બોડેલી તાલુકા હેઠળ આવેલા લડોદ, ધારોલી સહિતના ગામોને માકણી ગામ સાથે જોડતો અંદાજે ચાર કિલોમીટરનો રસ્તો હાલમાં અત્યંત જર્જરીત હાલતમાં છે. ગ્રામજનોના જણાવ્યા મુજબ આ રસ્તો અગાઉ મુખ્ય માર્ગ તરીકે ઉપયોગમાં લેવાતો હતો અને ત્યાંથી બસની પણ અવરજવર હતી, પરંતુ લાંબા સમયથી કોઈ જાળવણી ન થવાને કારણે રસ્તો બિસ્માર બની ગયો છે.
- રસ્તાની હાલત એવી છે કે હાલમાં બાઈક, 108 એમ્બ્યુલન્સ કે અન્ય કોઈ વાહન પસાર થવું શક્ય નથી. લડોદ ગામમાં સરકારી પ્રાથમિક આરોગ્ય કેન્દ્ર (PHC) ન હોવાથી ગ્રામજનોએ સારવાર માટે માકણી સરકારી દવાખાને જવું પડે છે, જેના માટે 15 થી 20 કિલોમીટરનો ફેરો મારવો પડે છે.
- ખાસ કરીને ગર્ભવતી મહિલાઓને ભારે મુશ્કેલીનો સામનો કરવો પડે છે. મહિલાઓનું કહેવું છે કે પ્રસૂતિ માટે માકણી દવાખાને લઈ જતી વખતે રસ્તામાં જ ડિલિવરી થવાની ઘટનાઓ પણ બની ચૂકી છે, જે ગંભીર ચિંતાનો વિષય છે.
- રસ્તાની સમસ્યાને લઈને ગ્રામજનોએ અગાઉ પંચાયત, સેવા સદન સહિત અનેક સ્થળે રજૂઆત કરી હતી, પરંતુ આજદિન સુધી કોઈ નક્કર કાર્યવાહી કરવામાં આવી નથી. આ પરિસ્થિતિને લઈને લડોદ ગામના ગ્રામજનો ભેગા થયા હતા અને માકણીથી લડોદ સુધીનો ચાર કિલોમીટરનો રસ્તો તાત્કાલિક બનાવવા માટે સૂત્રોચાર કર્યા હતા.
- ગ્રામજનોની માંગ છે કે જો આ ચાર કિલોમીટરનો રસ્તો બનાવવામાં આવે તો માકણી સરકારી દવાખાને પહોંચવું સરળ બને અને દર્દીઓ તેમજ મહિલાઓને થતી મુશ્કેલીઓથી રાહત મળે. સરકાર તાત્કાલિક પગલા ભરે તેવી ગ્રામજનોની ઉગ્ર માંગ છે.
- રિપોર્ટર તોસીફ ખત્રી
Sorry, there was a YouTube error.
Follow Us
