Gujarat Rain : હવામાન વિભાગે રાજ્યભરમાં હળવાથી ભારે વરસાદની આગાહી કરી, સૌરાષ્ટ્ર-કચ્છમાં યલો એલર્ટ
ગુજરાતમાં આગામી દિવસોમાં મેઘરાજાની મેઘમહેર થવાની આગાહી સામે આવી છે.
ગુજરાતમાં વરસાદી માહોલ વચ્ચે હવામાન વિભાગની આગાહી સામે આવી છે. હવામાન વિભાગે રાજ્યભરમાં હળવાથી ભારે વરસાદની આગાહી કરી છે. આજે અમદાવાદમાં હળવોથી મધ્યમ વરસાદ થાય તેવી શક્યતા વ્યક્ત કરવામાં આવી છે.
હવામાન વિભાગની આગાહી અનુસાર, સૌરાષ્ટ્ર અને કચ્છમાં આગામી સપ્તાહ દરમિયાન ભારે વરસાદ પડવાની સંભાવના છે. તેમજ આ વિસ્તારોમાં 45થી 55 કિલોમીટર પ્રતિ કલાકની ગતિએ પવન ફૂંકાવાની સંભાવના છે. અતિભારે વરસાદની સાથે જ હવામાન વિભાગે ઓરેન્જ એલર્ટ જારી કર્યું છે.
હવામાન વિભાગે આજે સાબરકાંઠા, અરવલ્લી, નવસારી, વલસાડ, દમણ અને દાદરા નગર હવેલીમાં ભારેથી અતિભારે વરસાદની આગાહી સાથે ઓરેન્જ એલર્ટ આપ્યું છે. બીજી તરફ સૌરાષ્ટ્ર, કચ્છ અને સુરેન્દ્રનગર સહિતના વિસ્તારોમાં યેલો એલર્ટ આપવામાં આવ્યું છે.
આવતીકાલે પણ વરસાદી ઝાપટા ચાલુ રહેશે તેવી શક્યતા છે. આવતી કાલે ખાસ કરીને ઉત્તર ગુજરાત, તો સૌરાષ્ટ્ર અને કચ્છમાં વરસાદ થવાની સંભાવના છે. અરવલ્લી, પંચમહાલ, અમરેલી અને ભાવનગર જિલ્લાઓમાં ભારે વરસાદની આગાહી હવામાન વિભાગ દ્વારા કરવામાં આવી છે. રાજ્યમાં અપર એર સાયક્લોનિક સર્ક્યુલેશન સક્રિય છે, જેને લીધે ભારે વરસાદ થઈ શકે છે.
