🚨 TET-1 પરીક્ષા ફી ભરવાની છેલ્લી તક, મુદતમાં વધારો: કચ્છમાં કેન્દ્ર ફાળવવા મુખ્યમંત્રીને અરજ 🚨

વાત્સલ્યમ્ સમાચાર,

રિપોર્ટ : પુજા ઠક્કર, મુંદરા – કચ્છ.

🚨 TET-1 પરીક્ષા ફી ભરવાની છેલ્લી તક, મુદતમાં વધારો: કચ્છમાં કેન્દ્ર ફાળવવા મુખ્યમંત્રીને અરજ 🚨

રતાડીયા,તા.4: ગુજરાત રાજ્ય પરીક્ષા બોર્ડ દ્વારા શિક્ષક યોગ્યતા કસોટી (ટેટ-૧) માટે ઓનલાઈન ફોર્મ ભરવાની અને પરીક્ષા ફી ભરવાની મુદત લંબાવીને છેલ્લી તક આપવામાં આવી છે. તાજેતરના નોટિફિકેશન મુજબ જે ઉમેદવારોએ ફોર્મ ભરી દીધું છે અને માત્ર ફી ભરવાની બાકી છે તેઓ હવે ૦૫/૧૨/૨૦૨૫ ના રાતના ૧૨:૦૦ કલાક સુધી ઓનલાઇન ફી ભરી શકશે. આ ફી ભરવાની ઉમેદવારો માટેની છેલ્લી તક છે.

જોકે કચ્છ જિલ્લાના ઉમેદવારોમાં એક મોટો પ્રશ્ન અને તીવ્ર અસંતોષ પ્રવર્તી રહ્યો છે. કચ્છના વિદ્યાર્થીઓ અને લોકો દ્વારા વારંવાર માંગણી કરવા છતાં હજુ સુધી ટેટ-૧ ની પરીક્ષા માટે કચ્છમાં કોઈ પરીક્ષા કેન્દ્રની સત્તાવાર જાહેરાત કરવામાં આવી નથી. પરિણામે કચ્છી ઉમેદવારોને પરીક્ષા આપવા માટે ૩૦૦-૪૦૦ કિલોમીટર દૂર અન્ય જિલ્લાઓમાં જવું પડે તેમ છે. આ લાંબા અંતર અને મુસાફરીના બોજને કારણે ઘણા વિદ્યાર્થીઓએ ફોર્મ ભર્યા હોવા છતાં પરીક્ષા કેન્દ્રની અનિશ્ચિતતાને લીધે હજુ સુધી ફી ભરી નથી.

આ સંજોગોમાં હાલમાં કચ્છમાં મુખ્યમંત્રી શ્રીનો પ્રવાસ ચાલી રહ્યો છે અને રાજ્યના શિક્ષણ મંત્રી પણ કચ્છના જ છે ત્યારે કચ્છના ઉમેદવારોની લાગણી અને અન્યાયને ધ્યાનમાં રાખીને તાત્કાલિક ધોરણે કચ્છને ટેટ-૧ પરીક્ષા કેન્દ્ર ફાળવવામાં આવે તેવી કચ્છી લોકોની પ્રબળ અને ન્યાયી માંગણી છે. શિક્ષણના અધિકાર અને સુગમતા માટે આ નિર્ણય લેવો અત્યંત જરૂરી છે.

વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો : 

-પુજા ઠક્કર, 

9426244508, 

ptindia112@gmail.com

Sorry, there was a YouTube error.