વાત્સલ્યમ સમાચાર
મદન વૈષ્ણવ 
ડાંગ જિલ્લાનાં વઘઈ તાલુકામાં આવેલું આશાનગર (પૂણી કેન્દ્ર) છેલ્લા ઘણા સમયથી ગ્રામ પંચાયતની ઉદાસીનતાનો ભોગ બની રહ્યુ છે.આ વિસ્તારના રસ્તાઓની દયનીય હાલત અહીના હજારો રહેવાસીઓ માટે દૈનિક યાતનાનું કારણ બની છે.ખાસ કરીને મહાકાળી માતાજી મંદિર વિસ્તાર અને તેની આસપાસના ફળિયાઓમાં રસ્તાઓ પર પડેલા અસંખ્ય નાના-મોટા ખાડાઓએ વાહનચાલકો અને રાહદારીઓનું જીવન જોખમમાં મૂકી દીધું છે.આ માર્ગો હવે અકસ્માતજનક બની ગયા છે, જ્યાં દરરોજ કોઈને કોઈ નાના-મોટા અકસ્માતો સર્જાય છે.ચોમાસાની ચાલુ સિઝનમાં આ સમસ્યા વધુ વકરી છે. રસ્તાઓ પરના ખાડાઓમાં સતત પાણી ભરાયેલા રહેવાથી મચ્છરોનો ઉપદ્રવ અસહ્ય બન્યો છે.જેના પરિણામે ડેન્ગ્યુ, મેલેરિયા, અને ચિકનગુનિયા જેવી જીવલેણ બીમારીઓ ફેલાવવાનો ભય સ્થાનિકોમાં વ્યાપી ગયો છે.આરોગ્ય નિષ્ણાતો પણ ચેતવણી આપી રહ્યા છે કે આવા ભરાયેલા પાણીના કારણે જળજન્ય રોગોનું પ્રમાણ પણ વધી શકે છે.આ રસ્તાઓ પરથી દૈનિક ધોરણે લોકોની અવરજવર રહે છે, જેમાં શાળાએ જતા નાના બાળકોથી લઈને વૃદ્ધો સુધીના લોકો સામેલ છે. દરરોજ કોઈને કોઈ ખાડામાં ભરાયેલા પાણીને કારણે પડી જવાની ઘટના બને છે,જેનાથી ગંભીર ઈજાઓ પણ થાય છે.આ ભયાવહ પરિસ્થિતિ અંગે સ્થાનિક લોકો દ્વારા વઘઈ ગ્રામ પંચાયત અને સંબંધિત વિભાગોને અનેકવાર લેખિત અને મૌખિક રજૂઆતો કરવામાં આવી છે.
જોકે, આશ્ચર્યજનક રીતે, અત્યાર સુધી કોઈ પણ અસરકારક પગલું લેવામાં આવ્યું નથી.સ્થાનિકોમાં આ બાબતે ભારે રોષ અને આક્રોશ જોવા મળી રહ્યો છે.તેઓ અનુભવી રહ્યા છે કે તેમની દૈનિક સમસ્યાઓને વહીવટી તંત્ર દ્વારા અવગણવામાં આવી રહી છે.વઘઈ ગ્રામ પંચાયતની આ નિષ્ક્રિયતા સામે લોકોમાં ઉગ્ર અસંતોષ પ્રવર્તી રહ્યો છે. સ્થાનિકોની એકમાત્ર માંગ છે કે, ગ્રામ પંચાયત દ્વારા તાત્કાલિક ધોરણે કાર્યવાહી કરવામાં આવે અને આશાનગરના રસ્તાઓ પરના ખાડાઓનું વહેલી તકે પુરાણ કરવામાં આવે તથા રસ્તાઓનું સમારકામ કરવામાં આવે તે જરૂરી બન્યું છે..
