વાત્સલ્યમ સમાચાર
મદન વૈષ્ણવ-ડાંગ 
રાજ્યનાં છેવાડે આવેલ ડાંગ જિલ્લામાં છેલ્લા એક સપ્તાહથી વરસાદી માહોલે વિરામ લેતા ખેડૂતો ચિંતામાં મુકાયા હતા.ચાલુ વર્ષે જુલાઈનાં 22 દિવસ વીતી ગયા હોય તેમ છતાંય હજુ સુધી ડાંગ જિલ્લામાં માફક વરસાદ ન પડતા ખેડૂતો દ્વિધામાં મુકાયા હતા.ડાંગ જિલ્લામાં એક સપ્તાહ સુધી વરસાદી માહોલ સંતાકુકડી રમતા અમુક ખેડૂતો ડાંગરની રોપણીને લઈને ચિંતિત બન્યા હતા.તેવામાં સોમવારથી ડાંગ જિલ્લાના ગામડાઓમાં ફરી વરસાદ સક્રિય થયો છે.સોમવારે ડાંગ જિલ્લાનાં ગિરિમથક સાપુતારા, શામગહાન,ગલકુંડ, બોરખલ,આહવા,ચીંચલી,વઘઇ,સાકરપાતળ,ઝાવડા,ભેંસકાતરી,કાલીબેલ સહિત પૂર્વપટ્ટી અને સરહદીય પંથકોમાં વરસાદી માહોલ જામ્યો હતો.જ્યારે સોમવારે સુબિર પંથકમાં ક્યાંક ઝરમરીયો તો ક્યાંક મધ્યમ વરસાદ નોંધાયો હતો.ડાંગ જિલ્લામાં સોમવારે વરસાદી માહોલ જામતા ખેડૂતોમાં નવી આશા બંધાઈ હતી. ડાંગ જિલ્લાનાં ગામડાઓમાં સોમવારે વરસાદી માહોલ જામતા નદી,નાળા, વહેળા, ઝરણાઓ તથા નાના મોટા જળધોધમાં પાણીની આવક વધતા દ્રશ્યો આહલાદક બની જવા પામ્યા હતા.ગિરિમથક સાપુતારા ખાતે વરસાદી માહોલની વચ્ચે સમયાંતરે ગાઢ ઘુમ્મસિયા વાતાવરણની સફેદ ચાદર ઓઢાઈ રહેતા જોવાલાયક સ્થળોનું વાતાવરણ બેવડાયુ હતુ.ડાંગ જિલ્લા ડિઝાસ્ટર વિભાગનાં જણાવ્યા અનુસાર છેલ્લા ચોવીસ કલાક દરમ્યાન સુબિર પંથકમાં 57 મિમી,વઘઇ પંથકમાં 56 મિમી આહવા પંથકમાં 58 મિમી સાપુતારા પંથકમાં 50 મિમી જેટલો વરસાદ નોંધાયો હતો..
