વાત્સલ્યમ સમાચાર પ્રવિણભાઇ ચૌહાણ થરાદ
થરાદ તાલુકાના નાગલા ગામના ગ્રામજનોએ તાલુકા પંચાયત કચેરી ખાતે ઘરવખરી સહાય યોજનાના ફોર્મ અને સરકારી સહાય વિતરણમાં કથિત અનિયમિતતાઓ અંગે રજૂઆત કરી હતી. ગ્રામજનોનો આરોપ છે કે ભરાયેલા ફોર્મ ગામ પંચાયતમાં જ અટવાયા છે અને કેટલાક લાભાર્થીઓને સહાય મળી નથી.
નાથાભાઈ વસવાઈ ઠાકોર નામના એક ગ્રામજને જણાવ્યું કે, લગભગ ૧૦-૧૫ દિવસ પહેલાં તેમના ગામમાં ઘરવખરી સહાય યોજનાના ફોર્મ ભરવામાં આવ્યા હતા. આ ફોર્મ ગામની પંચાયતમાં જમા કરાવવામાં આવ્યા હતા, પરંતુ તાલુકા પંચાયત કચેરી સુધી પહોંચાડવામાં આવ્યા નથી. તેમણે સરકારને વિનંતી કરી છે કે આ ફોર્મ પર તાત્કાલિક કાર્યવાહી કરીને લાભાર્થીઓને સહાયના પૈસા ચૂકવવામાં આવે.
અન્ય એક ગ્રામજન ખેમજીભાઈ રઘાભાઈએ ફરિયાદ કરી હતી કે તેમના વિસ્તારમાં પાણી ભરાવાને કારણે થયેલા નુકસાન છતાં તેમને સરકારી સહાય મેળવવામાં મુશ્કેલી પડી રહી છે. તેમણે આરોપ લગાવ્યો કે સરપંચ અને માજી સરપંચની ભલામણ વગર તેમના ફોર્મ સ્વીકારવામાં આવતા નથી. ખેમજીભાઈએ દાવો કર્યો કે માત્ર ‘ચમચાગીરી’ કરનારાઓના ફોર્મ જ પંચાયત સુધી પહોંચે છે, જ્યારે ગરીબ અને જરૂરિયાતમંદ લોકોના ફોર્મ મોટા અધિકારીઓ સુધી પહોંચતા નથી. તેમણે એ પણ ઉમેર્યું કે જેમણે ફોર્મ ભર્યા નથી તેમને પણ સહાય મળી છે, જ્યારે તેમને કોઈ સહાય મળી નથી.
ગ્રામજનોએ જણાવ્યું કે આ મુદ્દે ચાર દિવસ પહેલા પણ રજૂઆત કરવામાં આવી હતી, પરંતુ કોઈ સંતોષકારક કાર્યવાહી ન થતાં તેઓ ફરીથી આજે તાલુકા પંચાયત કચેરી આવ્યા હતા. આ રજૂઆત મૌખિક રીતે કરવામાં આવી હતી. ગ્રામજનોએ સરકારને તેમની ફરિયાદ સાંભળીને આ પ્રશ્નનો ઝડપથી નિકાલ લાવવા વિનંતી કરી છે.
