ગુજરાતી ફિલ્મ ઉદ્યોગ માટે આજનો દિવસ ઐતિહાસિક ગણાય, કારણ કે ભક્તિમય કથાવસ્તુ ધરાવતી સુપરહિટ ફિલ્મ ‘લાલો – કૃષ્ણ સદા સહાયતે’ એ એવું સિદ્ધ કર્યું છે, જેનો અંદાજ પણ ઇન્ડસ્ટ્રીમાં બહુ ઓછા લોકોએ લગાવ્યો હશે. આ ફિલ્મે વૈશ્વિક સ્તરે 100 કરોડ રૂપિયાનું ગ્રોસ કલેક્શન કરીને એક અનોખો રેકોર્ડ બનાવ્યો છે અને ગુજરાતી સિનેમાને નવી ઊંચાઈઓએ પહોંચાડ્યું છે.
દર્શકોના ભારે પ્રેમ, સંભળામણ અને જબરદસ્ત ‘માઉથ પબ્લિસિટી’ ના કારણે ‘લાલો’ માત્ર ફિલ્મ નહીં, પરંતુ એક સાંસ્કૃતિક આંદોલન બની ગઈ છે. sacnilk ના આંકડાઓ મુજબ, ફિલ્મે રિલીઝના 50 દિવસો બાદ ભારતમાં જ 94.6 કરોડ રૂપિયાની કમાણી કરી છે. આ કમાણી સાથે તે અત્યાર સુધીની સૌથી વધુ કમાણી કરનારી ગુજરાતી ફિલ્મ બની ગઈ છે. તાજેતરમાં ફિલ્મ આંતરરાષ્ટ્રીય બજારોમાં રિલીઝ થતાં ઓવરસીઝ કલેક્શનમાંથી 5.90 કરોડનો ઉમેરો થયો અને કુલ કલેક્શન 100.5 કરોડ સુધી પહોંચી ગયું. આ રીતે ‘લાલો’ 100 કરોડનો આંકડો પાર કરનારી પ્રથમ ગુજરાતી ફિલ્મ તરીકે ઇતિહાસ રચી ચૂકી છે.
ગુજરાતી ફિલ્મોના મર્યાદિત બજારને ધ્યાનમાં લેતાં આ સફળતા અત્યંત વિશેષ છે. સાતમા અઠવાડિયામાં પણ તેની લોકપ્રિયતા યથાવત છે અને કૌટુંબિક તેમજ ભક્તિવાળી ભાવનાઓ ધરાવતા દર્શકોને થિયેટરો સુધી ખેંચી લાવે છે. આ સિદ્ધિએ માત્ર બોક્સ ઓફિસના નવા માપદંડો જ સ્થાપ્યા નથી, પરંતુ ગુજરાતી સિનેમાની વૈશ્વિક ક્ષમતા, તેની પહોંચ અને નવી દિશાઓને પણ ઉજાગર કરી છે.
ફિલ્મ ‘લાલો’નું દિગ્દર્શન અંકિત સખિયાએ કર્યું છે, જ્યારે તેને આરડી બ્રધર્સ મૂવીઝ, મેનિફેસ્ટ ફિલ્મ્સ અને સોલ સૂત્ર દ્વારા નિર્મિત કરવામાં આવી છે. કરણ જોશી, રીવા રાચ્છ, શ્રુહદ ગોસ્વામી, અંશુ જોશી અને કિન્નલ નાયક જેવા કલાકારોએ પોતાના અભિનયથી દર્શકોના દિલ જીતી લીધા છે. તેમની પ્રભાવશાળી ભૂમિકાઓ ફિલ્મની સફળતામાં મહત્વપૂર્ણ સાબિત થઈ છે.
