ભરૂચ ક્રાઈમ બ્રાન્ચની કાર્યવાહી:ખેતરમાંથી 3.12 લાખનો વિદેશી દારૂ ઝડપાયો, એક આરોપી ધરપકડ, બે ફરાર
સમીર પટેલ, ભરૂચ
ભરૂચ જિલ્લામાં પ્રોહિબિશન વિરોધી કાર્યવાહી દરમિયાન લોકલ ક્રાઈમ બ્રાન્ચે મોટી સફળતા મેળવી છે. પોલીસ અધિક્ષક મયુર ચાવડાના માર્ગદર્શન હેઠળ ચાલી રહેલી કાર્યવાહીમાં ઢુંઢા ગામમાંથી વિદેશી દારૂનો મોટો જથ્થો પકડાયો છે.
પોલીસ ઈન્સ્પેક્ટર એમ.પી. વાળાની આગેવાની હેઠળની ટીમને બાતમી મળી હતી. ઢુંઢા ગામના ટેકરા ફળિયામાં રહેતો નરેન્દ્ર ઉર્ફે નંદા પુનમભાઈ વસાવા પોતાના ખેતરમાં દારૂનો જથ્થો સંતાડીને રાખ્યો છે. આ માહિતીના આધારે તાત્કાલિક રેડ કરવામાં આવી.
તપાસ દરમિયાન ખેતરમાંથી 956 નંગ વિદેશી દારૂની બોટલો અને ટીન બીયર મળી આવ્યા. આ દારૂની કિંમત રૂ.2,57,880 છે. પોલીસે એક એક્ટીવા ગાડી કિંમત રૂ.50,000 અને એક મોબાઈલ ફોન કિંમત રૂ.5,000 પણ જપ્ત કર્યા છે. કુલ રૂ.3,12,880નો મુદ્દામાલ જપ્ત કરવામાં આવ્યો છે.
28 વર્ષીય આરોપી નરેન્દ્ર વસાવાની ધરપકડ કરવામાં આવી છે. આ કેસમાં બે અન્ય આરોપીઓ રણજીત મફતભાઈ વસાવા (નાના પાટણા, નર્મદા) અને દિનેશ શાંતિલાલ વસાવા (ચીત્રોલ, નર્મદા) ફરાર છે. પોલીસે તેમને વોન્ટેડ જાહેર કર્યા છે. ભરૂચ લોકલ ક્રાઈમ બ્રાન્ચની આ કાર્યવાહીથી જિલ્લામાં કાયદો અને વ્યવસ્થા જાળવવામાં મદદ મળશે.
