🏆 મુંદરામાં ‘ઓપન ગુજરાત ચેસ ટુર્નામેન્ટ – સીઝન 10’નું ભવ્ય આયોજન: 135 સ્પર્ધકોએ બનાવ્યો નવો રેકોર્ડ!

POOJA THACKER24 hours agoLast Updated: November 24, 2025

14 1 minute read

રિપોર્ટ : પુજા ઠક્કર, મુંદરા – કચ્છ.

🏆 મુંદરામાં ‘ઓપન ગુજરાત ચેસ ટુર્નામેન્ટ – સીઝન 10’નું ભવ્ય આયોજન: 135 સ્પર્ધકોએ બનાવ્યો નવો રેકોર્ડ!

રતાડીયા,તા.24: ચેકમેટ સ્પોર્ટ્સ એકેડમી દ્વારા તાજેતરમાં મુંદરાના રોટરી હોલ ખાતે ‘ઓપન ગુજરાત ચેસ ટુર્નામેન્ટ – સીઝન 10’નું સફળતાપૂર્વક આયોજન કરવામાં આવ્યું હતું. આ પ્રતિષ્ઠિત ટુર્નામેન્ટમાં ભાવનગર, જૂનાગઢ અને કચ્છના વિવિધ શહેરો જેવા કે મુન્દ્રા, ભુજ, ગાંધીધામ, માંડવી અને અંજાર સહિત સમગ્ર ગુજરાતમાંથી કુલ 135 ખેલાડીઓએ ઉત્સાહભેર ભાગ લીધો હતો, જે મુંદરાના ચેસ ઇતિહાસમાં સૌથી વધુ સ્પર્ધકોનો નવો વિક્રમ નોંધાયો છે. આ ટુર્નામેન્ટ અંડર–11, અંડર–15 અને ઓપન એમ ત્રણ કેટેગરીમાં યોજાઈ હતી, જેમાં તમામ સ્પર્ધકો માટે જમવાની ઉત્તમ વ્યવસ્થા કરવામાં આવી હતી. આ સીઝનની વિશેષતા એ રહી કે કચ્છમાં પ્રથમ વખત દરેક ભાગ લેનાર સ્પર્ધકને ટ્રોફી આપીને સન્માનિત કરવામાં આવ્યા હતા. ટુર્નામેન્ટનું ઉદ્ઘાટન અરિહંત ગ્રુપના અશ્વિનભાઈ મહેતા અને તેજભાઈ મહેતા, ઓલકાર્ગો ટર્મિનલ્સના વિનય વોરિયા, તેમજ સરસ્વતી વિદ્યા મંદિરના પ્રકાશભાઈ પાટીદાર દ્વારા શતરંજની પ્રથમ ચાલ ચાલીને કરવામાં આવ્યું હતું.

સખત સ્પર્ધા બાદ વિજેતાઓમાં અંડર–11 કેટેગરીમાં હિતાંશ રાયસોની, અંડર–15માં યશ્વી શાહ અને ઓપન કેટેગરીમાં નીલ નાનકાની વિજેતા બન્યા હતા. ખાસ કરીને માત્ર 9 વર્ષના યજ્ઞેશ ગુગળીએ ઓપન કેટેગરીમાં રમીને બીજું સ્થાન પ્રાપ્ત કર્યું જે સૌ માટે પ્રેરણાદાયી ક્ષણ રહી હતી. વિજેતા ખેલાડીઓને નીરજભાઈ મહેતા, મોસમીબેન મહેતા, જ્યોત મહેતા, ભવદીપભાઈ મહેતા, ભાવેશભાઈ પટેલ અને ગતિકૃષ્ણ સુતારના હસ્તે ટ્રોફી અને રોકડ પુરસ્કાર આપીને સન્માનિત કરવામાં આવ્યા હતા. આયોજકો ધીરેન ચુડાસમા અને વૈશાલી ચુડાસમાએ તેમજ નિર્ણાયકો મહેશ મટાણિ, ચિરાગ રાવલ, વિનેશ શેરાજી અને હર્ષ રૂપારેલની ટીમે આયોજનને સફળ બનાવ્યું. મુખ્ય સ્પોન્સર્સ અરિહંત ગ્રુપ (મુંદરા), કાર્ગોકોર્પ લોજિસ્ટિક્સ, ઈ–કયૂબ અને કાર કલાઉડ, તેમજ કો-સ્પોન્સર્સ ઓલકાર્ગો ટર્મિનલ્સ અને રોટરી ક્લબ ઓફ મુંદરાના સહયોગ બદલ ચેકમેટ સ્પોર્ટ્સ એકેડમીએ હૃદયપૂર્વક આભાર વ્યક્ત કર્યો હતો. આ ભવ્ય સફળતાને જોતા ખેલાડીઓ અને વાલીઓએ હવે આગામી સીઝન 11 અંગે ઉત્સાહભેર પૂછપરછ કરી અને તેની તારીખોની આતુરતાપૂર્વક રાહ જોતા હોવાનો પ્રતિભાવ આપ્યો હતો.