અરવલ્લી
અહેવાલ:- હિતેન્દ્ર પટેલ
મેઘરજ – સરકારી બી.એડ્. કોલેજ, મેઘરજ ખાતે સંસ્કૃત ગૌરવ પરીક્ષાનું સફળ આયોજન
સરકારી બી.એડ્. કોલેજ, મેઘરજ કેન્દ્ર ખાતે તારીખ ૦૬/૧૨/૨૦૨૫ (શનિવાર)ના રોજ સંસ્કૃત ભારતી દ્વારા આયોજિત ‘સંસ્કૃત ગૌરવ પરીક્ષા’નું સફળ આયોજન કરવામાં આવ્યું હતું. આ પરીક્ષાનો મુખ્ય હેતુ વિદ્યાર્થીઓમાં સંસ્કૃત ભાષા પ્રત્યે ગૌરવભાવના વિકસાવવો તથા ભારતીય સંસ્કૃતિના મૂલ્યોનું સંવર્ધન કરવો હતો.આ પરીક્ષામાં સરકારી બી.એડ્. કોલેજ, મેઘરજના આશરે ૧૨૦ તાલીમાર્થીઓએ ઉત્સાહપૂર્વક ભાગ લીધો હતો. પરીક્ષાનું આયોજન સંપૂર્ણપણે શિસ્તબદ્ધ અને સુવ્યવસ્થિત રીતે કરવામાં આવ્યું હતું. પરીક્ષા દરમિયાન તાલીમાર્થીઓએ શાંતિપૂર્ણ વાતાવરણમાં પરીક્ષા આપી અને સંસ્કૃત ભાષા પ્રત્યે ઊંડો રસ અને જિજ્ઞાસા દર્શાવી હતી.આ કાર્યક્રમ આચાર્ય ડો. રામભાઈ ચોચાના માર્ગદર્શન હેઠળ યોજાયો હતો. સંસ્કૃત ગૌરવ પરીક્ષાના કેન્દ્ર સંયોજક તરીકે ડો. સાગરભાઈ મહેતાએ મહત્વપૂર્ણ જવાબદારી નિભાવી હતી. તેમના સંકલન અને માર્ગદર્શનથી પરીક્ષાની સમગ્ર વ્યવસ્થા સુચારૂ રીતે સંચાલિત થઈ હતી. કોલેજના સ્ટાફ સભ્યો દ્વારા પણ જરૂરી સહયોગ પૂરો પાડવામાં આવ્યો હતો.આ પ્રકારની પરીક્ષાઓ દ્વારા તાલીમાર્થીઓમાં સંસ્કૃત ભાષા, સાહિત્ય તેમજ ભારતીય સંસ્કૃતિ પ્રત્યે જાગૃતિ વધે છે અને ભાષાકીય જ્ઞાનમાં પણ નોંધપાત્ર વધારો થાય છે. ઉલ્લેખનીય છે કે છેલ્લાં ત્રણ વર્ષથી આ પરીક્ષા સરકારી બી.એડ્. કોલેજ, મેઘરજ ખાતે નિયમિત રીતે આયોજિત કરવામાં આવી રહી છે.અંતે, સંસ્કૃત ભારતી દ્વારા આયોજિત ‘સંસ્કૃત ગૌરવ પરીક્ષા’ સરકારી બી.એડ્. કોલેજ, મેઘરજ ખાતે સફળતાપૂર્વક સંપન્ન થઈ હતી.
