CVM પ્રાધ્યાપકની કલાકૃતિને ‘ધ ઇન્ડિયન એકેડમી ઑફ ફાઇન આર્ટસની 9મી વાર્ષિક કલા પ્રદર્શનીમાં પુરસ્કાર માટે નામાંકીત કરાઇ
CVM પ્રાધ્યાપકની કલાકૃતિને ‘ધ ઇન્ડિયન એકેડમી ઑફ ફાઇન આર્ટસની 9મી વાર્ષિક કલા પ્રદર્શનીમાં પુરસ્કાર માટે નામાંકીત કરાઇ
તાહિર મેમણ – આણંદ – 27/11/2025 – વલ્લભ વિદ્યાનગર સ્થિત સીવીએમ યુનિવર્સિટીની CVM કૉલેજ ઑફ ફાઇન આર્ટ્સના પ્રાધ્યાપકની કલાકૃતિને અમૃતસર ખાતેની ‘ધ ઇન્ડિયન એકેડમી ઑફ ફાઇન આર્ટસ’ની 90મી વાર્ષિક કલા પ્રદર્શનીમાં પુરસ્કાર માટે પસંદ કરવામાં આવી છે. આ સિદ્ધિ બદલ સીવીએમ યુનિવર્સિટીના પ્રમુખ ભીખુભાઈ બી. પટેલ, ચારુતર વિદ્યામંડળ યુનિવર્સિટીના ગવર્નિંગ બોડીના સભ્યો, યુનિવર્સિટીના પ્રોવોસ્ટ શ્રી પ્રોફેસર (ડૉ.) ઇન્દ્રજીત પટેલ, રજિસ્ટ્રાર અને ડીન એકેડેમિક્સ શ્રી પ્રોફેસર (ડૉ.) સંદીપ વાલિયા તથા સીવીએમ કોલેજ ઓફ ફાઇન આર્ટસના માનદ નિયામક શ્રી કનુ પટેલ દ્વારા પેઇન્ટિંગ ક્ષેત્રે ગૌરવ વધારવા બદલ અભિનંદન પાઠવ્યા હતા.
સીવીએમ કૉલેજ ઑફ ફાઇન આર્ટ્સના પેઇન્ટિંગ વિષયના પ્રાધ્યાપક ડૉ. દીપક ભટ્ટની આ પેઇન્ટિંગનું શીર્ષક “રિલેક્સિંગ ઇન વેઇન” આપવામાં આવ્યું હતું, જેને કેનવાસ પર એક્રેલિક રંગથી પેઇન્ટ કરવામાં આવી હતી. આ પેઇન્ટિંગનું માપ: 36 x 48 ઇંચ હતું. કૃતિના વિષય અંગે ડૉ. દીપક ભટ્ટે જણાવ્યું હતું કે આ પેઇન્ટિંગમાં વર્તમાન સમયમાં જીવનની દોડધામને કારણે આરામમાં પણ શાંતિનો અભાવ છે. પેઇન્ટિંગનું શીર્ષક “રિલેક્સિંગ ઇન વેઇન” શારીરિક સ્થિરતા હોવા છતાં માનસિક અસ્થિરતાને વ્યક્ત કરવાનો એક પ્રયાસ છે.
આ પ્રદર્શન માટે દેશભરમાંથી 600થી વધુ કલાકૃતિઓ પ્રાપ્ત થઈ હતી. જેમાં ડૉ. દીપક ભટ્ટની કૃતિનો પણ સમાવેશ હતો. તેમને પુરસ્કાર સ્વરૂપે નકદ રકમ(Cash Prize), રજત પ્લાક સ્મૃતિ ચિહ્ન(Silver Plaque Memento), પ્રશસ્તિ પત્ર(Certificate of Appreciation) દ્વારા સન્માન પ્રાપ્ત થયું છે. એકેડમીની વાર્ષિક કલા પ્રદર્શનીમાં તેમને આ સન્માન આપવામાં આવ્યું હતું. આ ઉપરાંત અગાઉ પણ ડૉ. દીપક ભટ્ટને રાજસ્થાન લલિત કલા અકાદમી દ્વારા બે વાર રાજ્ય કલા પુરસ્કારથી સન્માનિત કરવામાં આવ્યા છે.
