વાત્સલ્યમ સમાચાર
મદન વૈષ્ણવ
ડાંગ જિલ્લામાં વરસી રહેલા વરસાદને કારણે સમગ્ર પંથકમાં વરસાદી માહોલ છવાયો છે.રવિવારે સાંજે 6 વાગ્યાથી સોમવારે સાંજે 6 વાગ્યા સુધીના સમયગાળા દરમિયાન નોંધાયેલા વરસાદે જિલ્લાના કુદરતી સૌંદર્યમાં અનેરો વધારો કર્યો છે, જેના પગલે ગિરિમથક સાપુતારા ખાતે પ્રવાસીઓનો ધસારો પણ વધવા પામ્યો છે.પ્રાપ્ત માહિતી અનુસાર, ડાંગ જિલ્લાના વઘઇમાં સૌથી વધુ 34 મીમી (1.36 ઇંચ) વરસાદ વરસ્યો છે. આ ઉપરાંત, જિલ્લા મથક આહવામાં 29 મીમી (1.16 ઇંચ), સુબીરમાં 20 મીમી અને ગિરિમથક સાપુતારામાં 22 મીમી જેટલો વરસાદ નોંધાયો છે.આ વરસાદે વાતાવરણમાં શીતળતા પ્રસરાવી દીધી છે.વરસાદને કારણે ડાંગ જિલ્લાનું કુદરતી સૌંદર્ય વધુ ખીલી ઉઠ્યું છે. ચારે બાજુ લીલોતરી પથરાઈ ગઈ છે, ડુંગરાઓ પરથી ઝરણાં વહેવા લાગ્યા છે અને વાતાવરણમાં ઠંડક છવાઈ ગઈ છે. ડાંગ જિલ્લો તેના ગાઢ જંગલો, ઊંચા પહાડો અને રમણીય દ્રશ્યો માટે જાણીતો છે અને આ વરસાદે આ સુંદરતામાં ચાર ચાંદ લગાવી દીધા છે.આ કુદરતી દ્રશ્યોનો લ્હાવો લેવા માટે સાપુતારા ખાતે પ્રવાસીઓનો ધસારો પણ નોંધપાત્ર રીતે વધ્યો છે. વરસાદી વાતાવરણ અને ઠંડી હવા માણીને પ્રવાસીઓ ખુશખુશાલ જોવા મળી રહ્યા છે. સાપુતારાના વિવિધ પ્રવાસન સ્થળો જેવા કે લેક, બોટિંગ પોઈન્ટ, સનસેટ પોઈન્ટ અને ગાર્ડન્સ પર સહેલાણીઓની ભીડ જોવા મળી રહી છે. સ્થાનિક વેપારીઓ અને પ્રવાસન ઉદ્યોગ સાથે સંકળાયેલા લોકોને પણ આનાથી ફાયદો થઈ રહ્યો છે. હોટેલો અને રિસોર્ટમાં બુકિંગ વધ્યા છે, જે દર્શાવે છે કે વરસાદી માહોલ પ્રવાસીઓને સાપુતારા તરફ આકર્ષી રહ્યો છે.આ વરસાદથી સ્થાનિક ખેડૂતોમાં પણ આનંદનો માહોલ છે, કારણ કે આ વરસાદ આગામી પાક માટે જમીનને પૂરતા પ્રમાણમાં ભેજ પૂરો પાડશે. વરસાદના કારણે જમીનમાં પાણી ઉતરતા ભૂગર્ભ જળ રિચાર્જ થવામાં પણ મદદ મળશે. જોકે વહીવટી તંત્ર એ લોકોને સાવચેત રહેવા અને નદી-નાળા નજીક ન જવા અપીલ કરવામાં આવી છે. એકંદરે, આ વરસાદે ડાંગ જિલ્લાના વાતાવરણને ખુશનુમા બનાવ્યું છે અને પ્રવાસન પ્રવૃત્તિઓને પણ વેગ આપ્યો છે.તો બીજી તરફ ડાંગ જિલ્લાની ખાપરી નદીમાં તણાયેલા યુવકનો 24 કલાક પછી પણ પત્તો નહી.ડાંગ જિલ્લાના પીંપરી ગામ નજીક ખાપરી નદીમાં રવિવારે સાંજે એક યુવક તણાઈ ગયો હતો. ઘટનાના 24 કલાક વીતી ગયા હોવા છતાં, સોમવારે સાંજ સુધીમાં તેનો કોઈ પત્તો લાગ્યો નથી.આહવા-વઘઈ માર્ગને અડીને વહેતી ખાપરી નદીમાં આ દુર્ઘટના બની હતી.પીંપરી ગામનો રહેવાસી દેવેન્દ્ર મહેન્દ્રભાઈ પવાર (ઉંમર 25) કોઈ કામ અર્થે નદી પાર કરીને ગયો હતો. રવિવારે સાંજે લગભગ 6 વાગ્યે તે ઘરે પરત ફરી રહ્યો હતો.આ દરમિયાન, તે ખાપરી નદી પર આવેલા ચેકડેમ પરથી પસાર થઈ રહ્યો હતો ત્યારે ઉપરવાસમાં થયેલા ભારે વરસાદને કારણે નદીમાં પાણીનો પ્રવાહ અચાનક વધી ગયો.પાણીના તેજ પ્રવાહમાં દેવેન્દ્ર પવારનો પગ ચેકડેમ પરથી લપસી ગયો અને તે નદીના વહેણમાં તણાઈ ગયો. પરિવારજનોને આ ઘટનાની જાણ થતાં જ તેમણે યુવકની શોધખોળ શરૂ કરી હતી,પરંતુ ઘટના બન્યાને 24 કલાક જેટલો સમય વીત્યો હોવા છતાં પણ દેવેન્દ્રનો મૃતદેહ મળ્યો નથી..
