હિંમતનગર નગરપાલિકા દ્વારા “સ્વચ્છતા હી સેવા” કાર્યક્રમ અન્વયે શહેરના અલગ અલગ વિસ્તારોમાં સઘન સફાઈ ઝુંબેશ

****

આ ઝુંબેશ અંતર્ગત ૧૪૨ ટન કચરો અને રૂ. ૧૪,૪૦૦ દંડ વસુલ કરાયો

****

સાબરકાંઠા જિલ્લામાં હિંમતનગર નગરપાલિકા દ્વારા “સ્વચ્છતા હી સેવા” કાર્યક્રમ અન્વયે શહેરના અલગ અલગ વિસ્તારોમાં સઘન સફાઈ ઝુંબેશ યોજવામાં આવી રહી છે.

આ અભિયાન દરમિયાન કચરા પોઇન્ટ ઉપાડવાની કામગીરી ઝુંબેશ હાથ ધરવામાં આવી રહી છે. નગરપાલિકા વિસ્તારના તમામ જાહેર રસ્તાઓ, ઓવરબ્રિજ, અંડર બ્રિજ, રિવરફ્રન્ટ , કેનાલ વિસ્તાર, મેડિકલ કોલેજ, મંદિરો, બગીચા વિસ્તાર, સોસાયટીઓ વગેરે સઘન સફાઇ કરવામાં આવી રહી છે.

હિંમતનગરમાં અત્યાર સુધીમાં આ સફાઇ ઝુંબેશ થકી ૧૪૨ ટન કચરો એકત્ર કરી નિકાલ કરાયો છે. તેમજ સફાઇ કરેલા વિસ્તારમાં ગંદકી કરતા ૫૦ જેટલા લોકોને ચલણ આપી ૧૪,૪૦૦નો દંડ એકત્ર કરાયો છે.

આ સફાઈ અભિયાનમાં જિલ્લા કલેક્ટરશ્રી નૈમેષ દવે ખાસ નિરીક્ષણ કરી જરૂરી માર્ગદર્શન પુરૂ પાડી નાગરીકો અને અધિકારી કર્મીઓનો ઉત્સાહ વધારી રહ્યા છે. ચીફ ઓફિસરશ્રી અલ્પેશભાઇ પટેલ તેમજ સ્થાનિકો આ ઝુંબેશ માં જોડાયા હતા.

જયંતિ પરમાર સાબરકાંઠા