વાત્સલ્યમ સમાચાર
મદન વૈષ્ણવ-ડાંગ
રાજ્યનાં છેવાડે આવેલ ડાંગ જિલ્લામાં છેલ્લા ત્રણ દિવસથી વરસાદી માહોલની ધાર ધીમી પડી છે. ડાંગ જિલ્લામાં વરસાદી માહોલની ધાર ધીમી પડતા ખેડૂતો રોપણીમાં વ્યસ્ત બન્યા છે.સોમવારે ડાંગ જિલ્લાનાં આહવા,વઘઇ, સુબિર, સાપુતારા, શામગહાન,બોરખલ, લવચાલી,પીંપરી,સાકરપાતળ,સહિત પૂર્વપટ્ટી અને સરહદીય પંથકોમાં મધ્યમ વરસાદ નોંધાયો હતો.ડાંગ જિલ્લાનાં ગામડાઓમાં સોમવારે સાર્વત્રિક સ્વરૂપે મધ્યમ વરસાદ નોંધાતા સર્વત્ર પાણીની રેલમછેલ ફરી વળી હતી.ડાંગ જિલ્લામાં સાર્વત્રિક વરસાદનાં પગલે નદી,નાળા, નાના મોટા જળધોધ ભરપૂર પાણીની આવક સાથે ખીલી ઉઠ્યા હતા.ગિરિમથક સાપુતારા સહિત અન્ય પ્રવાસન સ્થળોએ વરસાદી માહોલની વચ્ચે ગાઢ ધુમ્મસિયા વાતાવરણની સફેદ ચાદર ઓઢાઈ રહેતા ફરવા આવેલ પ્રવાસીઓની મોજ પડી ગઈ હતી.ડાંગ જિલ્લા ડિઝાસ્ટર વિભાગનાં જણાવ્યા અનુસાર છેલ્લા 24 કલાક દરમ્યાન સુબિર પંથકમાં 28 મિમી અર્થાત 1.12 ઈંચ, વઘઇ પંથકમાં 30 મિમી અર્થાત 1.2 ઈંચ, સાપુતારા પંથકમાં 33 મિમી અર્થાત 1.32 ઈંચ, જ્યારે સૌથી વધુ આહવા પંથકમાં 58 મિમી અર્થાત 2.32 ઈંચ જેટલો વરસાદ નોંધાયો હતો..
