બોરસદની પરિણીતા ઉપર પતિ, સાસુ, જેઠાણીએ હુમલો કર્યો પોલિસ ફરિયાદ નોંધાય.
બોરસદની પરિણીતા ઉપર પતિ, સાસુ, જેઠાણીએ હુમલો કર્યો પોલિસ ફરિયાદ નોંધાય.
તાહિર મેમણ – 11/11/2024- આણંદ – આણંદ જિલ્લાના બોરસદની પરિણીતા ઉપર તેના પતિ, સાસુ અને જેઠાણીએ હુમલો કરી મારમારી હોવાની ફરિયાદ પોલીસ ચોપડે નોંધાઈ છે. પરિણીતાએ છુટાછેડા તેમજ ઘરેલું હિંસાનો કેસ કર્યો હોવાની રીસમાં આ હુમલો કરાયો હતો. આ અંગે બોરસદ સીટી પોલીસે ગુનો નોંધી કાર્યવાહી હાથ ધરી છે.
બોરસદમાં રહેતાં 34 વર્ષીય પરિણીતાએ પોતાના પતિ સાથે અણબનાવ થતાં છુટાછેડા લીધાં હતાં. જે બાદ દોઢેક વર્ષ અગાઉ ઘરની બાજુમાં જ રહેતાં એક યુવક સાથે બીજા લગ્ન કર્યાં હતાં. જોકે, લગ્ન બાદ પરિણીતા ઉપર પતિ ખોટી રીતે શંકા વહેમ રાખી તકરાર કરતાં હતાં. જેથી પરિણીતાએ સાતેક મહીના અગાઉ છૂટાછેડા અંગેનો કેસ બોરસદ કોર્ટમાં દાખલ કરાવ્યો હતો તેમજ ઘરેલુ હિંસા અને અંગત પળોના ફોટા વાયરલ કરેલ તે બાબતની ફરિયાદ કરી હતી. જે બાદ ગતરોજ બપોરના સમયે આ પરિણીતા પ્રસંગમાં જમીને પરત ઘરે જતાં હતાં, તે વખતે પતિ, સાસુ અને જેઠાણી એકાએક ત્યાં આવી ચડ્યાં હતાં અને જેવી મે તારી એક્ટીવા બાળી છે તે રીતે તારૂ મોઢુ બાળી નાખીશ તેમ કહી ઝપાઝપી કરી, ધક્કો મારી પરિણીતાને નીચે પાડી હતી. જે બાદ પતિએ હાથમાંનો પથ્થર પરિણીતાના બરડાના ભાગે મારી ઈજા પહોંચાડી હતી. તેમજ છરો બતાવ્યો હતો અને મારી વિરૂદ્ધમા કરેલ ફરીયાદો પાછી લઈ લેજે, નહીતર તને જાનથી મારી નાંખીશ તેવી ધાકધમકીઓ આપી ત્રણેય જણાં ભાગી ગયાં હતાં. આ અંગે પરિણીતાએ પોતાના પતિ, સાસુ અને જેઠાણી વિરૂદ્ધ બોરસદ સીટી પોલીસમથકમાં ફરીયાદ નોંધાવી છે. જેના આધારે પોલીસે ત્રણેય વિરૂદ્ધ ગુનો નોંધી કાયદેસરની કાર્યવાહી હાથ ધરી છે.
