પ્રતિનિધિ શહેરા તા.28
નિલેશભાઈ દરજી શહેરા 
શહેરા તાલુકાની કાંકરી ખાતે આવેલી સરકારી વિનયન કોલેજમાં ‘સ્વર રણકાર’ શીર્ષક હેઠળ દેશભક્તિ સંગીત કાર્યક્રમનું આયોજન કરવામાં આવ્યું હતું. ગીત-સંગીત-નૃત્ય ધારા અને રમતગમત, યુવા અને સાંસ્કૃતિક પ્રવૃત્તિઓ વિભાગ, ગાંધીનગર તેમજ ગુજરાત રાજ્ય સંગીત નાટક અકાદમીના આર્થિક સહયોગથી આયોજિત આ કાર્યક્રમે શ્રોતાઓને રાષ્ટ્રપ્રેમના રંગે રંગી દીધા હતા.
આ કાર્યક્રમમાં પ્રખ્યાત કલાકારોએ રજૂ કરેલા દેશભક્તિ ગીતોએ ઉપસ્થિત સૌના હૃદયમાં રાષ્ટ્રભાવના જગાવી હતી. વિદ્યાર્થીઓએ પણ ઉત્સાહપૂર્વક આ કાર્યક્રમમાં ભાગ લીધો હતો, અને પોતાની સર્જનાત્મક તેમજ ભાવનાત્મક અભિવ્યક્તિ પ્રગટ કરી હતી જેના કારણે સમગ્ર કાર્યક્રમ ખુબ જ યાદગાર બની રહ્યો હતો.
આ અવસરે કોલેજના આચાર્ય ડૉ. જયશ્રીબેન જોષી એ પ્રેરણાદાયી ઉદ્બોધન આપતા જણાવ્યું હતું કે, “આવા કાર્યક્રમો માત્ર રાષ્ટ્રપ્રેમને જગાડતા નથી, પરંતુ વિદ્યાર્થીઓમાં સભ્ય અભિવ્યક્તિ, તાલમેલ અને સંગઠન ક્ષમતા જેવા જીવનઉપયોગી ગુણોનો સર્વાંગી વિકાસ કરે છે.”
આ ભવ્ય કાર્યક્રમનું સંચાલન ગીત-સંગીત-નૃત્ય ધારા કો-ઓર્ડીનેટર ડૉ. રાહુલ ત્રિવેદી દ્વારા કરવામાં આવ્યું હતું, જ્યારે સમગ્ર આયોજન સપ્તધારા કો-ઓર્ડીનેટર શૈલેષકુમાર રાઉલજીના માર્ગદર્શન હેઠળ સફળતાપૂર્વક સંપન્ન થયું. કાર્યક્રમના અંતે ડૉ. કર્ણસિંહ જાદવ દ્વારા આભારવિધિ કરવામાં આવી હતી.
