિગત પ્રદર્શન કરનારા ખેલાડીઓને પણ સન્માનિત કરવામાં આવ્યા હતા. સેન્ટ મેરીસ કોન્વેન્ટ સિનિયર સેકન્ડરી સ્કૂલ, ઉદયપુરની અંડર-16 ગર્લ્સ ટીમની હિયાંશી ડુંગરપુરિયા અને આનંદ નિકેતન ઇન્ટરનેશનલ સ્કૂલ, અમદાવાદની અંડર-16 બોયઝ ટીમના આરવ ઠક્કરને સ્કેચર્સ એમવીપી એવોર્ડથી સન્માનિત કરવામાં આવ્યા હતા.
અમદાવાદ લેગ માટે અંડર-16 બોયઝની ઓલ-સ્ટાર ટીમમાં ગ્લોબલ ઇન્ડિયન ઇન્ટરનેશનલ સ્કૂલ, અમદાવાદના શ્રેષ્ઠ શર્મા અને વિનાયક પાઠક, ગુજરાત પબ્લિક સ્કૂલ, અમદાવાદના શિવેન તિલોકાની તથા ઊર્મિ સ્કૂલ એન્ડ હોસ્ટેલ, બરોડાના મીત ચૌધરીની પસંદગી કરવામાં આવી હતી.
અંડર-16 ગર્લ્સની ઓલ-સ્ટાર ટીમમાં આનંદ નિકેતન ઇન્ટરનેશનલ સ્કૂલ, અમદાવાદની કાયરા હુંડિયા, સેન્ટ ઝેવિયર્સ હાઇ સ્કૂલ લોયોલા હોલ, અમદાવાદની આરના ચૌધરી અને કાંશા સારડા તથા આનંદ નિકેતન સ્કૂલ, શીલજ કેમ્પસ, અમદાવાદની કશ્વી રાવલનો સમાવેશ કરવામાં આવ્યો હતો.
આ વર્ષની ટૂર્નામેન્ટની મુખ્ય થીમ ‘વ્હેર સ્ટાર્સ આર બોર્ન’ રાખવામાં આવી છે. ઉભરતા બાસ્કેટબોલ ખેલાડીઓને રમતના વધુ અદ્યતન સ્તરે પહોંચવાની તક મળે તે માટે 2026ની આવૃત્તિમાં અંડર-16 વય વર્ગીકરણને મહત્વ આપવામાં આવ્યું છે. ટૂર્નામેન્ટનો મુખ્ય ઉદ્દેશ યુવા ખેલાડીઓમાં બાસ્કેટબોલની મૂળભૂત કુશળતા, શિસ્ત, ટીમવર્ક અને રમતગમતની ભાવનાને પ્રોત્સાહન આપવાનો છે.
2026 એસીજી જુનિયર એનબીએ 3વી3 નેશનલ ટૂર્નામેન્ટ ભારતના 10 શહેરોમાં યોજાઈ રહી છે. તેમાં અમદાવાદ ઉપરાંત ઇન્દોર, કોચી, દિલ્હી, ચેન્નાઈ, કોલકાતા, મુંબઈ, બેંગલુરુ, પ્રયાગરાજ અને લુધિયાણાનો સમાવેશ થાય છે. દેશભરની પાત્ર શાળાઓની છોકરાઓ અને છોકરીઓની ટીમોને તેમના સંબંધિત શહેરની ટૂર્નામેન્ટમાં ભાગ લેવાની તક આપવામાં આવી રહી છે.
આ ટૂર્નામેન્ટનું આયોજન નેશનલ બાસ્કેટબોલ એસોસિએશન દ્વારા એસીજી અને બાસ્કેટબોલ ફેડરેશન ઓફ ઇન્ડિયાના સહયોગથી કરવામાં આવી રહ્યું છે, જ્યારે સ્કેચર્સ અધિકૃત કિટ પાર્ટનર તરીકે જોડાયેલ છે.
એસીજી જુનિયર એનબીએ કાર્યક્રમનો ઉદ્દેશ સમગ્ર ભારતમાં યુવાનોને રમત સાથે જોડીને તેમના શારીરિક અને માનસિક વિકાસને પ્રોત્સાહન આપવાનો છે. ગયા વર્ષના કાર્યક્રમમાં 900 શાળાઓનું પ્રતિનિધિત્વ કરતી 2,000થી વધુ છોકરાઓ અને છોકરીઓની ટીમોના 8,000થી વધુ ખેલાડીઓએ ભાગ લીધો હતો. 10 શહેરોમાં 2,700થી વધુ બાસ્કેટબોલ મેચો રમાઈ હતી.
એસીજી જુનિયર એનબીએ કાર્યક્રમ ભારતમાં એનબીએના વ્યાપક યુવા વિકાસ માળખાનો એક ભાગ છે. તેમાં 13 શહેરોમાં 6થી 18 વર્ષના છોકરાઓ અને છોકરીઓ માટે એનબીએ બાસ્કેટબોલ સ્કૂલના તાલીમ કાર્યક્રમોનો પણ સમાવેશ થાય છે. આ કાર્યક્રમો ઇન્ડિયા ઓન ટ્રેક દ્વારા સંચાલિત કરવામાં આવે છે.
અમદાવાદ લેગની સફળતા બાદ હવે વિજેતા અને ઓલ-સ્ટાર ટીમોના ખેલાડીઓ ડિસેમ્બર 2026માં યોજાનારી નેશનલ ફાઇનલ્સ માટે તૈયારી કરશે. રાષ્ટ્રીય સ્તરની આ સ્પર્ધામાં દેશભરના વિવિધ શહેરોમાંથી ક્વોલિફાય થયેલી ટીમો વચ્ચે મુકાબલો જોવા મળશે.
