પંચમહાલમાં કમોસમી વરસાદનો કહેર: ડાંગરનો પાક અને પશુઓનો ઘાસચારો સંપૂર્ણપણે નાશ, ખેડૂતોની હાલત કફોડી
પંચમહાલ શહેરા
નિલેશભાઈ દરજી શહેરા 
ગોધરા: સમગ્ર ગુજરાતમાં હવામાન વિભાગની આગાહી મુજબ વરસી રહેલા કમોસમી વરસાદને કારણે જગતનો તાત જાણે આભ તૂટી પડ્યું હોય તેવી કપરી પરિસ્થિતિનો સામનો કરી રહ્યો છે. ખાસ કરીને પંચમહાલ જિલ્લાના ગોધરા તાલુકાના કાંકણપુર, પઢીયાર, વિંઝોલ, વેલવડ, મોર્યો, નદીસર, ધાનિત્રા, વેગનપુર જેવા અનેક ગામોમાં ખેડૂતોના તૈયાર પાકને ભારે નુકસાન થતાં ખેડૂતોમાં ભારે ચિંતા પ્રસરી ગઈ છે.
આ પંથકના ખેડૂતો મુખ્યત્વે ડાંગરની ખેતી પર નિર્ભર છે. ચાર મહિનાની અથાક મહેનત બાદ જ્યારે ડાંગરનો પાક લેવાનો સમય આવ્યો, તે જ વખતે ગઈકાલથી વરસેલા કમોસમી વરસાદના કારણે ડાંગરના પાકમાં પાણી ફરી વળ્યું છે. વરસાદના કારણે ખેતરમાં ઉભેલો પાક તેમજ જેની કાપણી કરી લેવાઈ હતી અને ખેતરમાં જ રાખવામાં આવ્યો હતો તે પાક પણ સંપૂર્ણપણે પલળી ગયો છે.
પાકને મોટું નુકસાન, ગુણવત્તા બગડી:
ડાંગર પલળી જવાથી તેની ગુણવત્તા બગડી છે. જેના કારણે ખેડૂતોને જોઈએ તેટલો સારો પાક હવે નહીં મળે અને મોટું આર્થિક નુકસાન થવાની ભીતિ છે. સતત વરસતા વરસાદના કારણે ખેડૂતોને પાકને બચાવવાનો મોકો પણ મળ્યો નથી. એક ખેડૂતે વ્યથા વ્યક્ત કરતા જણાવ્યું હતું કે, “અમારી ચાર મહિનાની મહેનત પાણીમાં ગઈ છે. તૈયાર પાક પલળી જતાં હવે બજારમાં સારો ભાવ પણ નહીં મળે.”
પશુઓના ઘાસચારાનો પણ નાશ, બેવડો ફટકો:
વધુમાં, આ વિસ્તારના ખેડૂતો પશુપાલન પર પણ નિર્ભર હોવાથી તેમના માટે પાકની સાથે-સાથે ડાંગરના ઘાસનું પણ ખૂબ મહત્વ હોય છે. ડાંગર પલળી જવાથી તેમાંથી મળતું ઘાસ પણ પશુઓ માટે પૂરતું અને યોગ્ય ગુણવત્તાવાળું રહેશે નહીં. આમ, ખેતી અને પશુપાલન બંને ક્ષેત્રે ખેડૂતોને બેવડો ફટકો પડ્યો છે.
ખેડૂતોએ સરકાર પાસે વળતરની માંગ કરી:
કમોસમી વરસાદથી થયેલા વ્યાપક નુકસાન અંગે ખેડૂતો ભારે ચિંતામાં મુકાયા છે. તેમની મહેનત પાણીમાં ગઈ હોવાથી અને આર્થિક રીતે નુકસાન થવાની સ્થિતિમાં હોવાથી તેમણે રાજ્ય સરકાર સમક્ષ તાત્કાલિક સર્વે કરી યોગ્ય વળતર ચૂકવવાની માંગણી કરી છે. ખેડૂતોનું કહેવું છે કે જો સરકાર આ બાબતે સર્વે કરીને ઝડપથી આર્થિક સહાય ચૂકવશે તો જ તેઓ આ સંકટમાંથી રાહત મેળવી શકશે.
