ધોળકા ખાતે બહુજન સમાજ પાર્ટી દ્વારા સંવિધાન ગૌરવ દિવસની ઉજવણી: ડૉ. બી. આર. આંબેડકરને પુષ્પાંજલિ અર્પણ સાથે સંવિધાન પરિચય કાર્યક્રમ
રિપોર્ટર
હિતેન્દ્ર ગોસાઈ
અમદાવાદ
ધોળકા શહેરના વિવિધ વિસ્તારોમાં બહુજન સમાજ પાર્ટી દ્વારા સંવિધાન ગૌરવ દિવસ નિમિત્તે વિશાળ પ્રમાણમાં કાર્યક્રમો આયોજિત કરવામાં આવ્યા. અનુસૂચિત જાતિ સમાજના વિસ્તારોમાં જ્યાં જ્યાં ડૉ. બી. આર. આંબેડકરની પ્રતિમા આવેલી છે ત્યાં પુષ્પાંજલિના કાર્યક્રમો યોજાયા અને ભારત સંવિધાનના નિર્માણમાં તેમના અસીમ યોગદાનને યાદ કરવામાં આવ્યું.
કાર્યક્રમ દરમિયાન પાર્ટીના પ્રતિનિધિઓએ જણાવ્યું કે ડૉ. બી. આર. આંબેડકરે સંવિધાન રચનાના કાર્યમાં 2 વર્ષ 11 મહિના અને 18 દિવસ સુધી રાતદિવસ મહેનત કરી હતી. અંતે 26 નવેમ્બર 1949ના રોજ તેમણે તેમના દ્વારા તૈયાર કરાયેલ બંધારણ બંધારણસભાના અધ્યક્ષને સુપ્રત કર્યું હતું. આ બંધારણનો અમલ દેશભરમાં 26 જાન્યુઆરી 1950થી શરૂ થયો હતો, જે દિવસ આજે પ્રજાસત્તાક દિવસ તરીકે ઉજવાય છે. આ ઐતિહાસિક ક્ષણથી ભારત એક લોકશાહી ગણરાજ્ય તરીકે વિશ્વ સમક્ષ ઉભરાયું અને સંવિધાનને સોનાની ચીડીયા તરીકે ઓળખાતા ભારતના ભવિષ્યને મજબૂત દિશા મળી.
કાર્યક્રમ દરમિયાન ભારતીય સંવિધાનની રચના અને બંધારણની વિવિધ કલમો, અનુચ્છેદો અને સત્તાવ્યવસ્થાનું વિસ્તૃત વર્ણન પણ રજૂ કરવામાં આવ્યું. ભારતનું બંધારણ વિશ્વના સૌથી મોટા લોકશાહી દેશોના બંધારણોની સરખામણીમાં સૌથી વિશાળ લેખિત બંધારણ છે. આજે તેમાં કુલ 495થી વધુ અનુચ્છેદો, 12 અનુસૂચિઓ અને 25 ભાગો સમાવેશ થાય છે, જ્યારે તેની રચના સમયે તેમાં 395 અનુચ્છેદ, 22 ભાગો અને 8 અનુસૂચિઓનો સમાવેશ હતો.
બંધારણમાં સંસદીય પ્રણાલીના માળખાને સ્પષ્ટ રીતે દર્શાવવામાં આવ્યું છે, જેમાં કલમ 79 મુજબ રાષ્ટ્રપતિ તથા લોકસભા અને રાજ્યસભાનો સમાવેશ થાય છે. કલમ 74(1) હેઠળ રાષ્ટ્રપતિને માર્ગદર્શન આપવા માટે વડાપ્રધાનના નેતૃત્વ હેઠળ મંત્રીમંડળની વ્યવસ્થા કરવામાં આવી છે. રાજ્યસ્તરે ધારાસભા, વિધાનપરિષદ, રાજ્યપાલ, મુખ્યમંત્રી અને મંત્રિમંડળની જવાબદારીઓ તથા સત્તાઓનું વિસ્તૃત વર્ણન પણ સંવિધાનમાં આપવામાં આવ્યું છે. કેન્દ્રશાસિત પ્રદેશોને કેન્દ્ર સરકારના માર્ગદર્શન હેઠળ કાર્ય કરવાનું હોય છે.
આજરોજ કલિકુંડ પાર્શ્વનાથ હોસ્પિટલ આગળ ડૉ. બી. આર. આંબેડકરની પ્રતિમા સમક્ષ બહુજન સમાજ પાર્ટીના અધ્યક્ષ, કાર્યકર્તાઓ તથા હોદ્દેદારો એકત્રીત થયા હતા. અહીં સંવિધાન પરિચય કાર્યક્રમ યોજાયો અને ડૉ. આંબેડકરના વિચારોને પ્રસ્થાપિત કરતાં દેશની જનતાને સંવિધાન દિવસની શુભેચ્છાઓ પાઠવવામાં આવી.
કાર્યક્રમમાં બહુજન સમાજ પાર્ટીના યુવા એડવોકેટ અને અધ્યક્ષ પ્રવીણભાઈ જીણીય, જીગ્નેશ ગોડ, મિલન ગૌતમ, નરેશ પરમાર સહિત અનેક હોદ્દેદારો અને સભ્યો ઉપસ્થિત રહ્યા. સમગ્ર કાર્યક્રમ શાંતિપૂર્ણ અને ઉત્સાહભેર યોજાયો હતો.
