“સ્વચ્છતા હી સેવા” અંતર્ગત અરડોઈ ખાતે લોકનાટક થકી સ્વચ્છતાનો સંદેશ અપાયો

તા.૧૨/૧૦/૨૦૨૩

વાત્સલ્યમ્ સમાચાર

અમુ સિંગલ જેતપુર

પ્રાદેશિક માહિતી કચેરી રાજકોટના માર્ગદર્શન હેઠળ સંસ્કાર કલા કેન્દ્રના ૧૦ જેટલા કલાકારોએ રજુ કર્યું

Rajkot: પ્રાદેશિક માહિતી કચેરી રાજકોટના માર્ગદર્શન હેઠળ જિલ્લાના કોટડાસાંગાણી તાલુકાના અરડોઈ ગામે સંસ્કાર કલા કેન્દ્રના નાટક ગ્રુપના દસ કલાકારોએ નાટકની કૃતિ થકી સ્વચ્છતાનો સંદેશ આપ્યો હતો. ‘ગામડાની ગોરી’ લોકનાટક દ્વારા રમુજી અને રસપ્રદ શૈલીમાં કલાકારોએ ભીના અને સુકા કચરાનો યોગ્ય નિકાલ, શૌચાલયનું મહત્વ, જળસંચયના સ્થાનો સ્વચ્છ રાખવા સહિતના સંદેશો સુંદર રીતે નાટકમાં વણી લીધા હતા. ઉપરાંત, ભીના કચરાનો યોગ્ય નિકાલ ન કરવામાં આવે કે ખુલ્લામાં શૌચક્રિયા કરવાથી જીવજંતુ તેમજ રોગચાળો ફેલાય છે અને આપણા ગામને નિરોગી રાખવું એ આપણી સૌની જવાબદારી છે, તેમ સમજાવવામાં આવ્યું હતું. આ નાટકમાં ગ્રામ્ય-શહેરીજનોનું જીવન, શિક્ષણનું મહત્વ વગેરે બાબતો આવરીને આકર્ષક સંવાદ સાથે મનોરંજન પણ પીરસવામાં આવ્યું હતું. આ નાટકનો ગામના તેમજ આસપાસના ગામોના બાળકો, વૃદ્ધો, સ્ત્રીઓ તેમજ યુવાનોએ લાભ લીધો હતો. ગામના પ્રબુદ્ધ નાગરિકો અને આગેવાનોએ જણાવ્યું હતું કે, આ નાટક દ્વારા ગામમાં લોકો સ્વચ્છતા અંગે વધુ જાગ્રત બનશે અને ‘સ્વચ્છ અને સુઘડ ગામ’ બનવામાં મદદ મળશે. “સ્વચ્છતા હી સેવા” અભિયાન અંતર્ગત ગામના તમામ ઘરોમાં સ્વચ્છતા જાગૃતિ લાવવા માટે રાજ્ય સરકાર દ્વારા પુરસ્કૃત આવા કાર્યક્રમો પ્રશંસાને પાત્ર છે.

નોંધનીય છે કે, પરંપરાગત માધ્યમો થકી ગ્રામ્ય સંસ્કૃતિ, લોકકલા અને સાહિત્યને આગળ ધપાવતાં લોક-ડાયરા, પપેટ શો અને નાટકોનું આયોજન કરીને રાજ્ય સરકારના માહિતી અને પ્રસારણ વિભાગે આ કલાને જીવંત રાખી છે. આ કાર્યક્રમોમાં કલાકારો મનોરંજન સાથે માહિતીના અભિગમ થકી રાજ્ય સરકારની વિવિધ પ્રજાકલ્યાણલક્ષી યોજનાઓ અને વિકાસ કાર્યક્રમોની જાણકારી તેમજ સામાજિક પ્રગતિના સંદેશાઓ ગામેગામ પહોંચાડવામાં આવે છે. રાજ્ય સરકાર દ્વારા આ કાર્યક્રમોના આયોજનો થકી કલાકારોને તેમની કલા રજુ કરવાનું પ્લેટફોર્મ મળી રહે છે અને તેમને નિયત પુરસ્કાર રકમ પણ આપવામાં આવે છે.