અનુસૂચિત જનજાતિઓના કલ્યાણ માટેની સમિતિ મહીસાગર જિલ્લાની મુલાકાતે
*****
રિપોર્ટર…
અમીન કોઠારી
મહીસાગર….
સમિતિના પ્રમુખશ્રી અભેસિંહ તડવીએ ગોઠીબ પાણી પુરવઠા યોજનાની મુલાકાત લઈ નિરીક્ષણ કર્યું
****
અંબાજીથી ઉમરગામ સુધીના આદિવાસી પટ્ટામાં પીવાના પાણીની સમસ્યાનો સુખદ અંત: શ્રી અભેસિંહ તડવી
****
મહીસાગર ૨૮,નવેમ્બર:: ગુજરાત વિધાનસભાની અનુસૂચિત જનજાતિઓના કલ્યાણ માટેની સમિતિએ આજ રોજ મહીસાગર જિલ્લાના સંતરામપુર તાલુકાના ગોઠીબ પાણી પુરવઠા યોજનાની મુલાકાત લઈ નિરીક્ષણ કર્યું હતું. આ સમિતિએ પાણી પુરવઠા વિભાગના અધિકારીઓ પાસેથી ગોઠીબ પાણી પુરવઠા યોજનાની માહિતી મેળવી જરૂરી સૂચનો કર્યા હતા.
અનુસૂચિત જનજાતિઓના કલ્યાણ માટેની સમિતિના પ્રમુખશ્રી અભેસિંહ તડવીએ જણાવ્યું હતું કે, રાજ્ય સરકારે ડુંગરાળ અને અંતરિયાળ વિસ્તારોમાં વર્ષો જૂની પીવાના પાણીની વિકટ સમસ્યાનો કાયમી ઉકેલ લાવ્યો છે. પાણી પુરવઠાની વિવિધ યોજનાઓ થકી આજે દુર્ગમ ડુંગરાળ વિસ્તારોમાં પણ નાગરિકોને ઘરઆંગણે શુદ્ધ પીવાનું પાણી મળી રહ્યું છે. જેનું ઉત્તમ ઉદાહરણ ગોઠીબ પાણી પુરવઠા યોજના છે, જેના થકી ૫૮ ગામોમાં નિયમિત પાણી પહોંચાડવામાં આવી રહ્યું છે.
શ્રી તડવીએ રાજ્ય સરકારની કામગીરીની સરાહના કરતા ઉમેર્યું હતું કે, અંબાજીથી ઉમરગામ સુધીના સમગ્ર આદિવાસી પટ્ટામાં સમાવિષ્ટ દરેક ગામોમાં ‘ન ભૂતો ન ભવિષ્યતિ’ જેવી ઐતિહાસિક કામગીરી થઈ છે. ભૂતકાળમાં ડુંગરાળ વિસ્તારોમાં આવી વિશાળ યોજનાઓની કલ્પના પણ મુશ્કેલ હતી, પરંતુ વર્તમાન સરકારે તે સાકાર કરી છે. પાણી પુરવઠા વિભાગને પૂરતું બજેટ ફાળવીને આદિવાસી સમાજની સુખાકારીમાં વધારો કરવા બદલ તેમણે મુખ્યમંત્રીશ્રી ભૂપેન્દ્રભાઈ પટેલનો આભાર વ્યક્ત કર્યો હતો અને આદિવાસી ક્ષેત્રે થઈ રહેલા વિકાસકાર્યોની નોંધ લીધી હતી.
ઉલ્લેખનીય છે ગોઠીબ પાણી પુરવઠા યોજના અંતર્ગત સંતરામપુર અને ફતેપુરા તાલુકાના છેવાડાના માનવી સુધી પીવાનું શુદ્ધ પાણી પહોંચાડવાની નેમ સાથે જુથ યોજનાથી વંચિત ૧૧ ગામો તેમજ કડાણા ભાગ-૨ અને ભાણાસિમલ જુથ યોજનાના અનુક્રમે ૩૧ અને ૧૬ ગામો મળી કુલ ૫૮ ગામોની ૧.૪૬ લાખ જનતા માટે પાણી પુરવઠાનું ધોરણ વર્તમાન ૭૦ LPCD થી અપગ્રેડ કરીને ૧૦૦ LPCD કરવામાં આવ્યું છે. આ આયોજનને પરિણામે આ તમામ ગામોના લાભાર્થીઓને હવે ઘરઆંગણે શુદ્ધ, સાતત્યપૂર્ણ અને પર્યાપ્ત માત્રામાં પીવાના પાણીનો લાભ મળ્યો છે.
આ મુલાકાત દરમિયાન ધારાસભ્યશ્રી ડો. કુબેરભાઈ ડીંડોર, કાંતિભાઈ ખરાડી, ડો દર્શનાબેન દેસમુખ, વડોદરા ઝોન-૧ ચીફ ઈંજનેરશ્રી ભાવિક રાઠોડ, ગોધરા સર્કલ ઓફિસ સુપ્રિટેન્ડીંગ ઇજનેરશ્રી સોનલ વસાવા સહિત લુણાવાડા પાણી પુરવઠા અધિકારીશ્રીઓ અને ગામના આગેવાનો ઉપસ્થિત રહ્યા હતા.
