અમદાવાદમાં શૌચાલયમાં અનાયાસ પ્રસૂતિ, 108 ટીમની તત્પરતા માતા અને બાળક માટે બની જીવનરક્ષક
રિપોર્ટર
હિતેન્દ્ર ગોસાઈ
અમદાવાદ
અમદાવાદ : શહેરના સાબરમતી વિસ્તારમાં એક આશ્ચર્યજનક અને અનોખી ઘટના સામે આવી છે, જ્યાં એક મહિલાની પ્રસૂતિ સીધા પોતાના ઘરનાં શૌચાલયમાં થઈ ગઈ. પરંતુ 108 એમ્બ્યુલન્સ સેવાની ઝડપી કામગીરી અને સ્ટાફની હિંમતભરી તત્પરતાથી માતા અને નવજાત બંનેનો જીવ બચાવી શકાયો.
બપોરે આશરે 12 વાગ્યે 108 કંટ્રોલ રૂમને કૉલ મળ્યો કે સાબરમતી વિસ્તારમાં એક મહિલાને પ્રસૂતિ માટે તાત્કાલિક સેવા જોઈએ છે. કૉલ મળતા જ સાબરમતી 108 ટીમ, જેમાં ઈએમટી પિંકી ઠાકોર અને પાઈલટ વિષ્ણુ રાવળ સામેલ હતા, તાત્કાલિક સ્થળ પર દોડી ગયા.
સ્થળ પર પહોંચતા જ ટીમને ખબર પડી કે પરિસ્થિતિ અત્યંત જટિલ છે. મહિલાને પોતાને પણ ખ્યાલ નહોતો કે તે ગર્ભવતી છે. આ દરમિયાન શૌચાલયમાં જ તેની પ્રસૂતિ થઈ ગઈ હતી. મહિલાની હાલત એનિમિયા અને લોહીની કમીને કારણે વધારે નાજુક બની હતી, જ્યારે નવજાત બાળકને તાત્કાલિક પ્રાથમિક સારવારની જરૂર હતી.
પરિવારે શરૂઆતમાં પાઈલટને અંદર જવા મંજૂરી આપી નહોતી, જેના કારણે આખું સંચાલન ઈએમટી પિંકી ઠાકોરે એકલા હાથે કર્યું. પિંકી ઠાકોરે પોતાના ડિલિવરી કિટનો ઉપયોગ કરીને શૌચાલયમાં જ પ્રસૂતિ સંભાળી. તેમણે નવજાત શિશુને બહાર કાઢ્યો, સાફ કર્યો, ગર્ભનાળ કાપી પ્રાથમિક સારવાર આપી અને માતાને પણ જરૂરી સારવાર પૂરી પાડી. બાળકનો જન્મ 2.7 કિલો વજન સાથે થયો હતો.
ત્રણ મિનિટ જેટલા સમયમાં બનેલી આ ઘટનામાં પિંકી ઠાકોરની બહાદુરી અને ફરજપ્રત્યેની નિષ્ઠા જોઈને પરિવારજનો આશ્ચર્યચકિત રહી ગયા. માતા અને બાળકને ત્યારબાદ તાત્કાલિક સાબરમતી કોમ્યુનિટી હેલ્થ સેન્ટર (CHC) ખાતે વધુ સારવાર માટે ખસેડવામાં આવ્યા.
પછીની તપાસમાં જાણવા મળ્યું કે મહિલાને છેલ્લા ત્રણ મહિનાથી માસિક ન આવતા હોવા છતાં તેણે તેને ગંભીરતાથી લીધું નહોતું. સ્થાનિક ડોક્ટરે તેને લોહીની ગાંઠ હોવાનું કહ્યું હતું. ઘટનાના દિવસે મહિલાને ડાયરિયા હોવાની શંકા હતી અને તે કારણસર શૌચાલય ગઈ હતી, જ્યાં અચાનક પ્રસૂતિ થઈ ગઈ.
દર્દી અને તેના પરિવારજનોએ 108 સ્ટાફનો હૃદયપૂર્વક આભાર વ્યક્ત કર્યો હતો. તેઓએ જણાવ્યું કે જો 108 ટીમ સમયસર પહોંચી ન હોત, તો માતા અને બાળક બંનેની જાન પર સંકટ આવી શક્યું હોત.
આ ઘટના ફરી એકવાર સાબિત કરે છે કે “જ્યાં સંકટ ત્યાં સંજીવની” એવા સૂત્રને સાચો ઉતાર આપતી 108 સેવા માત્ર એક એમ્બ્યુલન્સ સેવા નથી, પરંતુ ગુજરાતના નાગરિકો માટે એક જીવનરક્ષક વ્યવસ્થા છે.
