ડાંગ જિલ્લામાં મૂશળધાર વરસાદ પડતાં 23 કોઝવેકમ પુલો પાણીમાં ગરક થતાં 40 ગામો સંપર્ક વિહોણા બન્યા..
*ડાંગ જિલ્લાનાં આહવા તાલુકાનાં ગાઢવી રોડનાં પીપલ્યામાળ નજીક પિકઅપ ગાડી નાળામાં ખાબકી,જ્યારે વરસાદી માહોલમાં સાપુતારા ઘાટમાર્ગમાં ટ્રક ખોટકાતા પ્રવાસી વાહનોની લાંબી કતારો જામવાની સાથે ટ્રાફિક જામની સ્થિતિ સર્જાઈ..*
વાત્સલ્યમ સમાચાર
મદન વૈષ્ણવ-ડાંગ
*ડાંગ જિલ્લાનાં આહવા તાલુકાનાં ગાઢવી રોડનાં પીપલ્યામાળ નજીક પિકઅપ ગાડી નાળામાં ખાબકી,જ્યારે વરસાદી માહોલમાં સાપુતારા ઘાટમાર્ગમાં ટ્રક ખોટકાતા પ્રવાસી વાહનોની લાંબી કતારો જામવાની સાથે ટ્રાફિક જામની સ્થિતિ સર્જાઈ..*
રાજ્યનાં છેવાડે આવેલ ડાંગ જિલ્લાનાં ગામડાઓમાં શનિવારનાં રોજથી વરસાદી માહોલ જામ્યો છે.શનિવારથી ડાંગ જિલ્લામાં અનરાધાર વરસાદી માહોલ જામતા નદીઓ ભયજનક સપાટી વટાવીને વહેતી જોવા મળી રહી છે.રવિવારે ડાંગ જિલ્લાનાં ગિરિમથક સાપુતારા, શામગહાન,માંળુગા, સાકરપાતળ,વઘઇ, ઝાવડા,ભેંસકાતરી,કાલીબેલ,બરડીપાડા,મહાલ,સિંગાણા, સુબિર, લવચાલી, ચીંચલી, આહવા,બોરખલ, ગલકુંડ, ગારખડી,પીપલાઈદેવી,પીપલદહાડ સહીત પૂર્વપટ્ટી અને સરહદીય પંથકોમાં દિવસ દરમ્યાન સાંબેલાદાર વરસાદ પડતા સર્વત્ર પાણીની રેલમછેલ ફરી વળી હતી.ડાંગ જિલ્લાનાં ગામડાઓમાં શનિવારથી પડી રહેલા અનરાધાર વરસાદનાં પગલે જિલ્લાની લોકમાતાઓમાં અંબિકા,ખાપરી,પૂર્ણા અને ગીરા નદીઓ રોદ્ર સ્વરૂપમાં વહી રહી છે.ડાંગની ચારેય નદીઓ અધધ પ્રવાહની સાથે ગાંડીતુર બનતા નદી કાંઠેનાં ખેતરોમાં રોપેલ ડાંગરનો પાક ઘસડાઈ જવા પામ્યો હતો.ડાંગ જિલ્લામાં ધોધમાર વરસાદનાં પગલે વઘઇનો ગીરાધોધ,ગિરમાળનો ગીરાધોધ,શિવઘાટ ધોધ,ભેગુ ધોધ સહીત નાના મોટા જળધોધ અખૂટ પાણીનાં જથ્થા સાથે રમણીય બન્યા હતા.ડાંગ જિલ્લામાં છેલ્લા બે દિવસથી વરસાદી માહોલ જામતા નદીઓ તથા કોતરોને સાંકળતા 23 જેટલા કોઝવેકમ પુલો ઊંડા પાણીમાં ગરક થઈ જતા 40 થી વધુ ગામડાઓનું પશુપાલન,જનજીવન પ્રભાવિત બની સંપર્કવિહોણા બન્યા હતા.ડાંગ જિલ્લામાં અનરાધાર વરસાદને કારણે કોઝ વે અને સ્લેબ ડ્રેઈન ઓવર ટોપીક થતા 23 જેટલા ગ્રામ્ય માર્ગો અને 1 રાજ્યધોરી માર્ગ અવરોધાયો હતો.ડાંગ જિલ્લા પંચાયત હસ્તકના 23 જેટલા ગ્રામ્ય માર્ગો, વરસાદી પાણીને લઈ, અવરોધાયા છે. જેમાં સુબિર તાલુકાના (1) હિંદળાથી ધુડા રોડ, અને (2) કાકડવિહીરથી ખેંરિન્દ્રા-ચમારપાડા રોડ, સહિત આહવા તાલુકાના (1) ચિકટીયા-ગાઠવી રોડ, (2) રાનપાડા-ભાપખલ-બારીપાડા રોડ, (3) ભવાનદગડ-ધુલચોંડ-આમસરવલણ રોડ, (4) ભૂરાપાણી-બારીપાડા-ચિરાપાડા રોડ, (5) બોરખલ-ગાયખાસ-ચવડવેલ રોડ-1, (6) બોરખલ-ગાયખાસ-ચવડવેલ રોડ-2, તથા વઘઇ તાલુકાના (1) ખાતળ ફાટકથી ઘોડી રોડ, (2) માછળી-ચિખલા-દિવડ્યાવન રોડ-1, (3) માછળી-ચિખલા-દિવડ્યાવન રોડ-૨, (4) વાઝટઆંબા-કોયલીપાડા રોડ, (5) ઘોડવહળ વી.એ.રોડ, (6) આહેરડી-બોરદહાડ રોડ, (7) ચીખલદા વી.એ.રોડ, (8) સુસરદા વી.એ.રોડ, (9) માનમોડી-બોડારમાળ-નિબારપાડા રોડ, (10) આંબાપાડા વી.એ.રોડ, (11) કાલીબેલ-પાંઢરમાળ-વાંકન રોડ, (12) ધાગડી-કાનત ફળીયા રોડ, (13) ભદરપાડા-ચિચોન્ડ રોડ,(14) દગુનિયા વી.એ. રોડ-1, (15) દગુનિયા વી.એ. રોડ-2, તેમજ માર્ગ અને મકાન વિભાગ હસ્તકનો વઘઈ તાલુકાનો બારીપાડા-માનમોડી-સુરગાણા રોડ મળી જિલ્લામાં કુલ 24 રોડ, ક્યાંક કોઝ વે ઓવર ટોપિંગ થવાથી, તો ક્યાંક સ્લેબ ડ્રેઇન ઓવર ટોપિંગ થવાને કારણે અવરોધાયા છે.જયારે મહાલ-બરડીપાડા નેશનલ હાઈ વે નં.953 કે જે સવારે રોડ વચ્ચે પાણી અને કાદવ કીચડ ભરાઈ જવાથી બંધ થવા પામ્યો હતો,જે જિલ્લા કલેક્ટર મહેશ પટેલનાં માર્ગદર્શન અને આદેશ અનુસાર તાકીદની કામગીરી હાથ ધરાતા,આ રોડ વાહનવ્યવહાર માટે પુનઃ ચાલુ કરવાની પ્રક્રિયા હાથ ધરવામાં આવી હતી. જે સાંજના સમયે યાતાયાત માટે ખુલ્લો કરાયો છે. જ્યારે ભારે વરસાદથી મહાલ રોડ ઉપર પાણી ભરાઈ જવાથી પ્રવાસન સ્થળ તરીકે પ્રખ્યાત મહાલ ઇકો કેમ્પ સાઈડ બંધ કરવામાં આવી હતી.
બોક્ષ-(1)…..ડાંગ જિલ્લાનાં આહવા તાલુકાનાં ગાઢવી રોડ પર પીપલ્યામાળ નજીક પીકઅપ ગાડી.ન.જી.જે.15.એ.ટી.8319 જેના ચાલકે સ્ટેયરીંગ પરનો કાબૂ ગુમાવી દેતા અહી પિકઅપ ગાડી માર્ગની સાઈડનાં નાળામાં ખાબકી પલ્ટી મારી ગઈ હતી. જે બનાવમાં ચાલકનો ચમત્કારિક બચાવ થયેલ હોવાની વિગતો સાંપડેલ છે.
બોક્ષ:-(2)…..સાપુતારાથી શામગહાનને જોડતા રાષ્ટ્રીય ધોરીમાર્ગમાં ટ્રક ખોટકાતા ટ્રાફિક જામની સ્થિતિ વણસી હતી.ગિરિમથક સાપુતારા ખાતે જન્માષ્ટમીની રજાઓને લઈને મોટી સંખ્યામાં પ્રવાસીઓ ઉમટી રહ્યા છે.તેવામાં રવિવારે અનરાધાર વરસાદમાં પણ મોટી સંખ્યામાં પ્રવાસીઓ નાના મોટા વાહનો સાથે સાપુતારા ખાતે ઉમટી પડતા ઠેરઠેર બખા થઈ જવા પામ્યા હતા.જેમાં સાપુતારાથી શામગહાનને જોડતા રાષ્ટ્રીય ધોરીમાર્ગનાં સાપુતારા ઘાટમાર્ગમાં માલવાહક ટ્રક માર્ગની સાઈડમાં ઉતરી જઈ ખોટકાઈ જતા નાના મોટા વાહનોની લાંબી કતારો જામવાની સાથે ટ્રાફિક જામની સ્થિતિ વણસી હતી.ટ્રાફિક જામની સ્થિતિમાં સાપુતારા ઘાટમાર્ગમાં એક તરફ અનરાધાર વરસાદનાં પગલે ભેખડો ધસી પડવાનાં ભય વચ્ચે વાહનચાલકો ચિંતામાં મુકાયા હતા.પરંતુ સાપુતારા પી.આઈ.એન.ઝેડ.ભોયાની ટીમે ભારે જહેમત બાદ ટ્રાફિક પૂર્વરત કરતા પ્રવાસીઓએ હાશકારો અનુભવ્યો હતો.ગિરિમથક સાપુતારા સતત બીજા દિવસે હાઉસફુલનાં પાટીયાથી ઝૂલી ઉઠ્યુ હતુ. સાપુતારા ખાતે પ્રવાસીઓનું ઘોડાપુર ઉમટી પડતા સ્વાગત સર્કલ,બોટિંગ,ટેબલ પોઈંટનાં માર્ગે સમયાંતરે ટ્રાફિક જામની સ્થિતિ વણસી હતી.જોકે સાપુતારા પોલીસની ટીમે આ ટ્રાફિકને હળવી કરી તમામ માર્ગો ખુલ્લા કર્યા હતા.ડાંગ જિલ્લા ડિઝાસ્ટર વિભાગનાં જણાવ્યા અનુસાર છેલ્લા 24 કલાક દરમ્યાન સુબિર પંથકમાં 188 મિમી અર્થાત 7.52 ઈંચ, સાપુતારા પંથકમાં 211 મિમી અર્થાત 8.44 ઈંચ,વઘઇ પંથકમાં 247 મિમી અર્થાત 9.88 ઈંચ જ્યારે સૌથી વધુ આહવા પંથકમાં 251 મિમી અર્થાત 10.04 ઈંચ જેટલો વરસાદ નોંધાયો..
