રાજ્યપાલ આચાર્ય દેવવ્રતના ઉપસ્થિતમાં આધ્યાત્મિક વર્ષાયોગ–2025 મહોત્સવનો અમદાવાદમાં ઉદ્ઘાટન: “ધર્મ એટલે ટકાઉ અને શાશ્વત સિદ્ધાંતોનું આચરણ
રિપોર્ટર
હિતેન્દ્ર ગોસાઈ
અમદાવાદ
અમદાવાદ શહેરમાં આજે એક ભવ્ય અને ભાવનાત્મક વાતાવરણ વચ્ચે પરમ પૂજ્ય દિગંબર જૈનાચાર્ય, ચતુર્થ પટ્ટાધીશ આચાર્ય સુનીલ સાગર મહામુનિરાજના આધ્યાત્મિક વર્ષાયોગ–2025 મહોત્સવનો ઉદ્ઘાટન સમારંભ યોજાયો હતો. આ મહોત્સવનો આરંભ ગુજરાતના રાજ્યપાલ આચાર્ય દેવવ્રતની વિશિષ્ટ ઉપસ્થિતમાં થયો હતો.
ઉદ્ઘાટન પ્રસંગે રાજ્યપાલે આચાર્ય સુનીલ સાગર મહામુનિરાજના જીવન અને તપસ્યા પર પ્રકાશ પાડતાં તેમને આધ્યાત્મિક પ્રતિભાના પ્રેરણાસ્ત્રોત ગણાવ્યા હતા. તેમણે જણાવ્યું કે, માત્ર 19 વર્ષની ઉંમરે તપસ્યાનો માર્ગ સ્વીકારી સાધનામાં પ્રવૃત્તિ અપનાવવી એ અત્યંત અસાધારણ નિર્માણ છે. “આચરણ અને ત્યાગ દ્વારા સમાજમાં પરિવર્તન લાવવો એ સાચા અર્થમાં ધર્મસેવા છે,” એમ રાજ્યપાલે કહ્યું.
પ્રેરક ભાષણ દરમિયાન તેમણે ધર્મની વ્યાખ્યા કરતી વધુ સ્પષ્ટતા કરતા જણાવ્યું કે, “ધર્મ એ કોઈ સંપ્રદાય નથી, તે જીવનમાં અપનાવવાના ટકાઉ અને શાશ્વત સિદ્ધાંતોનો માર્ગ છે. સત્ય, અહિંસા, અપરિગ્રહ જેવા સિદ્ધાંતો સમયથી પર છે અને તેઓનું મૂલ્ય કોઈપણ યુગમાં ઘટતું નથી. આજે સમાજ જે આધુનિકતાના માર્ગે આગળ વધી રહ્યો છે, તે સમય સાથે આત્મમૂલ્યો ભૂલી રહ્યો છે, ત્યારે આવા કાર્યક્રમો આધ્યાત્મિક જાગૃતિ લાવવામાં મહત્વપૂર્ણ ભુમિકા ભજવે છે.”
આ પ્રસંગે રાજ્યપાલના હસ્તે બ્રાહ્મી લિપિમાં લખાયેલ અને પ્રાકૃત ભાષામાં રચાયેલા મહત્વપૂર્ણ ધાર્મિક ગ્રંથનું વિમોચન પણ કરવામાં આવ્યું હતું. તેમણે પ્રાકૃત ભાષાના ઐતિહાસિક મહત્વ પર ભાર મૂકી જણાવ્યું કે, “પ્રાકૃત ભાષા પ્રાચીન ભારતીય જીવનશૈલી, સંસ્કૃતિ અને ધર્મનો અરીસો છે. જૈન ધર્મના અમૂલ્ય ગ્રંથો આ ભાષામાં ઉપલબ્ધ છે, જે આજે પણ સાત્ત્વિક જીવનશૈલી માટે માર્ગદર્શન રૂપ છે.”
રાજ્યપાલે અપરિગ્રહના તત્વ પર બોલતાં કહ્યું કે, “અતિશય ભૌતિક સંગ્રહ કે લાલચ માનવીને અસંતોષ તરફ ધकेલે છે. જે વ્યક્તિ માત્ર જરૂરિયાત મુજબ વસ્તુઓ ધારણ કરે છે અને બાકીનો બોજ નથી બાંધી શકતો, તે સાચા અર્થમાં સુખ અને શાંતિ અનુભવે છે.”
આચાર્ય સુનીલ સાગર મહામુનિરાજે પણ ઉપસ્થિત શ્રદ્ધાળુઓને આશીર્વચન પાઠવ્યા અને રાજ્યપાલના વિચારપ્રેરક પ્રવચનને આધ્યાત્મિક દૃષ્ટિકોણથી અત્યંત ઊંડાણપૂર્વકનું ગણાવ્યું. તેમણે જણાવ્યું કે, “ધર્મ માત્ર મંદિરમાં નહિ, પણ જીવનના દરેક પળમાં હોય છે. જ્યારે વ્યક્તિ પોતાના જીવનમાં ટકાઉ સિદ્ધાંતોનો અમલ કરે છે ત્યારે જ તે સાચા અર્થમાં ધર્મપથે ચાલે છે.”
પ્રસંગે મોટી સંખ્યામાં જૈન અનુયાયીઓ, સાધુ-સાધ્વી મંડળ, સામાજિક આગેવાનો, શિક્ષણવિદો અને યુવાઓ ઉપસ્થિત રહ્યા હતા.
મહોત્સવના અંતે ભક્તિમય સંગીત કાર્યક્રમો અને સંયમ જીવનના મહત્વ વિશેના સંવાદના આયોજનો યોજાયા હતા. આ કાર્યક્રમનો મુખ્ય હેતુ આધ્યાત્મિકતા અને જીવનમૂલ્યોની પુન:સ્થાપનાની દિશામાં એક મજબૂત સંદેશ આપવાનો હતો.
મહોત્સવની શરૂઆત સાથે જ આગામી દિવસોમાં વિવિધ સત્સંગો, પ્રવચનો, ચરિત્ર ચિંતન, યોગસાધનાઓ તથા સમાજસેવાની પ્રવૃત્તિઓ દ્વારા આ વર્ષે આખું વર્ષ જનજાગૃતિ અને આત્મશોધન માટે અર્પિત રહેશે.
