નવસારીના જલાલપોર રામદેવજી મંદિર ખાતે યોજાયેલ આયુષ મેળામાં ૫૮૭ દર્દીઓએ સારવાર કેમ્પનો લાભ લીધો..
વાત્સલ્યમ સમાચાર
મદન વૈષ્ણવ 
નવસારી, તા.૨૭: આરોગ્ય અને પરિવાર કલ્યાણ વિભાગ, નિયામકશ્રી આયુષ કચેરી ગાંધીનગરની પ્રેરણાથી જિલ્લા આયુર્વેદ અધિકારી વૈધ.કાજલબેન મઢીકરના માર્ગદર્શન હેઠળ રામદેવજી મંદિર, ગૌરીશંકર મહોલ્લા,તા જલાલપોર ખાતે આયુર્વેદ શાખા નવસારી દ્વારા આયુષ મેળાનું આયોજન કરવામાં આવ્યું હતું.
જિલ્લા આયુર્વેદ અધિકારી વૈદ્ય કાજલબેન મઢીકર દ્વારા આયુષ મેળા અને આયુષ શાખાની કામગીરી વિશે વિસ્તૃત માહિતી આપવામાં આવી હતી. તેમજ સાંપ્રત સમયમાં લોકો આયુર્વેદ ચિકિત્સા પદ્ધતિનો વધુમાં વધુ લાભ લે તેમ જણાવી સ્વદેશી વસ્તુઓનો ઉપયોગ વધે તેવી અપીલ કરી હતી.
આયુષ મેળામાં કુલ ૫૮૭ લાભાર્થીઓએ આયુર્વેદ અને હોમિયોપેથી પદ્ધતિ દ્વારા તમામ રોગોનું નિદાન- સારવાર કેમ્પનો લાભ લીધો હતો.આ સાથે દિનચર્યા, ઋતુચર્યા, યોગ નિદર્શન તેમજ જરૂરી યોગ માર્ગદર્શન, પ્રકૃતિ પરિક્ષણ, જીરિયાટ્રીક ઓપીડી, રોગોથી બચવા માટે આયુર્વેદ હોમિયોપેથિક દવા વિતરણ, ઔષધીય વનસ્પતિનું પ્રદશન પણ કરવામાં આવ્યું હતું. આયુષ મેળામાં આયુષ્માન આરોગ્ય મંદિરના યોગ ઈન્સ્ટ્રકટર દ્વારા યોગાસનોનુ પ્રદર્શન કરવામા આવ્યુ હતું.
આયુષ મેળામાં વૈદ્ય ખ્યાતિબેન પટેલ મેડિકલ ઓફિસર તવડી, બળવંતભાઈ હળપતિ, તૃપ્તિબેન પટેલ, પોલીસ ઇન્સ્પેક્ટર જલાલપોર લાડુમોર, રામદેવજી મંદિર ટ્રસ્ટના રમેશભાઈ રૂડાણી, પરસોત્તમભાઈ કાનાણી, નવસારી જિલ્લાના યોગ કો ઓર્ડીનેટર, કેસરબા વિદ્યાલયના શિક્ષક શ્રીમતી વર્ષાબેન પટેલ,જલાલપોર તાલુકાના ICDS વિભાગ, તેમજ કર્મચારી શ્રી ઉપસ્થિત રહ્યા હતા.
