નવસારી: આજે”૩જી જૂન વિશ્વ સાયકલ દિવસ”આરોગ્ય,પર્યાવરણ અને અર્થતંત્ર,ત્રણેય પાસાઓમા ખૂબ લાભદાયક છે સાયકલ
વાત્સલ્યમ સમાચાર
મદન વૈષ્ણવ
નવસારી,તા.૦૨: દર વર્ષે તારીખ ૩જી જૂનના રોજ સમગ્ર વિશ્વમાં ‘વિશ્વ સાયકલ દિવસ’ (World Bicycle Day) ઉજવવામાં આવે છે. આ દિવસ સંયુક્ત રાષ્ટ્ર સંઘ દ્વારા ૨૦૧૮માં જાહેર કરવામાં આવ્યો હતો. તેનો મુખ્ય ઉદ્દેશ લોકોમાં સાયકલના ઉપયોગ માટે જાગૃતિ લાવવાનો, અને સાયકલના ફાયદાઓ વિશે માહિતી આપવાનો છે.
સાયકલ એ માત્ર યાત્રાનુ સાધન નથી, પરંતુ તે આરોગ્ય, પર્યાવરણ અને અર્થતંત્ર એમ, ત્રણેય પાસાઓમા ખૂબ લાભદાયક છે. સાયકલ ચલાવવાથી શરીર તંદુરસ્ત રહે છે. તે હૃદયરોગ, ડાયાબિટીસ અને સ્થૂળતા જેવી ગંભીર બીમારીઓથી બચાવે છે. રોજિંદા જીવનમા સાયકલ ચલાવવી એ કસરતનો શ્રેષ્ઠ વિકલ્પ છે.
પર્યાવરણની દૃષ્ટિએ પણ સાયકલ ઉત્તમ વાહન છે. તે કોઈ પણ પ્રકારના વાયુ કે ધ્વનિ પ્રદૂષણ ઉત્પન્ન કરતુ નથી. આજના યુગમા વાહનોના ધુમાડાથી થઈ રહેલુ વાયુ પ્રદૂષણ જળવાયુ પરિવર્તનનુ મોટું કારણ બન્યુ છે. આવા સંજોગોમા સાયકલ એક હરિત અને સ્વચ્છ પરિવહન સાધન છે.
સાયકલની સૌથી મોટી ખાસિયત એ છે કે તે તમામ માટે સરળ અને સસ્તુ સાધન છે. તેનાથી ગરીબ અને મધ્યમ વર્ગના લોકો પણ સરળતાથી યાત્રા કરી શકે છે. શહેરોમા પણ ટ્રાફિક અને પાર્કિંગની સમસ્યાને ઓછી કરવા માટે સાયકલ સારો વિકલ્પ બની શકે છે.
વિશ્વ સાયકલ દિવસ નિમિત્તે ઘણી શાળાઓ, સંસ્થાઓ અને સંગઠનો રેલી, ચર્ચા, ક્વિઝ અને વિવિધ પ્રવૃત્તિઓનુ આયોજન કરે છે. વિદ્યાર્થીઓને સાયકલના ફાયદા સમજાવવામા આવે છે, અને સાયકલ ચલાવવા માટે પ્રોત્સાહિત કરવામા આવે છે.
નિષ્કર્ષરૂપે, સાયકલ માત્ર એક વાહન નથી, પરંતુ સ્વસ્થ જીવનશૈલી તરફનુ એક પગથિયુ છે. આપણે સૌએ સાયકલનો ઉપયોગ વધારવો જોઈએ અને પર્યાવરણને બચાવવા અને સ્વસ્થ જીવન જીવવા માટે દૈનિક જીવનમા તેને સ્થાન આપવું જોઈએ.
*સાયકલ ચલાવવુ એ ઘણા પ્રકારે ફાયદાકારક છે. જેમ કે,*
(૧) *શારીરિક આરોગ્ય માટે ફાયદા:* હૃદયસંબંધિત આરોગ્ય સુધારે છે. નિયમિત સાયકલિંગ હૃદયને મજબૂત બનાવે છે, અને હૃદયરોગનો ખતરો ઘટાડે છે. તંદુરસ્ત વજન જાળવે છે. સાયકલ ચલાવવાથી કેલેરી બળે છે, જે વજન ઘટાડવા માટે મદદરૂપ બને છે. માંસપેશીઓ મજબૂત થાય છે. ખાસ કરીને પગ, જાંઘ અને પીઠની પેશીઓ માટે ખૂબ જ લાભદાયક છે. સાયકલ સાંધા અને હાડકા પર રનિંગ કરતા ઓછુ દબાણ લાવે છે. તેથી ઘૂંટણ અને સાંધાના દર્દમા પણ તે ઉપયોગી છે.
(૨) *માનસિક આરોગ્ય માટેના ફાયદા:* દબાણ ઘટાડે છે, શારીરિક પ્રવૃત્તિ માનસિક તણાવ ઘટાડવામા મદદરૂપ બને છે. મૂડ સુધારે છે. એન્ડોર્ફિન (સુખદ હોર્મોન)ની વૃદ્ધિ થાય છે. આત્મવિશ્વાસ વધે છે. નિયમિત કસરતથી આત્મવિશ્વાસ અને આત્મસન્માન વધે છે.
(૩) *પર્યાવરણ માટે ફાયદા:* પ્રદૂષણ ઓછુ થાય છે. સાયકલ ચલાવવાથી ઈંધણનો ઉપયોગ નથી થતો. તેથી વાયુપ્રદૂષણ ઓછુ થાય છે. શહેરી ટ્રાફિકમા રાહત આપે છે. ટ્રાફિક જામ ઓછો થાય છે, અને ટ્રાન્સપોર્ટ વધુ ટકાઉ બને છે.
(૪) *આર્થિક ફાયદા:* પેટ્રોલ-ડીઝલનો ખર્ચ બચાવે છે. વાહનનો મેન્ટેનન્સ ખર્ચ ઘટે છે. પાર્કિંગની મુશ્કેલી ઓછી થાય છે.
(૫) *સામાજિક ફાયદા:* પરિવાર કે મિત્રો સાથે સાયકલ ચલાવવાથી સબંધ મજબૂત થાય છે. સ્થાનિક પરિવેશ સાથે વધુ નજીકથી જોડાણ અનુભવી શકાય છે.
આમ, સાયકલ ચલાવવુ માત્ર એક કસરત નહીં, પણ એક હેલ્ધી અને ટકાઉ જીવનશૈલી તરફનુ પગથિયુ છે.
