વાત્સલ્યમ્ સમાચાર,
પૂજા ઠક્કર – મુંદરા કચ્છ.
મુંદરાના લુણંગધામ ખાતે ભવ્ય લોકમેળો યોજાયો: શ્રદ્ધા અને સંસ્કૃતિનો ત્રિવેણી સંગમ રચાયો
મુંદરા (કચ્છ), તા. 22:
મુંદરા તાલુકાના લુણી ગામ સ્થિત મહેશ્વરી સમાજના ઇષ્ટદેવ અને ગણેશ અવતાર ગણાતા પૂજ્ય લુણંગદાદાના સાનિધ્યમાં તા. ૨૧ અને ૨૨ માર્ચના રોજ વાર્ષિક યાત્રા તથા ભવ્ય મેળાનું આયોજન કરવામાં આવ્યું હતું. ચૈત્ર સુદ ત્રીજના પવિત્ર અવસરે યોજાયેલા આ મેળામાં કચ્છ, સૌરાષ્ટ્ર સહિતના વિવિધ પ્રાંતોમાંથી ભાવિકો દાદાના દર્શનાર્થે ઉમટી પડ્યા હતા.
ધાર્મિક અને સાંસ્કૃતિક કાર્યક્રમોની રેલમછેલ :
મેળાના પ્રારંભે રાત્રે ૮:૩૦ કલાકે તેજસ્વી તારલાઓનો સન્માન સમારોહ, દાતા સન્માન અને જ્ઞાનકંથન જેવા પ્રેરણાદાયી કાર્યક્રમો યોજાયા હતા. પરંપરા મુજબ નવદંપતીઓએ લુણંગદાદાના ચરણે શીશ ઝુકાવી આશીર્વાદ મેળવ્યા હતા. રવિવારે સવારે ધ્વજારોહણ, કળશ સ્થાપન અને હિંડોળા દર્શન સાથે ધાર્મિક વિધિઓ સંપન્ન થઈ હતી. અખિલ કચ્છ ગણેશ સેવક સાર્વજનિક ટ્રસ્ટ દ્વારા યાત્રાળુઓ માટે ભોજન અને ઉતારાની સુંદર વ્યવસ્થા કરવામાં આવી હતી.
આરોગ્ય અને સુરક્ષા સેવાઓનો સજ્જ ફાળો :
મેળા દરમિયાન જનતાની સુખાકારી માટે વહીવટી તંત્ર અને સંસ્થાઓ દ્વારા સરાહનીય કામગીરી કરવામાં આવી હતી:
* મેડિકલ કેમ્પ: પ્રાથમિક આરોગ્ય કેન્દ્ર ભદ્રેશ્વરના સ્ટાફ દ્વારા મેળાના મેદાનમાં જ હેલ્થ કેમ્પ યોજીને તાત્કાલિક સારવાર પૂરી પાડવામાં આવી હતી.
* ઇમરજન્સી સેવા: કોઈ પણ આકસ્મિક ઘટનાને પહોંચી વળવા ‘૧૦૮’ એમ્બ્યુલન્સની સેવા ૨૪ કલાક તૈનાત રાખવામાં આવી હતી.
* ફાયર સેફ્ટી: અદાણી પોર્ટસ એન્ડ સેઝની ફાયર સર્વિસ દ્વારા મેળામાં અગ્નિશમન દળ સાથે ખાસ સુરક્ષા વ્યવસ્થા જાળવવામાં આવી હતી.
* પોલીસ બંદોબસ્ત: કાયદો અને વ્યવસ્થા જાળવવા પોલીસ વિભાગનો ચુસ્ત બંદોબસ્ત જોવા મળ્યો હતો.
મોંઘવારી કે અન્ય કારણો? મેળામાં જનમેદની ઓછી જણાતા વેપારીઓમાં નિરાશા :
એક તરફ જ્યાં મેળામાં અવનવા ચગડોળ, રમકડાં અને નાસ્તાના સ્ટો સ્ટોલનું આકર્ષણ હતું ત્યાં બીજી તરફ એક નોંધપાત્ર બાબત એ રહી હતી કે વિતેલા વર્ષોની સરખામણીએ આ વખતે માનવ મહેરામણ ઓછું જોવા મળ્યું હતું. જનમેદની ઓછી રહેતા મેળાના નાના વેપારીઓ અને સ્ટોલ ધારકોમાં નિરાશા જોવા મળી હતી. ગ્રાહકોની પાંખી હાજરીને કારણે કેટલાક ધંધાર્થીઓએ મોડી રાત્રે જ પોતાની દુકાનો સંકેલીને વિદાય લીધી હતી.
સમગ્ર આયોજનને સફળ બનાવવા ટ્રસ્ટના પ્રમુખ કિશોરભાઈ પિંગોલ, મહામંત્રી ડો. લાલજીભાઈ ફફલ અને ખજાનચી ખેતશીભાઈ નંજાર સહિતના હોદ્દેદારો અને સ્વયંસેવકોએ જહેમત ઉઠાવી હતી.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
