નર્મદા : આર્ટસ, સાયન્સ અને કોમર્સ કોલેજ, ખોલવડના NSS એકમ દ્વારા દેવમોગરા મંદિરે સફાઈ અભિયાન
રાજપીપળા : જુનેદ ખત્રી
આર્ટસ, સાયન્સ અને કોમર્સ કોલેજ, ખોલવડના NSS એકમ દ્વારા આયોજિત સાત દિવસીય વાર્ષિક શિબિરના પાંચમાં દિવસે એક પ્રેરણાદાયી સેવા પ્રવૃત્તિનું આયોજન કરવામાં આવ્યું હતું. શિબિરના નિર્ધારિત કાર્યક્રમ મુજબ, તમામ સ્વયંસેવકોએ આદિવાસી સમાજની આસ્થાના કેન્દ્ર સમાન પ્રસિદ્ધ દેવમોગરા સ્થિત ‘યાહા મોગી માતા’ ના મંદિર પરિસરની સફાઈનો સંકલ્પ લીધો હતો.
બપોરના સત્રમાં તમામ સ્વયંસેવકો ઉત્સાહભેર દેવમોગરા પહોંચ્યા હતા. કાર્યક્રમની શરૂઆત માતાજીના દર્શન અને પ્રાર્થનાથી કરવામાં આવી હતી. ત્યારબાદ, NSS પ્રોગ્રામ ઓફિસરના માર્ગદર્શન હેઠળ સ્વયંસેવકોને અલગ-અલગ ટુકડીઓમાં વહેંચવામાં આવ્યા હતા. દરેક ટુકડીને મંદિરના અલગ-અલગ ભાગો, જેવા કે મુખ્ય સભા મંડપ, સીડીઓ, ભોજનાલય વિસ્તાર અને પાર્કિંગની જવાબદારી સોંપવામાં આવી હતી. સ્વયં સેવકોએ અત્યંત નિષ્ઠાપૂર્વક મંદિર પરિસરમાં ફેલાયેલો પ્લાસ્ટિકનો કચરો, સૂકા પાંદડા અને અન્ય ગંદકી દૂર કરી હતી. આ સફાઈ અભિયાન દરમિયાન ‘સ્વચ્છતા ત્યાં પ્રભુતા’ ના નારા લગાવવામાં આવ્યા હતા, જેનાથી ત્યાં આવતા દર્શનાર્થીઓમાં પણ જાગૃતિ ફેલાઈ હતી. સ્થાનિક લોકો અને મંદિર ટ્રસ્ટના સભ્યોએ કોલેજના યુવાનોની આ સેવાકીય ભાવનાને બિરદાવી હતી.
બપોર સુધીમાં સમગ્ર મંદિર પરિસર એકદમ સ્વચ્છ અને સુંદર બની ગયું હતું. આ શ્રમદાન દ્વારા સ્વયં સેવકોએ સમાજસેવા અને સમૂહ ભાવનાનો ઉત્તમ પાઠ શીખ્યો હતો. કાર્યક્રમના અંતે, શિબિરાર્થીઓએ આસપાસના વિસ્તારમાં પણ પ્લાસ્ટિક મુક્ત પર્યાવરણ જાળવવા માટે શપથ લીધા હતા. આજના આ દિવસની સફળતાએ NSS ના સૂત્ર ‘Not Me, But You’ ને ખરા અર્થમાં સાર્થક કર્યું હતું.
