ભરૂચ: RTO વિભાગે નિયમોના ભંગ બદલ 16 વાહનોને 1.04 લાખનો દંડ ફટકાર્યો
સમીર પટેલ, ભરૂચ
ભરૂચ આરટીઓ વિભાગે સ્કૂલ વાન અને રીક્ષા નું ચેકિંગ હાથ ધર્યું, જેમાં બે દિવસ દરમિયાન 11 રિક્ષા અને 5 વાન ચાલકોને નિયમ ભંગ બદલ 1.04 લાખનો દંડ ફટકારવામાં આવ્યો. જિલ્લામાં શાળાએ બાળકોને લઇ જતી રિક્ષા અને વાન ચાલકો આરટીઓના નિયમોનું પાલન નહીં કરતા, વાહન ની ક્ષમતા કરતાં વધારે બાળકોને બેસાડતા જોવા મળે છે. તો રિક્ષામાં ડ્રાઇવરની બાજુમાં પણ બાળકોને બેસાડીને લઈ જતા હોય છે. જેથી અકસ્માત થવાની શક્યતા વધી જતી હોય છે. જેને લઈને આરટીઓ વિભાગે ભરૂચમાં અલગ અલગ વિસ્તારમાં બે દિવસ શાળાએ બાળકોને લઇ જતી રીક્ષા તેમજ વાનની તપાસ હાથ ધરી હતી. તપાસ દરમિયાન આરટીઓ વિભાગને નિયમ ભંગ કરતાં કેટલાક વાહન ચાલકો મળ્યા હતા. જેમાં 11 રિક્ષા અને 5 વાન મળી કુલ 16 વાહનોને નિયમ ભંગ બદલ 1.04 લાખનો દંડ ફટકારવામાં આવ્યો હતો. તેમજ બીજી વખત નિયમનો પાલન કરવા માટે સૂચનો પણ આપવામાં આવ્યા હતા. ઉલેખનીય છે કે, અગાઉ પણ આરટીઓ વિભાગ દ્વારા અવારનવાર સ્કૂલ વાન અને રીક્ષાની તપાસ કરવામાં અને દંડ પણ ફટકારવામાં આવ્યો હતો. તેમ છતાં નિયમોના ધજાગરા ઉડાવવામાં આવે છે. જેથી આવા વાહન ચાલકો સામે કડક પગલાં લેવામાં આવે તે જરૂરી બન્યું છે. જોકે પોતાના બાળકોને સાવચેતી માટે હવે વાલીઓએ પણ જાગૃત થવાની જરૂર છે. બાળક કેવી રીતે શાળાએ પહોચે છે, અને ઘરે પાછું આવે છે. તેના પર દેખરેખ રાખવું જરૂરી બન્યું છે.
