રિપોર્ટ : પુજા ઠક્કર, મુંદરા-કચ્છ.
મુંદરાના રતાડીયા પાસે બસ રસ્તા પરથી નીચે ઉતરી: ખરાબ રસ્તાને કારણે મુસાફરો ભયભીત
મુંદરા,તા.7 : તાલુકાના રતાડીયા ગામેથી જિલ્લા મથક ભુજ તરફ જતી એકમાત્ર સવારની બસ આજે રતાડીયા અને વિરાણીયા ગામ વચ્ચે ખરાબ રસ્તાના કારણે રોડ પરથી નીચે ઉતરી ગઈ હતી. સદનસીબે આ ઘટનામાં કોઈ જાનહાનિ થઈ નથી. બસમાં સવાર તમામ મુસાફરો સુરક્ષિત છે.
આ ઘટનાએ ફરી એકવાર આ વિસ્તારના જર્જરિત રસ્તાઓની વાસ્તવિકતા સામે લાવી દીધી છે. ગામલોકોની વારંવાર રજૂઆતો છતાં, સ્થાનિક અને જિલ્લા મથકને જોડતા આ રસ્તાઓ વરસાદ બાદ અત્યંત ખરાબ હાલતમાં છે. રસ્તાઓ પર મોટા ખાડા અને તૂટેલી સપાટીને કારણે વાહનચાલકો અને મુસાફરોને ભારે હાલાકી ભોગવવી પડે છે.
સ્થાનિકોએ જણાવ્યું કે જો તંત્ર દ્વારા આ રસ્તાઓનું તાત્કાલિક સમારકામ કરવામાં નહીં આવે તો ભવિષ્યમાં આનાથી પણ મોટી દુર્ઘટના થવાનો ભય રહેલો છે. તેમણે તંત્રને વિનંતી કરી છે કે સમયસર આ રસ્તાઓનું સમારકામ કરીને મુસાફરોની સુરક્ષા સુનિશ્ચિત કરવામાં આવે.
આ ઘટના પરથી સ્પષ્ટ થાય છે કે રસ્તાઓની જાળવણી પ્રત્યે તંત્રની બેદરકારી મુસાફરો માટે જોખમ ઊભું કરી રહી છે. ગામલોકોએ સત્વરે આ સમસ્યાનો ઉકેલ લાવવા માટે માગ કરી છે.
(વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો : પુજા ઠક્કર, 9426244508, ptindia112@gmail.com)
