સ્થાનિક સ્વરાજની ચૂંટણીઓ માટે આમ આદમી પાર્ટીએ ઉમેદવાર પસંદગી પ્રક્રિયા શરૂ કરી
રિપોર્ટર
હિતેન્દ્ર ગોસાઈ
અમદાવાદ
ગુજરાતમાં આવનારી સ્થાનિક સ્વરાજ સંસ્થાઓની ચૂંટણીઓના પડઘમ વચ્ચે આમ આદમી પાર્ટીએ ઉમેદવાર પસંદગી પ્રક્રિયા શરૂ કરી છે. પાર્ટી દ્વારા રાજ્યભરમાં સંગઠન સ્તરે બેઠકો યોજીને સંભવિત ઉમેદવારોની પસંદગી માટે ચર્ચા અને સ્ક્રુટીની પ્રક્રિયા હાથ ધરવામાં આવી રહી છે. પાર્ટીના જણાવ્યા મુજબ આ સમગ્ર પ્રક્રિયા પારદર્શક અને લોકશાહી પદ્ધતિથી કરવામાં આવી રહી છે.
અમદાવાદ વેસ્ટ વિસ્તારમાં મહાનગરપાલિકા સીટો માટે ઉમેદવાર પસંદગી પ્રક્રિયા યોજાઈ હતી. આ કાર્યક્રમમાં મધ્ય ઝોન અધ્યક્ષ ડૉ જ્વેલ વસરા, જીતુભાઈ ઉપાધ્યાય, પ્રણવ ઠક્કર, આફતાબ ભાઈ, હિરેન ગોહિલ, નીતિન બારોટ, જતીન પટેલ, યાત્રિક પટેલ અને વિપુલ પટેલ સહિતના પદાધિકારીઓ ઉપસ્થિત રહ્યા હતા. બેઠક દરમિયાન સંભવિત ઉમેદવારો સાથે ચર્ચા કરી તેમની કામગીરી, જાહેર જીવનમાં સક્રિયતા અને સ્થાનિક પ્રશ્નોને ઉકેલવાની ક્ષમતાના આધારે પ્રાથમિક મૂલ્યાંકન કરવામાં આવ્યું હતું.
પાર્ટીના નેતાઓએ જણાવ્યું હતું કે સ્થાનિક સ્વરાજની ચૂંટણીઓમાં આમ આદમી પાર્ટી તમામ સીટો પર મજબૂતીથી ચૂંટણી લડવાની તૈયારી કરી રહી છે. ગુજરાતમાં પાર્ટી છેલ્લા કેટલાક વર્ષોથી સંગઠન મજબૂત બનાવવાના પ્રયત્નો કરી રહી છે અને હવે સ્થાનિક સ્તરે પણ વિકલ્પરૂપ રાજકારણ રજૂ કરવાની દિશામાં આગળ વધી રહી છે.
પાર્ટી દ્વારા ઉમેદવાર પસંદગીની પ્રક્રિયા બે તબક્કામાં હાથ ધરવામાં આવી છે. પ્રથમ તબક્કામાં જિલ્લા અને લોકસભા સ્તરે સ્ક્રુટીની પ્રક્રિયા યોજાઈ રહી છે. આ તબક્કો 10 માર્ચથી શરૂ થયો છે અને 15 માર્ચ સુધી વિવિધ જિલ્લાઓ અને વિસ્તારોમાં બેઠકો યોજાશે. આ બેઠકો દરમિયાન ચૂંટણી લડવાની ઇચ્છા ધરાવતા દાવેદારો સાથે સીધી મુલાકાત કરીને તેમની પ્રાથમિક માહિતી અને કાર્યક્ષમતાનું મૂલ્યાંકન કરવામાં આવશે.
પાર્ટી સૂત્રોના જણાવ્યા અનુસાર 16 થી 18 માર્ચ દરમિયાન પ્રદેશ સ્તરે પ્રદેશ ચૂંટણી કમિટી દ્વારા તમામ ઉમેદવારોના નામો અને ચર્ચાઓ પર વિગતવાર વિચારણા કરવામાં આવશે. ત્યારબાદ પસંદ કરાયેલા નામોને પાર્ટીની સર્વોચ્ચ સમિતિ સમક્ષ અંતિમ મંજૂરી માટે મોકલવામાં આવશે. આ પ્રક્રિયા પૂર્ણ થયા બાદ 20 માર્ચ પછી તમામ સીટો માટે ઉમેદવારોની સત્તાવાર જાહેરાત કરવામાં આવશે.
આમ આદમી પાર્ટીએ સ્પષ્ટ કર્યું છે કે ઉમેદવાર પસંદગીમાં કાર્યકરો, પદાધિકારીઓ અને સ્થાનિક સમર્થકોની પણ મહત્વપૂર્ણ ભૂમિકા રહેશે. પાર્ટીનું માનવું છે કે સ્થાનિક સ્તરે લોકો સાથે સતત જોડાયેલા અને જાહેર પ્રશ્નોને સમજતા ઉમેદવારોને આગળ લાવવાથી સ્થાનિક શાસનમાં વધુ પારદર્શિતા અને જવાબદારી લાવી શકાય છે.
પાર્ટીના નેતાઓએ વધુમાં જણાવ્યું હતું કે ગુજરાતના યુવાનો અને નાગરિકોમાં બદલાવ માટે ઉત્સાહ જોવા મળી રહ્યો છે. આવા સમયમાં જે લોકો જાહેર જીવનમાં સક્રિય રીતે જોડાઈને સમાજ માટે કામ કરવા માંગે છે તેઓને પણ ઉમેદવારી માટે આગળ આવવા આમંત્રણ આપવામાં આવ્યું છે. તમામ ઇચ્છુક ઉમેદવારોને જિલ્લા સ્તરની સ્ક્રુટીની પ્રક્રિયામાં ભાગ લેવા અપીલ કરવામાં આવી છે.
આમ આદમી પાર્ટીનો દાવો છે કે આવનારી સ્થાનિક સ્વરાજ સંસ્થાઓની ચૂંટણીઓમાં પાર્ટી મજબૂત ઉમેદવારો સાથે મેદાનમાં ઉતરશે અને સ્થાનિક સ્તરે વિકાસ, પારદર્શિતા અને જવાબદાર શાસન માટે પોતાનો દૃઢ અભિગમ રજૂ કરશે.
