તા.૨૯/૧૧/૨૦૨૩

વાત્સલ્યમ્ સમાચાર

અમુ સિંગલ જેતપુર

Rajkot: રાજકોટમાં આજી ડેમ વિસ્તારમાં એક ભૂલી પડેલી યુવતી મળી આવતા એક જાગૃત નાગરિકે ૧૮૧ મહિલા હેલ્પ લાઇનમાં કોલ કરી જણાવ્યું હતું. આ અજાણી યુવતીને મદદ માટે ૧૮૧ ટીમ તાત્કાલિક રવાના થઈ હતી.

ઘટના સ્થળ ઉપર પહોંચી કાઉન્સેલર શ્રી ચંદ્રિકાબેન મકવાણા, મહિલા કોન્સ્ટેબલ શ્રી સંગીતાબેન પંડયા સહિતની ટીમે પીડિતાનું કાઉન્સેલિંગ કરતા જાણવા મળ્યું હતું કે, અમરેલી જિલ્લામાં મધ્યપ્રદેશથી રોજગારી માટે આવેલ યુવતી અને તેમના પરિવારના સભ્યો વાડીમાં ભાગ રાખીને કામ કરે છે. યુવતીને તેના ગામ નજદીકના ગામના એક યુવક સાથે પ્રેમ થઈ જતાં એને મળવા માટે યુવતી રાજકોટ આવી ગઈ હતી પરંતુ તે યુવક મળવા આવી શક્યો ન હતો અને રાત્રી થઈ જતાં આજીડેમ વિસ્તારમાં સલામતી ન અનુભવતા યુવતી એક સોસાયટીમાં આવી હતી. સોસાયટીના જાગૃત નાગરિકે યુવતીની સ્થિતિ જાણી દ્વારા ૧૮૧ ટીમને કોલ કરી બોલાવવામાં આવી હતી.

યુવતી ઘરેથી કોઈને કહ્યા વગર નીકળી ગઇ હોય યુવતીને તેના ઘરે જતા ડર લાગી રહ્યો હતો. આ પરિસ્થિતિમાં યુવતીનું કાઉન્સિલિંગ કરી માતાપિતાનો સંપર્ક કરી તેઓને તેની દીકરી બાબતે જાણ કરાઈ હતી. ત્યારબાદ અભયમ ટીમે લાંબા ગાળાના કાઉન્સેલિંગ અને માતાપિતા ન આવે ત્યાં સુધી યુવતીને આશ્રય માટે સખી વન સ્ટોપમાં આશ્રય અપાવ્યો હતો.

બે દિવસમાં યુવતીના માતા-પિતા આવી પહોંચતા, ૧૮૧ ટીમ દ્વારા તેમનું પણ કાઉન્સેલિંગ કરવામાં આવ્યું હતું. ત્યારબાદ યુવતીને સલામત પરિવારને સોંપાઈ હતી. આમ, ૧૮૧ અભયમ મહિલા હેલ્પલાઇનની ટીમ દ્વારા રાજકોટમાં ભૂલી પડેલી યુવતીને સલામત પરિવારને સોંપી સ્તુત્ય કાર્ય કરવામાં આવ્યું હતું.