શહેરાની સરકારી વિનયન કૉલેજ ખાતે ‘બૌદ્ધિક સંપત્તિ અધિકાર’ (IPR) વિષયક સેમિનાર સંપન્ન
પંચમહાલ ગોધરા
રાગીનીબેન દરજી શહેરા 
શહેરા: સરકારી વિનયન કોલેજ, શહેરાના સંસ્કૃત વિભાગ તથા SSIP સેલના સંયુક્ત ઉપક્રમે તાજેતરમાં ‘Intellectual Property Rights (IPR)’ વિષય પર એક દિવસીય સેમિનારનું સફળ આયોજન કરવામાં આવ્યું હતું, જેનો મુખ્ય હેતુ વિદ્યાર્થીઓમાં બૌદ્ધિક સંપત્તિના અધિકારો અને સર્જનાત્મક કાર્યના સંરક્ષણ અંગે જાગૃતિ લાવવાનો હતો. કાર્યક્રમની શરૂઆત ‘વંદે માતરમ્’ ના ગાન સાથે થઈ હતી, ત્યારબાદ સંસ્કૃત વિભાગના અધ્યક્ષ ડૉ. શૈલેષકુમાર રાઉલજીએ વક્તાશ્રીઓનો પરિચય આપ્યો હતો અને આચાર્ય ડૉ. જયશ્રીબેન જોષીએ પ્રાસંગિક ઉદ્બોધન દ્વારા વિદ્યાર્થીઓનો ઉત્સાહ વધાર્યો હતો. સેમિનારના પ્રથમ સત્રમાં ડૉ. પ્રવીણસિંહ રાઠોડે સર્જનાત્મકતાના સંરક્ષણમાં IPRની ભૂમિકા વિશે વિસ્તૃત માર્ગદર્શન આપ્યું હતું, જ્યારે બીજા સત્રમાં ડૉ. નયનકુમાર એમ. પટેલે બૌદ્ધિક સંપત્તિ દ્વારા આર્થિક સુરક્ષા અને વ્યવસાયિક વિકાસના મહત્વને ઉદાહરણો સાથે સમજાવ્યું હતું. આ કાર્યક્રમમાં પ્રશ્નોત્તરી સત્ર બાદ વિદ્યાર્થીઓને પ્રમાણપત્ર એનાયત કરવામાં આવ્યા હતા. સમગ્ર કાર્યક્રમનું સંચાલન ડૉ. રાહુલ ત્રિવેદીએ કર્યું હતું અને અંતે રાષ્ટ્રગાન સાથે સેમિનારની પૂર્ણાહુતિ કરવામાં આવી હતી, જે વિદ્યાર્થીઓ માટે અત્યંત જ્ઞાનવર્ધક સાબિત થયો હતો.
