અંકલેશ્વરમાં યુવાનની હત્યા:પાનોલી ગુરુવારી માર્કેટ પાસે આલુંજ ગામના યુવાનની હત્યા, નજીવી તકરારમાં જીવ ગયો
સમીર પટેલ, ભરૂચ
અંકલેશ્વરના પાનોલીમાં નજીવી તકરારને કારણે એક યુવાનની હત્યા કરવામાં આવી છે. ગુરુવારી માર્કેટ પાસે રેલવે ઓવરબ્રિજના સર્વિસ રોડ પર આ ઘટના બની હતી, જેના પગલે ચકચાર મચી ગઈ છે.
મૃતક યુવાનની ઓળખ અંકલેશ્વર તાલુકાના આલુંજ ગામના દેવળ ફળિયામાં રહેતા 22 વર્ષીય પિયુષ રમેશ વસાવા તરીકે થઈ છે. ગતરોજ રાત્રે પિયુષ તેના ફળિયાના સુધીર વસાવા અને મોહન વસાવા સાથે બાઈક લઈને પાનોલી ગામના ગુરુવારી માર્કેટમાં ગયો હતો.
આ દરમિયાન રેલવે ઓવરબ્રિજના સર્વિસ રોડ પર પિયુષનો જ ગામનો હિતેશ ઉર્ફે લાલુ હિરાચંદ વસાવા મળ્યો હતો. પિયુષે હિતેશને તેના ઘરે ન આવવાનું કહેતા બંને વચ્ચે ઝઘડો થયો હતો. ઝઘડા દરમિયાન હિતેશ ઉર્ફે લાલુ વસાવાએ પિયુષને ધક્કો માર્યો હતો, જેના કારણે તે રોડ પર પડી ગયો અને તેને માથાના ભાગે ગંભીર ઈજા થઈ હતી.
ગંભીર રીતે ઘવાયેલા પિયુષને તાત્કાલિક સારવાર માટે ખરોડની વેલ્ફેર હોસ્પિટલ ખસેડવામાં આવ્યો હતો. જોકે, ત્યાં હાજર તબીબે તેને મૃત જાહેર કર્યો હતો.
આ બનાવ અંગે પાનોલી પોલીસે હત્યાનો ગુનો નોંધી વધુ તપાસ હાથ ધરી છે. આરોપીની ધરપકડ માટે પોલીસે ચક્રો ગતિમાન કર્યા છે.
