વાત્સલ્યમ સમાચાર
મદન વૈષ્ણવ-ડાંગ
ડાંગ જિલ્લાનાં સુબીર તાલુકા પંચાયતમાં સમાવિષ્ટ ગ્રુપ ગ્રામ પંચાયત ખાતે 14 નવેમ્બરનાં રોજ સભાનું આયોજન કરવામાં આવ્યું હતુ.જોકે અગાઉના બાકી કામોમાં ગ્રામ પંચાયતનું મકાન બાંધકામ અને ધારાસભ્ય ફંડમાંથી મળેલ ટેન્કર બાબતે પ્રશ્નનો નિકાલ ન થતા ઉગ્ર રજુઆતનાં પગલે બે પ્રતિનિધિઓ વચ્ચે મારામારી થઈ હતી.અગાઉની ગ્રામસભામાં પ્રશ્નોનો નિકાલ ન થતા ગ્રામ સભા ગ્રામજનો દ્વારા બરખાસ્ત કરવામાં આવી હતી.ત્યારે આગામી તારીખ 18 નવેમ્બરનાં રોજ ગ્રુપ ગ્રામ પંચાયત ગારખડી ખાતે ખાસ ગ્રામસભાનું આયોજન કરવામાં આવેલ છે.સુબિર તાલુકા પંચાયતમાં સમાવિષ્ટ ગ્રુપ ગ્રામ પંચાયત ગારખડી ખાતે તાલુકા લાયઝન અધિકારી મંયકભાઈ, બી.આર. એસ. ભુપેન્દ્રભાઈ તથા તલાટી કમ મંત્રી નારાયણભાઈ ઠાકરેની ઉપસ્થિતમાં ગત તા.14/11/2024 ના રોજ ગ્રામ સભાનું આયોજન કરવામાં આવ્યું હતું. જે ગ્રામ સભામાં હાજર ગારખડી ગ્રુપ ગ્રામ પંચાયતના માજી સરપંચ બાલુભાઈ વળવીએ મુદ્દો ટાંકતા જણાવ્યું હતુ કે ગ્રુપ ગ્રામ પંચાયતનું મકાન વર્ષ 2022-23માં મનરેગા યોજના અંતર્ગત મંજૂર થયુ હતુ. જે ગ્રામ પંચાયતનું મકાન આજદિન સુધી કેમ પૂર્ણ કરવામાં આવ્યું નથી. તેમજ વર્ષ 2022-23માં ધારાસભ્ય ફંડમાંથી મળેલા પાણીનાં ટેન્કરનો આજદિન સુધી હિસાબ મળ્યો નથી. જે પ્રશ્નો રજૂ કરતાં ગ્રામ સભા ઉગ્ર અને તોફાની બની હતી.માજી સરપંચ દ્વારા રજૂ કરાયેલા બે પ્રશ્નોને લઈને તાલુકા પંચાયતનાં સદસ્યનાં પ્રતિનિધિ ઈશારામભાઈ રાજ્યાભાઈ બહીરમ એકદમ ઉશ્કેરાઈ ગયા હતા.અને ગ્રામસભામાં અધિકારીઓની ઉપસ્થિતમાં જ આ પ્રતિનિધિએ માજી સરપંચ સાથે ખુલ્લા હાથ વડે મારામારી કરતા અફરા તફરીનો માહોલ સર્જાયો હતો.અહીં અધિકારીઓની ઉપસ્થિતમાં જ બે આગેવાનો વચ્ચે મારામારી થતાં ચકચાર મચી જવા પામી હતી. વધુમાં પાણીના ટેન્કરનાં હિસાબ સહિત આ મારામારીનાં બનાવનાં પગલે ગ્રામજનોએ ગ્રુપ ગ્રામ પંચાયત ગારખડીની ગ્રામસભાનો બહિષ્કાર કર્યો હતો.જે બાદ તલાટી કમ મંત્રીએ તાલુકા વિકાસ અધિકારી સુબિરને રિપોર્ટ રજૂ કર્યો હતો.ત્યારે પ્રશ્નનું નિરાકરણ થાય તે હેતુથી તા.18/11/2024ના રોજ સવારે 11 કલાકે ગ્રુપ ગ્રામ પંચાયત કચેરી ગારખડી ખાતે ખાસ ગામ સભા નું આયોજન કરવામાં આવેલ છે..
