વાત્સલ્યમ સમાચાર
મદન વૈષ્ણવ
ડાંગ જિલ્લામાં છેલ્લા બે ત્રણ દિવસથી વરસાદી માહોલ જામ્યો હતો.ડાંગ જિલ્લામાં વરસાદી માહોલ જામતા નદી,નાળા, વહેળા, જળધોધ ફરીથી છલકાઈ ઉઠ્યા છે.ગુરુવારે ડાંગ જિલ્લાનાં ગિરિમથક સાપુતારા,શામગહાન,સાકરપાતળ,ગલકુંડ,બોરખલ,ચિંચલી સહીત પૂર્વપટ્ટી અને સરહદીય ગામડાઓમાં મધ્યમ સ્વરૂપેનો વરસાદ નોંધાયો હતો.જ્યારે સુબિર,પીપલદહાડ,લવચાલી, ગારખડી, સિંગાણા, બરડીપાડા,કાલીબેલ,ઝાવડા, ભેંસકાતરી,વઘઇ સહીતનાં પંથકોમાં હળવો વરસાદ નોંધાયો છે.ડાંગ જિલ્લામાં ગુરુવારે વરસાદનું જોર ઘટતા જનજીવન સહિત પશુપાલને રાહતનો શ્વાસ લીધો છે.ડાંગ જિલ્લામાં વરસાદી માહોલનાં પગલે લોકમાતાઓમાં અંબિકા,ખાપરી,પૂર્ણા અને ગીરા નદી ફરી ડહોળા નીર સાથે બન્ને કાંઠે થઈ વહેતી જોવા મળી હતી.સાથે જ નાનકડી કોતરો,ઝરણા અને નાના મોટા જળધોધ પણ લયમાં આવી વહેતા થયા છે.ડાંગ જિલ્લાનાં ગિરિમથક સાપુતારા ખાતે વરસાદી માહોલની વચ્ચે રોજ રોજ ગાઢ ઘુમ્મસિયા વાતાવરણની સફેદ ચાદર ઓઢાઈ રહેતા જોવાલાયક સ્થળોના દ્રશ્યો મિનિકાશ્મીર જેવા ભાસી ઉઠ્યા હતા.વરસાદી માહોલમાં સાપુતારાથી શામગહાનને જોડતા રાષ્ટ્રીય ધોરીમાર્ગમાં સમયાંતરે ગાઢ ધુમ્મસિયા વાતાવરણની સફેદ ચાદર ઓઢાઈ રહેતા વિઝીબીલીટી ઘટી હતી.જેના પગલે ગુરૂવારે દિવસ દરમ્યાન પ્રવાસી વાહનચાલકોને વાહનોની સિગ્નલ લાઈટ ચાલુ રાખી વાહનો હંકારવાની નોબત ઉઠી હતી.સાપુતારા ખાતે ફરવા આવેલ પ્રવાસીઓએ વરસાદી માહોલ અને ગાઢ ઘુમ્મસીયા વાતાવરણમાં હરીફરીને કુદરતી સૌંદર્યનો આસ્વાદ માણ્યો હતો.વરસાદી માહોલમાં વઘઇનો ગીરાધોધ સોળે કળાએ ખીલી ઉઠી પ્રવાસીઓમાં આકર્ષણનું કેન્દ્ર બન્યો હતો.ડાંગ જિલ્લા ડિઝાસ્ટર વિભાગનાં જણાવ્યા અનુસાર છેલ્લા ચોવીસ કલાક દરમ્યાન સાપુતારા પંથકમાં 30 મીમી અર્થાત 1.2 ઈંચ, આહવા પંથકમાં 24 મીમી અર્થાત 0.96 ઈંચ, વઘઇ પંથકમાં 19 મીમી,જયારે સુબીર પંથકમાં 15 મીમી જેટલો વરસાદ નોંધાયો હતો..
