વિધાનસભાના અધ્યક્ષશ્રી શંકરભાઈ ચૌધરીના અધ્યક્ષસ્થાને થરાદ ખાતે ‘સરદાર@૧૫૦ યુનિટી માર્ચ’ અંતર્ગત ભવ્ય પદયાત્રા યોજાઈ
28 નવેમ્બર જીતશે જોષી પાલનપુર બનાસકાંઠા
એક ભારત-આત્મનિર્ભર ભારતના સૂત્રો સાથે પદયાત્રા દરમ્યાન દેશની એકતા અને અખંડિતતાનો સંદેશ ગુંજ્યો.સરદાર સાહેબના સ્વપ્નોને સાકાર બનાવવા એકતા અને વિકાસના માર્ગે દેશ સતત આગળ વધી રહ્યો છે:- અધ્યક્ષશ્રી શંકરભાઈ ચૌધરી.પ્રેમ, સંવાદ અને સંવિધાનના માર્ગ પર ચાલીને કોઈપણ સમસ્યાનું સમાધાન શક્ય છે: દેશ આજે એ જ માર્ગે સતત આગળ વધી રહ્યો છે:- અધ્યક્ષશ્રી શંકરભાઈ ચૌધરી.રમતગમત ક્ષેત્રે યોગદાન આપનાર રમતવીરોનું મહાનુભાવોના હસ્તે કરાયું સન્માન.ભારતના લોખંડી પુરુષ સરદાર વલ્લભભાઈ પટેલની ૧૫૦મી જન્મજયંતી નિમિત્તે ભારત સરકાર દ્વારા આયોજિત રાષ્ટ્રવ્યાપી અભિયાન ‘સરદાર@૧૫૦ યુનિટી માર્ચ’ અંતર્ગત આજે થરાદ ખાતે વિધાનસભાના અધ્યક્ષશ્રી શંકરભાઈ ચૌધરીના અધ્યક્ષસ્થાને ભવ્ય પદયાત્રાનું આયોજન કરવામાં આવ્યું હતું. આ પદયાત્રા એકતા અને રાષ્ટ્ર પ્રત્યેની પ્રતિબદ્ધતાનું પ્રતીક બની હતી. જેમાં તમામ સમાજના લોકોએ ઉત્સાહભેર ભાગ લીધો હતો.દેશની એકતા, અખંડિતતા અને રાષ્ટ્રનિર્માણમાં સરદાર સાહેબના યોગદાનને બિરદાવવાના ઉદ્દેશ્ય સાથે યોજાયેલી આ પદયાત્રામાં અધિકારીશ્રીઓ, યુવાનો, વિદ્યાર્થીઓ, સામાજિક સંસ્થાઓના પ્રતિનિધિઓ, સહકારી આગેવાનો અને નગરજનો બહોળી સંખ્યામાં ઉત્સાહપૂર્વક જોડાયા હતા. આ પ્રસંગે અધ્યક્ષશ્રી શંકરભાઈ ચૌધરીએ જણાવ્યું હતું કે, સરદાર સાહેબે દેશ સેવામાં અવિસ્મરણીય યોગદાન આપ્યું છે. ખેડૂત સહિત વિવિધ વર્ગના નાગરિકોને તેમને સ્વમાનભેર જીવન જીવી શકે તે માટે બ્રિટિશ સરકાર વિરુદ્ધ અનેક આંદોલન કર્યા હતા. દેશના રજવાડાઓને એકત્રિત કરીને ભારતને એકતાના સુત્રમાં બાંધવાના સરદાર સાહેબના યશને દેશ સદાય નમન કરે છે. આઝાદી બાદ દેશની પ્રગતિ માટે સરદાર સાહેબે મહત્વપૂર્ણ નિર્ણયો લીધા હતા. ખાસ કરીને કશ્મીર ભારતનું અભિન્ન અંગ રહે તે સુનિશ્ચિત કરવામાં તેમનું યોગદાન અત્યંત મહત્ત્વનું રહ્યું હતું. અધ્યક્ષશ્રી શંકરભાઈએ જણાવ્યું કે, મહાત્મા ગાંધી અને સરદાર સાહેબના સ્વપ્નોને સાકાર કરવા વડાપ્રધાનશ્રી નરેન્દ્રભાઈ મોદી અને ગૃહમંત્રીશ્રી અમિતભાઈ શાહ દેશને આગળ લઈ જઈ રહ્યા છે. પ્રેમ, સંવાદ અને સંવિધાનના માર્ગ પર ચાલીને કોઈપણ સમસ્યાનું સમાધાન શક્ય છે અને દેશ આજે એ જ માર્ગે સતત આગળ વધી રહ્યો છે. સરદાર સાહેબની ૧૫૦મી જન્મજયંતિ નિમિત્તે અધ્યક્ષશ્રી શંકરભાઈ ચૌધરીએ હૃદયપૂર્વક નમન કરીને સરદાર સાહેબના આદર્શોને જીવનમાં ઉતારવા માટે નાગરિકોને અપીલ કરી હતી. આ કાર્યક્રમ દરમિયાન રમતગમત ક્ષેત્રે યોગદાન આપનાર વિવિધ રમતવીરોનું સન્માન કરવામાં આવ્યું હતું. પદયાત્રાનો પ્રારંભ માર્કેટ યાર્ડ થરાદ સરદાર પટેલ સ્ટેચ્યુથી કરવામાં આવ્યો હતો. જ્યારે પદયાત્રાની પૂર્ણાહુતિ લુણાલ નકળંગ ધામ ખાતે કરવામાં આવી હતી. અધ્યક્ષશ્રી શંકરભાઈ સાથે નાગરિકોએ એકતા શપથ લીધા હતા. “એક ભારત, આત્મનિર્ભર ભારત” અને રાષ્ટ્રીય એકતાના સૂત્રોચ્ચાર સાથે પદયાત્રા પૂર્ણ કરાઈ હતી. આ પ્રસંગે બનાસ બેન્કના ચેરમેનશ્રી ડાહ્યાભાઈ પીલીયાતર, પૂર્વ સાંસદશ્રી પરબતભાઈ પટેલ, થરાદ તથા પાટણ એ.પી.એમ.સી.ના ચેરમેનશ્રી શૈલેષ પટેલ, શ્રી નેહલ પટેલ, જિલ્લા પોલીસ અધિક્ષકશ્રી ચિંતન તેરૈયા, નિવાસી અધિક જિલ્લા કલેક્ટરશ્રી ટી.કે.જાની સહિત સ્થાનિક આગેવાનો અને બહોળી સંખ્યામાં નગરજનો ઉપસ્થિત રહ્યા હતા.
