નેશનલ સ્કૂલ્સ ચેસ ચેમ્પિયનશિપ-2026માં ગુજરાતના યુવા ચેસ ખેલાડીઓનું શાનદાર પ્રદર્શન
રિપોર્ટર
હિતેન્દ્ર ગોસાઈ
અમદાવાદ
આસામના ગુવાહાટી ખાતે તાજેતરમાં યોજાયેલી 14મી નેશનલ સ્કૂલ્સ ચેસ ચેમ્પિયનશિપ-2026માં ગુજરાતના પ્રતિભાશાળી યુવા ચેસ ખેલાડીઓએ ઉત્કૃષ્ટ પ્રદર્શન કરી રાજ્યનું નામ રોશન કર્યું છે. દેશભરના વિવિધ રાજ્યોમાંથી આવેલા શ્રેષ્ઠ ખેલાડીઓ વચ્ચે યોજાયેલી આ પ્રતિષ્ઠિત સ્પર્ધામાં ગુજરાતના ખેલાડીઓએ પોતાની વ્યૂહાત્મક સમજ, ધીરજ અને રમત પ્રત્યેની નિષ્ઠાનો સુંદર પરિચય આપ્યો હતો.
અંડર-11 ઓપન કેટેગરીમાં ધ્યાન પટેલે સમગ્ર ટુર્નામેન્ટ દરમિયાન અપરાજિત રહી 8.5 પોઈન્ટ મેળવ્યા અને ગોલ્ડ મેડલ સાથે પ્રથમ સ્થાન મેળવ્યું. તેની સતત જીત અને આત્મવિશ્વાસભર્યા રમતે તેને બોર્ડમાં ટોચ પર સ્થાન અપાવ્યું, જે ગુજરાત માટે વિશેષ ગૌરવની વાત બની.
અંડર-9 ગર્લ્સ કેટેગરીમાં પટાવરી આરાધ્યા સૌરભે પણ પ્રશંસનીય પ્રદર્શન કર્યું. તેણે 7 પોઈન્ટ મેળવી બોર્ડમાં ચોથું સ્થાન મેળવ્યું અને નાની ઉંમરે પોતાની પ્રતિભાનો પરિચય આપ્યો. તેની રમતમાંથી ભવિષ્યમાં વધુ મોટી સિદ્ધિઓની આશા જાગી છે.
આ ઉપરાંત ગુજરાતના અન્ય ખેલાડીઓએ પણ નોંધપાત્ર પ્રદર્શન કર્યું. રિષિત શર્મા (અંડર-15 ઓપન) એ 7 પોઈન્ટ, અંશ અગ્રવાલ (અંડર-9 ઓપન) એ 6.5 પોઈન્ટ અને યતી અગ્રવાલ (અંડર-13 ગર્લ્સ) એ 6 પોઈન્ટ મેળવી પોતાની ક્ષમતાનો પ્રભાવશાળી દેખાવ કર્યો. તમામ ખેલાડીઓએ કઠિન સ્પર્ધામાં સંઘર્ષભાવના અને વ્યૂહાત્મક કુશળતાનું ઉત્તમ ઉદાહરણ રજૂ કર્યું.
ગુજરાતના ખેલાડીઓના આ શાનદાર પ્રદર્શનથી રાજ્યના ચેસપ્રેમીઓમાં ઉત્સાહનો માહોલ જોવા મળ્યો છે. દબાણભરી પરિસ્થિતિઓમાં લેવાયેલા તેમના નિર્ણયો, સ્થિરતા અને રમત પ્રત્યેનો સમર્પણ ચેસની સાચી ભાવનાને પ્રતિબિંબિત કરે છે. તેમની સફળતા રાજ્યના અનેક નવોદિત ખેલાડીઓ માટે પ્રેરણાસ્રોત બની છે.
ગુજરાત રાજ્ય ચેસ એસોસિએશને તમામ ખેલાડીઓની આ સિદ્ધિઓને ગૌરવપૂર્વક ઉજવી છે અને તેમના ઉજ્જવળ ભવિષ્ય માટે શુભેચ્છા પાઠવી છે. એસોસિએશનના પ્રમુખ દેવ પટેલે તમામ વિજેતાઓને અભિનંદન પાઠવતા જણાવ્યું હતું કે ગુજરાતના યુવા ખેલાડીઓ દેશના ચેસ નકશા પર સતત પોતાની મજબૂત હાજરી નોંધાવી રહ્યા છે અને આવનારા સમયમાં તેઓ આંતરરાષ્ટ્રીય સ્તરે પણ રાજ્યનું નામ રોશન કરશે તેવી આશા વ્યક્ત કરી હતી.
