શહેરામાં રામનવમીના પવિત્ર પર્વે ભગવાન શ્રી રામચંદ્રજીની ભવ્ય શોભાયાત્રા યોજાઈ: ભક્તિમય માહોલમાં ‘જય શ્રી રામ’ના નાદ સાથે નગર ગુંજી ઉઠ્યું
પંચમહાલ ગોધરા
નિલેશભાઈ દરજી શહેરા 
શહેરા: મર્યાદા પુરુષોત્તમ ભગવાન શ્રી રામચંદ્રજીના જન્મોત્સવ ‘રામનવમી’ના પવિત્ર અવસર પર પંચમહાલ જિલ્લાના શહેરા નગરમાં શ્રદ્ધા અને ઉલ્લાસભેર ભવ્ય શોભાયાત્રાનું આયોજન કરવામાં આવ્યું હતું. દેશભરમાં પ્રવર્તતા ઉત્સાહની જેમ જ શહેરાના રામજી મંદિરથી નીકળેલી આ શોભાયાત્રામાં મોટી સંખ્યામાં રામભક્તો ઉમટી પડ્યા હતા. આ શોભાયાત્રા નગરના મુખ્ય માર્ગો જેવા કે મેઈન બજાર, હોળી ચકલા, સિંધી ચોકડી, અણીયાદ ચોકડી અને હાઈવે વિસ્તારમાં ફરી હતી, જ્યાં સમગ્ર માર્ગ ‘જય શ્રી રામ’ના ગગનભેદી જયઘોષથી ગુંજી ઉઠ્યો હતો. સનાતન હિંદુ ધર્મની એકતાના પ્રતીક સમાન આ આયોજનમાં વિવિધ સમાજના યુવાનો, મહિલાઓ અને વડીલોએ મોટી સંખ્યામાં જોડાઈને ભક્તિભાવ પૂર્વક દર્શનનો લાભ લીધો હતો. સમગ્ર ઉત્સવ દરમિયાન શાંતિ અને કાયદો-વ્યવસ્થા જળવાઈ રહે તે માટે શહેરા પોલીસ સ્ટેશનના પી.આઈ. અંકુર ચૌધરીના માર્ગદર્શન હેઠળ ચુસ્ત પોલીસ બંદોબસ્ત ગોઠવવામાં આવ્યો હતો. આમ, શહેરા નગરમાં રામનવમીની ઉજવણી અત્યંત ભવ્ય અને શાંતિપૂર્ણ માહોલમાં સંપન્ન થઈ હતી.
