ઝઘડીયા તાલુકાના ગુંડેચા-2 પ્રાથમિક શાળાના આચાર્યનો વિદાય માન માટે કાર્યક્રમ યોજાયો .
36 વર્ષની સેવા પૂર્ણ: આચાર્ય અશોકભાઈ વસાવાનો વિદાય સમારોહ યોજાયો
ભરૂચ જિલ્લાના ઝઘડીયા તાલુકાના ગુંડેચા-2 પ્રાથમિક શાળાના આચાર્ય શ્રી અશોકભાઈ જેઠાભાઈ વસાવાએ આજે જીવનના અમૂલ્ય 36 વર્ષની સફળ અને સમર્પિત શિક્ષણ સેવાની યાત્રા પૂર્ણ કરી છે, અને તેઓ વયનિવૃત્ત થયા છે. અશોકભાઈની આ લાંબી અને પ્રેરણાદાયી કારકિર્દીને બિરદાવવા માટે, ગામલોકો અને શાળા પરિવારે એક વિદાય સમારોહનું આયોજન કર્યું હતું, નાવરા ફળિયા સ્થિત ગુંડેચા-2 પ્રાથમિક શાળા ખાતે યોજાયેલ આ કાર્યક્રમની અધ્યક્ષતા અખિલ ભારતીય રાષ્ટ્રીય શિક્ષક સંઘના કાઉન્સિલર બચુભાઈ વસાવાએ કરી હતી.આ પ્રસંગે, સરપંચ જીવીબેન વસાવા, ડેપ્યુટી સરપંચ કરશનભાઈ વસાવા, જિલ્લા સંઘના મહામંત્રી રાજીવભાઈ પટેલ, તેમજ ભાલોદ અને ઝઘડિયા ટીચર્સ મંડળીના અગ્રણીઓ, હોદ્દેદારો અને મોટી સંખ્યામાં નિવૃત્ત શિક્ષકો તથા ગામજનોએ ઉપસ્થિત રહીને અશોકભાઈ પ્રત્યેનો આદર વ્યક્ત કર્યો હતો.અશોકભાઈ વસાવાએ તેમની કુલ 36 વર્ષની કારકિર્દીમાંથી 24 વર્ષ તો એકલા ગુંડેચા-2 શાળાને જ સમર્પિત કર્યા છે. તેમની નિષ્ઠા અને માર્ગદર્શન હેઠળ હજારો બાળકોના ભવિષ્યનું ઘડતર થયું છે, જેનો આનંદ અને સંતોષ ગામજનોના ચહેરા પર સ્પષ્ટ જોવા મળતો હતો.કાર્યક્રમ દરમિયાન, શાળાના વિદ્યાર્થીઓએ તેમના પ્રિય આચાર્યને યાદ કરતાં સુંદર રંગારંગ કાર્યક્રમો રજૂ કર્યા હતા. ગામલોકોએ સ્નેહ સાથે અશોકભાઈને સ્મૃતિભેટો અર્પણ કરી. વળી, ઉપસ્થિત તમામ મહેમાનો માટે સૌજન્ય ભોજનની ઉત્તમ વ્યવસ્થા પણ રાખવામાં આવી હતી.આમલઝર શાળાના શિક્ષક રણજીતભાઈ વસાવાએ મહેમાનોનું સ્વાગત કર્યું, જ્યારે શિક્ષિકા ઝુલ્યાબેન વસાવાએ અશોકભાઈના સંસ્મરણોને ભાવભર્યા શબ્દોમાં યાદ કરીને સૌની આંખો ભીની કરી હતી. સન્માનપત્રનું હૃદયસ્પર્શી વાચન રાજેશભાઈ વસાવાએ કર્યું હતું, અને સમગ્ર કાર્યક્રમનું સુંદર સંચાલન સંદીપભાઈ કનુભાઈ વસાવાએ સફળતાપૂર્વક સંભાળ્યું હતું.વિદાય સમયે શાળા પરિવાર અને ગામજનોએ અશોકભાઈને આગામી જીવનયાત્રા માટે શુભકામનાઓ અર્પી હતી.
ઈરફાન ખત્રી
રાજપારડી
