ઔડાની કડક કાર્યવાહી: કોટેશ્વરના મધુરમિલન આવાસ યોજનામાં નિયમભંગ બદલ 33 મકાનધારકોને નોટિસ
રિપોર્ટર
હિતેન્દ્ર ગોસાઈ
અમદાવાદ
અમદાવાદ શહેરી વિકાસ સત્તામંડળ (ઔડા) દ્વારા આવાસ યોજનામાં થયેલા નિયમભંગ સામે કડક વલણ અપનાવતા ગાંધીનગર જિલ્લાના કોટેશ્વર વિસ્તારમાં આવેલી મધુરમિલન આવાસ યોજનામાં મોટા પાયે કાર્યવાહી હાથ ધરવામાં આવી છે. પ્રાથમિક તપાસમાં શરતોનો ભંગ કરીને મકાનો ભાડે આપવાના બનાવો સામે આવતા કુલ 33 આવાસધારકોને મકાન ખાલી કરવા નોટિસ ફટકારવામાં આવી છે.
માહિતી અનુસાર, ઔડાએ આર્થિક રીતે નબળા વર્ગ (EWS) માટે વર્ષ 2021-22 દરમિયાન ડ્રો પદ્ધતિ દ્વારા કુલ 266 આવાસ યુનિટ ફાળવ્યા હતા. મોટેરા નજીક વિકસિત વિસ્તારમાં આવેલી આ આવાસ યોજના લિફ્ટ, સીસીટીવી કેમેરા, ગાર્ડન તેમજ સોલાર સુવિધાઓ જેવી આધુનિક વ્યવસ્થાઓથી સજ્જ છે. ઓછા દરે મળતા આ આવાસોનો લાભ યોગ્ય લાભાર્થીઓને મળે તે માટે કડક નિયમો પણ નક્કી કરવામાં આવ્યા હતા.
તાજેતરમાં ઔડાના ધ્યાન પર આવ્યું હતું કે કેટલાક આવાસધારકો દ્વારા ફાળવણીની શરતોનો ભંગ કરીને મકાનો ભાડે આપવામાં આવ્યા છે. આ મામલે ઔડાના મુખ્ય કારોબારી અધિકારીના માર્ગદર્શન હેઠળ વિશેષ તપાસ ટીમો રચવામાં આવી હતી. ત્યારબાદ 17 માર્ચ 2026ના રોજ વહેલી સવારે 7 વાગ્યાથી મધુરમિલન આવાસ યોજનાના તમામ 8 બ્લોકમાં આવેલી કુલ 266 રહેણાંક એકમોની આકસ્મિક તપાસ હાથ ધરવામાં આવી હતી.
તપાસ દરમિયાન કુલ 33 મકાનો ભાડે આપેલા હોવાનું સામે આવ્યું હતું. નિયમો મુજબ EWS યોજના હેઠળ ફાળવાયેલા મકાનોને ભાડે આપવાની મંજૂરી નથી, તેથી આ પ્રકારની ગેરરીતિને ગંભીરતાથી લેવામાં આવી છે. તપાસણી ટીમ દ્વારા તમામ 33 આવાસધારકોને તાત્કાલિક અસરથી મકાન ખાલી કરવા માટે નોટિસ પાઠવવામાં આવી છે.
ઔડા દ્વારા જણાવાયું છે કે નોટિસ આપવામાં આવ્યા બાદ નિર્ધારિત સમયગાળામાં મકાન ખાલી નહીં કરવામાં આવે તો સત્તામંડળ દ્વારા આ આવાસોને સીલ કરવાની કાર્યવાહી હાથ ધરવામાં આવશે. સાથે જ આવાસ ફાળવણી રદ કરવા સહિતના કડક કાયદેસર પગલાં પણ લેવામાં આવી શકે છે.
આ કાર્યવાહીનો મુખ્ય હેતુ સરકાર દ્વારા ગરીબ અને જરૂરિયાતમંદ લોકોને આપવામાં આવતી આવાસ યોજનાઓનો દુરુપયોગ અટકાવવાનો છે. ઔડાએ સ્પષ્ટ કર્યું છે કે આવાસ યોજનાઓનો લાભ માત્ર વાસ્તવિક લાભાર્થીઓને જ મળે તે સુનિશ્ચિત કરવા માટે આવી તપાસ અભિયાન આગામી સમયમાં પણ ચાલુ રહેશે.
સત્તામંડળ દ્વારા નાગરિકોને પણ અપીલ કરવામાં આવી છે કે તેઓ આવાસ ફાળવણી સંબંધિત નિયમોનું પાલન કરે અને કોઈપણ પ્રકારની ગેરરીતિથી દૂર રહે. જો કોઈ વ્યક્તિ આવા ગેરકાયદેસર પ્રવૃત્તિમાં સંડોવાયેલો જોવા મળે તો તેની સામે કડક કાર્યવાહી કરવામાં આવશે.
ઔડાના જનસંપર્ક વિભાગ દ્વારા બહાર પાડવામાં આવેલી યાદી મુજબ, આવનારા સમયમાં શહેર તથા આસપાસના વિસ્તારોમાં આવેલી અન્ય આવાસ યોજનાઓમાં પણ આકસ્મિક તપાસ હાથ ધરાશે. સત્તામંડળ દ્વારા આ પ્રકારની કાર્યવાહીથી પારદર્શિતા જાળવવા અને યોજનાઓનો યોગ્ય લાભ લાયક લાભાર્થીઓ સુધી પહોંચે તે દિશામાં વધુ કડક વલણ અપનાવવામાં આવશે.
