થરાદ સિવિલ હોસ્પિટલ ખાતે નિઃશુલ્ક કેન્સર નિદાન કેમ્પ યોજાયો
જિલ્લા કલેક્ટર દ્વારા આકસ્મિક મુલાકાત, સુવિધાઓનું નિરીક્ષણ
વાત્સલ્યમ સમાચાર પ્રવિણભાઇ ચૌહાણ વાવ થરાદ
ગુજરાત સરકારના આરોગ્ય વિભાગ અને ગુજરાત કેન્સર એન્ડ રિસર્ચ ઇન્સ્ટિટ્યૂટ (G.C.R.I.), અમદાવાદના સંયુક્ત ઉપક્રમે આજે થરાદની સિવિલ હોસ્પિટલ ખાતે નિઃશુલ્ક કેન્સર સ્ક્રીનિંગ કેમ્પનું આયોજન કરવામાં આવ્યું હતું. આ કેમ્પમાં થરાદ તેમજ વાવ તાલુકાના છેવાડાના ગ્રામ્ય વિસ્તારોમાંથી મોટી સંખ્યામાં દર્દીઓએ લાભ લીધો હતો.
કેમ્પ દરમિયાન G.C.R.I.ના નિષ્ણાત ડોક્ટરોની ટીમ દ્વારા મોઢાનું કેન્સર, સ્તન કેન્સર તેમજ ગર્ભાશયના કેન્સર જેવી ગંભીર બીમારીઓનું ઝીણવટભર્યું નિદાન કરવામાં આવ્યું હતું. દર્દીઓની સંપૂર્ણ તપાસ સાથે જરૂરી માર્ગદર્શન અને આગળની સારવાર અંગે સલાહ પણ આપવામાં આવી હતી.
આ પ્રસંગે બનાસકાંઠા જિલ્લાના કલેક્ટર શ્રી દ્વારા થરાદ સિવિલ હોસ્પિટલની આકસ્મિક મુલાકાત લેવામાં આવી હતી. તેમણે કેમ્પની વ્યવસ્થાઓનું નિરીક્ષણ કર્યું હતું તેમજ સારવાર લઈ રહેલા દર્દીઓના હાલચાલ પૂછ્યા હતા. સાથે સાથે હોસ્પિટલના વિવિધ વિભાગોની મુલાકાત લઈ સ્વચ્છતા, દવાઓની ઉપલબ્ધતા અને આરોગ્ય સેવાઓ અંગે જરૂરી સૂચનાઓ આપી હતી.
કેમ્પને લઈને સ્થાનિક લોકોમાં ભારે ઉત્સાહ જોવા મળ્યો હતો. ગ્રામ્ય વિસ્તારોના ગરીબ અને જરૂરિયાતમંદ દર્દીઓને ઘરઆંગણે અમદાવાદ જેવી વિશેષજ્ઞ સારવાર મળતા સમય અને ખર્ચની મોટી બચત થતાં સ્થાનિક અગ્રણીઓએ આ પહેલને બિરદાવેલી હતી.
હોસ્પિટલ પ્રશાસન દ્વારા જણાવવામાં આવ્યું હતું કે, “વહેલું નિદાન એ જ કેન્સરની સાચી સારવાર છે. આવા કેમ્પોના માધ્યમથી જનજાગૃતિ ફેલાવવી અને જરૂરિયાતમંદોને વિનામૂલ્યે આરોગ્ય સેવા પૂરી પાડવી એ અમારું મુખ્ય લક્ષ્ય છે.”
