વડાપ્રધાન શ્રી નરેન્દ્ર મોદીએ સાણંદમાં માઇક્રોન સેમિકન્ડક્ટર ફેસિલિટીનો શુભારંભ કરાવ્યો
વડાપ્રધાન નરેન્દ્ર મોદીએ (28મી ફેબ્રુઆરી) તેમના ગુજરાત પ્રવાસ દરમિયાન સાણંદ GIDC ખાતે રોડ શો બાદ માઇક્રોન ટેક્નોલોજીના અત્યાધુનિક ATMP (એસેમ્બ્લી, ટેસ્ટિંગ, માર્કિંગ અને પેકેજિંગ) પ્લાન્ટનું ઉદ્ઘાટન કર્યું હતું. આ સુવિધાના પ્રારંભ સાથે જ દેશની પ્રથમ ‘મેડ ઇન ઇન્ડિયા’ ચિપ ગુજરાતની ધરા પરથી બનશે.
સાણંદમાં માઇક્રોન ટેકનોલોજીના અત્યાધુનિક પ્લાન્ટનું ઉદ્ઘાટન કરતા વડાપ્રધાન નરેન્દ્ર મોદીએ જણાવ્યું હતું કે, “તાજેતરમાં યોજાયેલી ‘ઇન્ડિયા AI ઇમ્પેક્ટ સમિટ 2026’ એ વિશ્વને ભારતની વધતી જતી આર્ટિફિશિયલ ઇન્ટેલિજન્સ(AI) ક્ષમતાનો પરિચય કરાવ્યો છે. આ નવો સેમિકન્ડક્ટર પ્લાન્ટ માત્ર એક ફેક્ટરી નથી, પરંતુ ગ્લોબલ ટેકનોલોજી લીડર બનવા તરફની ભારતની મક્કમ પ્રતિબદ્ધતાનું જીવંત પ્રતીક છે.”
વડાપ્રધાન મોદીએ કહ્યું કે, “20મી સદી સુધી વિશ્વએ ઔદ્યોગિક ક્રાંતિનો સમયગાળો જોયો. જ્યાં ફેક્ટરી, મશીન અને માસ પ્રોડક્શનમાં આગળ રહેલા દેશોએ ઝડપી પ્રગતિ કરી છે. પરંતુ 21મી સદી એ AI ક્રાંતિની સદી છે, અને સેમિકન્ડક્ટર આ પરિવર્તનનો સૌથી મોટો સેતુ છે. બહુ દૂરની વાત નથી, 10-11 વર્ષ પહેલાં સુધી ભારતમાં ડેટા અને ચિપની ચર્ચા મર્યાદિત વર્તુળો સુધી જ સીમિત રહેતી હતી. જ્યારે ટેકનોલોજીની વાત થતી હતી, ત્યારે આપણી ચર્ચા મોટે ભાગે આઈટી સર્વિસીસ સુધી જ મર્યાદિત હતી. પરંતુ આજે સોફ્ટવેર માટે ઓળખાતું ભારત હાર્ડવેરના ક્ષેત્રમાં પણ પોતાની મજબૂત ઓળખ બનાવી રહ્યું છે.”
વધુમાં વડાપ્રધાને કહ્યું કે, “આજે સાણંદમાં આપણે નવા ભવિષ્યનો ઉદય થતો જોઈ રહ્યા છીએ. માઈક્રોનની આ એટીએમપી ફેસિલિટીમાં કોમર્શિયલ પ્રોડક્શનની શરૂઆત ગ્લોબલ ટેકનોલોજી વેલ્યુ ચેનમાં ભારતની ભૂમિકાને વધુ મજબૂત બનાવશે. ભારત ઝડપથી ગ્લોબલ સેમિકન્ડક્ટર વેલ્યુ ચેનનો એક મહત્ત્વનો હિસ્સો બની રહ્યું છે.”
માઇક્રોન સેમિકન્ડક્ટર ટેક્નોલોજી ઇન્ડિયા પ્રા. લિમિટેડ દ્વારા સાણંદમાં ₹22,516 કરોડનું જંગી રોકાણ કરવામાં આવ્યું છે, જે ભારતીય ટેકનોલોજી ક્ષેત્રે નવી ક્રાંતિ લાવશે તેવું માનવામાં આવે છે. આ પ્લાન્ટમાં સોલિડ સ્ટેટ ડ્રાઇવ (SSD) જેવા સ્ટોરેજ ઉપકરણો તેમજ DRAM અને NAND પ્રકારના મેમરી ઉત્પાદનો તૈયાર કરવામાં આવશે. હાલમાં આ પ્લાન્ટમાં 2000 લોકોની ટીમ કાર્યરત છે, જે આગામી સમયમાં વધીને 5000 થશે. નોંધનીય છે કે, આ ટીમમાં દિવ્યાંગ નાગરિકોને પણ ઓપરેટર અને ટેક્નિશિયન તરીકે રોજગારી આપીને સમાવેશ કરવામાં આવ્યો છે.
આ પ્લાન્ટમાં થતી કામગીરી ટેકનિકલ દ્રષ્ટિએ અત્યંત જટિલ અને મહત્વપૂર્ણ છે. સેમિકન્ડક્ટર ચિપ બનાવવાની પ્રક્રિયા રેતીમાંથી શુદ્ધ સિલિકોન અલગ કરવાથી શરૂ થાય છે, જેને ઓગાળીને સિલિન્ડર (ઇનગોટ) બનાવાય છે અને ત્યારબાદ તેના બારીક ટુકડા કરીને ‘વેફર્સ’ તૈયાર કરવામાં આવે છે. ફેબ્રિકેશન પ્લાન્ટમાં આ વેફર્સ પર ફોટોલિથોગ્રાફી દ્વારા ઇલેક્ટ્રિક પેટર્ન અને ટ્રાન્ઝિસ્ટર્સ કંડારીને મેમરી તૈયાર કરવામાં આવે છે. ત્યારબાદ આ વેફર્સ સાણંદના ATMP પ્લાન્ટમાં પહોંચે છે, જ્યાં તેની એસેમ્બલી, સ્પીડ અને મેમરીનું સચોટ ટેસ્ટિંગ, માર્કિંગ અને અંતે પેકેજિંગ કરવામાં આવે છે.
