નર્મદા જિલ્લામાં ચૂંટણી દરમિયાન શેડો એરિયાના ૨૪ ગામોમાં વોકીટોકી અને વાયરલેસ સિસ્ટમનો ઉપયોગ કરાશે
લોકસભા ચુંટણી શેડો એરિયાના નોડલ અધિકારીશ્રી અને નાયબ વન સંરક્ષકશ્રી મિતેષ પટેલ દ્વારા વન કર્મીઓને અપાયેલું ચૂંટણીલક્ષી માર્ગદર્શન
રાજપીપલા : જુનેદ ખત્રી
નર્મદા જિલ્લામાં લોકસભા ચુંટણી- ૨૦૨૪ સંદર્ભે જે ગામોમાં સંદેશા વ્યવહાર માટે મોબાઈલ નેટવર્ક ઉપલબ્ધ નથી થઈ શકતું તેવા શેડો એરિયાના ૨૪ ગામોનો સમાવેશ કરવામાં આવ્યો છે. આ ગામોમાં ચુંટણી પ્રક્રિયા દરમિયાન સંદેશાની આપ લે માટે વન વિભાગ દ્વારા વપરાતા વોકીટોકી અને વાયરલેસ સિસ્ટમનો ઉપયોગ કરવામાં આવશે. મતદાન પૂર્વે જરૂરી તૈયારીઓના ભાગરૂપે વાયરલેસ સિસ્ટમનો ઉપયોગ કરતા વન કર્મીઓની બેઠક આજે બુધવારે રાજપીપળા ખાતે યોજાઇ હતી. જેમાં લોકસભા ચુંટણી શેડો એરિયાના નોડલ અધિકારી અને નાયબ વન સંરક્ષક મિતેષ પટેલ ઉપરાંત આરએફઓ સામાજિક વનીકરણ જે. એ. ખોખર, આરએફઓ નર્મદા વન વિભાગ સ્નેહલ ચૌધરી, આરએફઓ કેવડિયા મદનસિંહ રાઓલજી તથા નર્મદા વન વિભાગ અને કેવડિયા વન વિભાગનો સંબંધિત કર્મચારીઓ ઉપસ્થિત રહ્યા હતા.