સફેદ હેડલાઇટ ધરાવતા વાહનચાલકો સામે કાર્યવાહી કરાશે : RTO
સફેદ હેડલાઇટ ધરાવતા વાહનચાલકો માટે એક મોટા સમાચાર સામે આવ્યા છે. વાસ્તવમાં રાજ્યના વાહન વ્યવહાર વિભાગે મહત્વપૂર્ણ સૂચના જાહેર કરી છે. આ સૂચના ખાસ કરીને એવા વાહનચાલકો માટે છે જેમના વાહનોમાં અતિ તેજસ્વી (bright) સફેદ હેડલાઇટ લગાવેલ હોય. સામાન્ય વાહનચાલકો દ્વારા કહેવામાં આવ્યું છે કે, આ પ્રકારની હેડલાઇટથી વાહનચાલકોને રાત્રિના સમયે મુશ્કેલીનો સામનો કરવો પડે છે.
રાજ્યના તમામ RTO (Regional Transport Office)ને આ મુદ્દે સૂચના આપી દેવાઈ છે અને કોઈપણ ફરિયાદ મળતા જ તેના પગલે જરૂરી કાર્યવાહી કરવામાં આવશે. ખાસ કરીને એ વાહનચાલકો માટે આ મહત્વપૂર્ણ છે જેમના વાહનમાં અતિ તેજસ્વી સફેદ હેડલાઇટ્સ લાગેલા હોય.
વાહનચાલકોને સલાહ આપવામાં આવી છે કે, તેઓ હેડલાઇટ્સની તેજસ્વિતા નિયમો મુજબ જ રાખે અને સામાન્ય વાહનચાલકોને પરેશાન ન કરે. આ પગલાંનો ઉદ્દેશ્ય માત્ર માર્ગ પર સલામતી જાળવવાનો અને રાત્રિ દરમ્યાન બધાની સુવિધા સુનિશ્ચિત કરવાનો છે. સફેદ હેડલાઇટ ધરાવનારાઓ માટે હવે નિયમોનું પાલન અત્યંત મહત્વપૂર્ણ બની ગયું છે.
નવા આદેશ મુજબ, માત્ર વાહનચાલકો જ નહીં પરંતુ વાહન ડીલરો સામે પણ સકંજો કસવામાં આવશે. તમામ ડીલરોએ તેઓ ગ્રાહકને અનઅધિકૃત સફેદ LED લાઈટ ફીટ કરી ન આપે તેની ખાતરી કરવાની રહેશે. આરટીઓ (RTO) અને પોલીસ દ્વારા ડીલર કક્ષાએ પણ સઘન ચેકિંગ કરવામાં આવશે. જો કોઈ ડીલર નિયમ વિરુદ્ધ લાઈટો લગાવતા ઝડપાશે તો તેમની સામે પણ કાર્યવાહી થશે.
કમિશનરની મંજૂરી બાદ હવે રાજ્યભરમાં પોલીસ અને પરિવહન વિભાગ દ્વારા ‘સઘન એન્ફોર્સમેન્ટ’ કાર્યવાહી શરૂ કરવામાં આવશે. રસ્તા પર ચેકિંગ દરમિયાન જે પણ વાહનોમાં આવી અનઅધિકૃત હાઈ-બીમ કે સફેદ LED હેડલેમ્પ જણાશે, તેમની સામે કાયદેસરની દંડનીય કાર્યવાહી કરવામાં આવશે.
